ಪ್ರತಿ 10 ಗ್ರಾಂ ಚಿನ್ನದ ಬೆಲೆ 2 ಲಕ್ಷ ತಲುಪುವ ಸಾಧ್ಯತೆ, ಇಲ್ಲಿದೆ ಬೆಲೆ ಏರಿಕೆಗೆ ಪ್ರಮುಖ ಕಾರಣ

Gold Price Today: ಮಂಗಳವಾರ ಜಾಗತಿಕ ಮಾರುಕಟ್ಟೆಯಲ್ಲಿ ಚಿನ್ನದ ಬೆಲೆಯಲ್ಲಿ ಮತ್ತೆ ಏರಿಕೆ ಕಂಡಿದೆ. ಮಲ್ಟಿ ಕಮೋಡಿಟಿ ಎಕ್ಸ್‌ಚೇಂಜ್ (MCX) ನಲ್ಲಿ ಚಿನ್ನದ ದರ ಇಂಟ್ರಾಡೇ ಟ್ರೇಡಿಂಗ್ ವೇಳೆ ಸುಮಾರು ₹1,61,675 ಪ್ರತಿ 10 ಗ್ರಾಂ ಮಟ್ಟ ತಲುಪಿದೆ.

ಇದಕ್ಕೂ ಮೊದಲು ದಾಖಲಾಗಿದ್ದ ₹1,80,779 ಪ್ರತಿ 10 ಗ್ರಾಂ ಆಲ್-ಟೈಮ್ ಹೈಗಿಂತ ಇನ್ನೂ ಕಡಿಮೆ ಇದ್ದರೂ, ಇತ್ತೀಚಿನ ದಿನಗಳಲ್ಲಿ ಮತ್ತೆ ಚಿನ್ನದ ಬೆಲೆ ಬಲ ಪಡೆಯುತ್ತಿರುವುದು ಮಾರುಕಟ್ಟೆಯಲ್ಲಿ ಗಮನ ಸೆಳೆದಿದೆ.

ಏಕೆ ಏರುತ್ತಿದೆ ಚಿನ್ನದ ಬೆಲೆ

ಅಮೆರಿಕನ್ ಡಾಲರ್ ದುರ್ಬಲವಾಗುತ್ತಿರುವುದು ಚಿನ್ನದ ಬೆಲೆ ಏರಿಕೆಗೆ ಪ್ರಮುಖ ಕಾರಣವಾಗಿದೆ. ಡಾಲರ್ ಮೌಲ್ಯ ಕಡಿಮೆಯಾದಾಗ ಇತರ ದೇಶಗಳ ಹೂಡಿಕೆದಾರರಿಗೆ ಚಿನ್ನ ಖರೀದಿಸುವುದು ಸುಲಭವಾಗುತ್ತದೆ. ಇದರಿಂದ ಜಾಗತಿಕ ಮಟ್ಟದಲ್ಲಿ ಚಿನ್ನದ ಬೇಡಿಕೆ ಹೆಚ್ಚಾಗುತ್ತದೆ.

ಇದಲ್ಲದೆ ಮಧ್ಯಪ್ರಾಚ್ಯದ ರಾಜಕೀಯ ಉದ್ವಿಗ್ನತೆ ಸ್ವಲ್ಪ ಮಟ್ಟಿಗೆ ಕಡಿಮೆಯಾಗುತ್ತಿರುವುದೂ ಮಾರುಕಟ್ಟೆಯ ಚಲನವಲನವನ್ನು ಪ್ರಭಾವಿಸಿದೆ. ಈ ಹಿನ್ನೆಲೆಯಲ್ಲಿ ಹೂಡಿಕೆದಾರರು ಸುರಕ್ಷಿತ ಹೂಡಿಕೆ ಎಂದು ಪರಿಗಣಿಸುವ ಚಿನ್ನದ ಕಡೆಗೆ ಹೆಚ್ಚು ಗಮನ ಹರಿಸುತ್ತಿದ್ದಾರೆ.

ಅಂತರರಾಷ್ಟ್ರೀಯ ಮಾರುಕಟ್ಟೆಯ ಸ್ಥಿತಿ

ಅಂತರರಾಷ್ಟ್ರೀಯ ಮಾರುಕಟ್ಟೆಯಲ್ಲೂ ಚಿನ್ನದ ಬೆಲೆಯಲ್ಲಿ ಏರಿಕೆ ಕಂಡಿದೆ. ಕಾಮೆಕ್ಸ್ (COMEX) ಮಾರುಕಟ್ಟೆಯಲ್ಲಿ ಗೋಲ್ಡ್ ಫ್ಯೂಚರ್ಸ್ ಸುಮಾರು 1.5% ಏರಿಕೆ ಕಂಡು ಪ್ರತಿ ಔನ್ಸ್‌ಗೆ $5,179 ಮಟ್ಟ ತಲುಪಿದೆ.

ಇದಕ್ಕುಪರಿ ಸ್ಪಾಟ್ ಗೋಲ್ಡ್ ದರವೂ ಸುಮಾರು $5,174 ಪ್ರತಿ ಔನ್ಸ್ ಮಟ್ಟದಲ್ಲಿ ವ್ಯಾಪಾರವಾಗುತ್ತಿದೆ. ಅಮೆರಿಕದ ಗೋಲ್ಡ್ ಫ್ಯೂಚರ್ಸ್ ದರದಲ್ಲೂ ಸುಮಾರು 1.6% ಏರಿಕೆ ದಾಖಲಾಗಿದೆ.

ಮಾರುಕಟ್ಟೆ ತಜ್ಞರ ಅಭಿಪ್ರಾಯ

ಜಾಗತಿಕ ರಾಜಕೀಯ ಉದ್ವಿಗ್ನತೆ ಹೆಚ್ಚಾದಾಗ ಹೂಡಿಕೆದಾರರು ಸಾಮಾನ್ಯವಾಗಿ ಸುರಕ್ಷಿತ ಹೂಡಿಕೆಯಾಗಿ ಚಿನ್ನವನ್ನು ಆಯ್ಕೆ ಮಾಡುತ್ತಾರೆ. ಆದರೆ ಉದ್ವಿಗ್ನತೆ ಕಡಿಮೆಯಾಗುವ ಸೂಚನೆ ಸಿಕ್ಕಾಗ ಕೆಲವರು ಮತ್ತೆ ಷೇರು ಮಾರುಕಟ್ಟೆಯಂತಹ ಅಪಾಯದ ಹೂಡಿಕೆಗಳತ್ತ ಮುಖ ಮಾಡುತ್ತಾರೆ.

ತಜ್ಞರ ಅಂದಾಜಿನ ಪ್ರಕಾರ ಡಾಲರ್ ದುರ್ಬಲತೆ ಮುಂದುವರಿದರೆ, ಜಾಗತಿಕ ಬಡ್ಡಿದರ ಕಡಿತ ಆರಂಭವಾದರೆ ಹಾಗೂ ಜಾಗತಿಕ ಉದ್ವಿಗ್ನತೆ ಸಂಪೂರ್ಣವಾಗಿ ಕಡಿಮೆಯಾಗದಿದ್ದರೆ ಭಾರತದಲ್ಲಿ ಚಿನ್ನದ ಬೆಲೆ 10 ಗ್ರಾಂಗೆ ₹2 ಲಕ್ಷ ತಲುಪುವ ಸಾಧ್ಯತೆ ಇದೆ.

ಆದರೆ ಸಮೀಪದ ಅವಧಿಯಲ್ಲಿ ಚಿನ್ನದ ಬೆಲೆ ₹1.58 ಲಕ್ಷದಿಂದ ₹1.67 ಲಕ್ಷದ ನಡುವೆ ಏರಿಳಿತ ಕಂಡುಬರುವ ಸಾಧ್ಯತೆ ಇದೆ. ಹೀಗಾಗಿ ಹೂಡಿಕೆದಾರರು ಡಾಲರ್ ಚಲನೆ, ಬಡ್ಡಿದರ ನಿರ್ಧಾರಗಳು ಮತ್ತು ಜಾಗತಿಕ ಪರಿಸ್ಥಿತಿಗಳ ಮೇಲೆ ಗಮನ ಹರಿಸುತ್ತಿದ್ದಾರೆ.