ಚೆಕ್ ಬೌನ್ಸ್ ಆದರೆ ಎಷ್ಟು ವರ್ಷ ಜೈಲು ಶಿಕ್ಷೆ ಗೊತ್ತ? ಕಾನೂನು ಕಠಿಣ, ಜಾಗ್ರತೆ ಅಗತ್ಯ!
Cheque Bounce: ಚೆಕ್ ಬೌನ್ಸ್ ಅನ್ನು ಸಣ್ಣ ತಪ್ಪು ಎಂದು ನಿರ್ಲಕ್ಷಿಸಿದರೆ ಭಾರೀ ದಂಡ, ಕ್ರೆಡಿಟ್ ಸ್ಕೋರ್ ಕುಸಿತ ಮತ್ತು ಎರಡು ವರ್ಷಗಳವರೆಗೆ ಜೈಲು ಶಿಕ್ಷೆ ಎದುರಾಗಬಹುದು ಎಂದು ಕಾನೂನು ತಜ್ಞರು ಸ್ಪಷ್ಟ ಎಚ್ಚರಿಕೆ ನೀಡಿದ್ದಾರೆ.
Cheque Bounce: ಇತ್ತೀಚಿನ ದಿನಗಳಲ್ಲಿ ವ್ಯವಹಾರಗಳು, EMI, ಬಾಡಿಗೆ, ಸಾಲ ಪಾವತಿ ಸೇರಿ ಎಲ್ಲಾ ಚೆಕ್ ಮೂಲಕ ನಡೆಯುತ್ತಿವೆ. ಆದರೆ ಕೆಲವರು ಹಣ ಇರದೇ ಚೆಕ್ ನೀಡುವುದು ಅಥವಾ ನಿರ್ಲಕ್ಷ್ಯದಿಂದ ಖಾತೆ ಬ್ಯಾಲೆನ್ಸ್ ಪರಿಶೀಲಿಸದೇ ಬಿಡುವುದು ಸಾಮಾನ್ಯವಾಗಿದೆ. ಇದನ್ನು ಸಣ್ಣ ತಪ್ಪು ಎಂದುಕೊಂಡರೆ ಮುಂದೆ ದೊಡ್ಡ ಕಾನೂನು ಸಮಸ್ಯೆಗೆ ದಾರಿ ತೆರೆದುಕೊಳ್ಳುತ್ತದೆ.
ಚೆಕ್ ಬೌನ್ಸ್ ಆದ ಕ್ಷಣದಿಂದಲೇ ಬ್ಯಾಂಕ್ ದಂಡ ಶುರುವಾಗುತ್ತದೆ. ನಂತರ ಎದುರಾಳಿ ಕಾನೂನು ನೋಟಿಸ್ ಕಳುಹಿಸಿದರೆ, ವಿಷಯ ನೇರವಾಗಿ ಕೋರ್ಟ್ ತನಕ ಹೋಗಬಹುದು.
ಕಾನೂನು ಏನು ಹೇಳುತ್ತದೆ?
ಭಾರತದ Negotiable Instruments Act – Section 138 ಪ್ರಕಾರ, ಚೆಕ್ ಬೌನ್ಸ್ ಆದ ಬಳಿಕ 15 ದಿನಗಳಲ್ಲಿ ಹಣ ಪಾವತಿಸದಿದ್ದರೆ ಅಪರಾಧ ಪ್ರಕರಣ ದಾಖಲಾಗುತ್ತದೆ.
ಈ ಪ್ರಕರಣದಲ್ಲಿ:
- ಎರಡು ವರ್ಷಗಳವರೆಗೆ ಜೈಲು ಶಿಕ್ಷೆ
- ಚೆಕ್ ಮೊತ್ತದ ದ್ವಿಗುಣ ದಂಡ
- ಅಥವಾ ಎರಡೂ ವಿಧಿಸಬಹುದು
ಹೀಗಾಗಿ ಇದು ಕೇವಲ ಬ್ಯಾಂಕ್ ಸಮಸ್ಯೆ ಅಲ್ಲ, ಕ್ರಿಮಿನಲ್ ಕೇಸ್ ಆಗುತ್ತದೆ.
ಬ್ಯಾಂಕ್ ದಂಡಗಳು ಮೊದಲು ಶುರು
ಕಾನೂನು ಕ್ರಮಕ್ಕಿಂತ ಮೊದಲೇ ಬ್ಯಾಂಕ್ ನಿಮ್ಮ ಮೇಲೆ ಚಾರ್ಜ್ ಹಾಕುತ್ತದೆ. ಪ್ರತಿ ಬೌನ್ಸ್‌ಗೆ ₹250 ರಿಂದ ₹750 ವರೆಗೆ ದಂಡ ವಿಧಿಸಬಹುದು. EMI ಅಥವಾ ಕ್ರೆಡಿಟ್ ಕಾರ್ಡ್ ಪಾವತಿ ವಿಫಲವಾದರೆ ಲೇಟ್ ಫೀ, ಬಡ್ಡಿ, ಹೆಚ್ಚುವರಿ ಚಾರ್ಜ್ ಸೇರಿ ಸಾವಿರಾರು ರೂಪಾಯಿ ನಷ್ಟವಾಗಬಹುದು.
ಮೂರು ಬಾರಿ ಪಾವತಿ ವಿಫಲವಾದರೆ ₹2,000–₹3,000 ತನಕ ಹೆಚ್ಚುವರಿ ಹೊರೆ ಬೀಳಬಹುದು.
ಕ್ರೆಡಿಟ್ ಸ್ಕೋರ್ ಮೇಲೆ ಗಂಭೀರ ಪರಿಣಾಮ
ಚೆಕ್ ಅಥವಾ EMI ಬೌನ್ಸ್ ಆದರೆ ಸಾಲ ನೀಡುವ ಸಂಸ್ಥೆಗಳು ನಿಮ್ಮನ್ನು “ಡಿಫಾಲ್ಟರ್” ಎಂದು ಗುರುತಿಸುತ್ತವೆ.
ಇದರಿಂದ:
- 50–70 ಪಾಯಿಂಟ್‌ಗಳವರೆಗೆ ಕ್ರೆಡಿಟ್ ಸ್ಕೋರ್ ಕುಸಿತ
- ಭವಿಷ್ಯದಲ್ಲಿ ಸಾಲ/ಕ್ರೆಡಿಟ್ ಕಾರ್ಡ್ ನಿರಾಕರಣೆ
- ಹೆಚ್ಚು ಬಡ್ಡಿದರದ ಸಾಲ ಮಾತ್ರ ಲಭ್ಯ
ಒಂದು ತಪ್ಪು ಭವಿಷ್ಯದ ಆರ್ಥಿಕ ಯೋಜನೆಗೆ ದೊಡ್ಡ ಹೊಡೆತ ನೀಡಬಹುದು.
ಪದೇ ಪದೇ ಬೌನ್ಸ್ ಆದರೆ?
ಒಮ್ಮೆ ಬೌನ್ಸ್ ಆದರೆ ಎಚ್ಚರಿಕೆ. ಆದರೆ ಪದೇ ಪದೇ ಆಗಿದ್ರೆ ಹಣಕಾಸು ವಿಶ್ವಾಸವೇ ಕಳೆದುಕೊಳ್ಳುತ್ತೀರಿ. ಮನೆ ಸಾಲ, ಕಾರು ಸಾಲ, ದೊಡ್ಡ ಫೈನಾನ್ಸ್ ಪಡೆಯುವುದು ಕಷ್ಟಕರವಾಗುತ್ತದೆ.
ಗಮನಿಸಬೇಕಾದ ವಿಷಯ: ಆಟೋ-ಡೆಬಿಟ್ ವಿಫಲವಾದರೆ ಸಾಮಾನ್ಯವಾಗಿ ಕ್ರಿಮಿನಲ್ ಕೇಸ್ ಆಗುವುದಿಲ್ಲ, ಆದರೆ ಆರ್ಥಿಕ ನಷ್ಟ ತಪ್ಪದು.
ತಜ್ಞರ ಸಲಹೆ
ಚೆಕ್ ನೀಡುವ ಮೊದಲು ಬ್ಯಾಲೆನ್ಸ್ ಪರಿಶೀಲಿಸಿ. EMI ದಿನಾಂಕ ಮಿಸ್ ಮಾಡಬೇಡಿ. ಸಣ್ಣ ನಿರ್ಲಕ್ಷ್ಯವೂ ಕೋರ್ಟ್ ಮೆಟ್ಟಿಲೇರಿಸುವ ಮಟ್ಟಕ್ಕೆ ತಲುಪಬಹುದು.
