ಅಕ್ಷಯ ತೃತೀಯ ಆಫರ್: ಓಲಾ ಎಲೆಕ್ಟ್ರಿಕ್‌ ಸ್ಕೂಟರ್ ಮೇಲೆ ಭರ್ಜರಿ 50,000ವರೆಗೆ ರಿಯಾಯಿತಿ

ಅಕ್ಷಯ ತೃತೀಯ ವಿಶೇಷ ‘ಓಲಾ ಸೋನಾ ವೀಕೆಂಡ್‌’ ಸೇಲ್

Electric Scooter: ಅಕ್ಷಯ ತೃತೀಯ (Akshaya Tritiya) ಹಬ್ಬದ ಸಂದರ್ಭವನ್ನು ಗಮನದಲ್ಲಿಟ್ಟುಕೊಂಡು ಎಲೆಕ್ಟ್ರಿಕ್ ವಾಹನ ತಯಾರಕ ಕಂಪನಿ ಓಲಾ ಎಲೆಕ್ಟ್ರಿಕ್ ಗ್ರಾಹಕರಿಗಾಗಿ ವಿಶೇಷ ಆಫರ್‌ಗಳನ್ನು ಘೋಷಿಸಿದೆ. ‘

ಓಲಾ ಸೋನಾ ವೀಕೆಂಡ್‌’ ಎಂಬ ಹೆಸರಿನಲ್ಲಿ ಘೋಷಿಸಿರುವ ಈ ಸೇಲ್‌ ಕೇವಲ ಎರಡು ದಿನಗಳು, ಶನಿವಾರ ಮತ್ತು ಭಾನುವಾರ ಮಾತ್ರ ಲಭ್ಯವಿರುವುದು ವಿಶೇಷ. ಈ ಅವಧಿಯಲ್ಲಿ ಹೊಸ ಎಲೆಕ್ಟ್ರಿಕ್ ಸ್ಕೂಟರ್ ಅಥವಾ ಬೈಕ್ ಖರೀದಿಸಲು ಯೋಚಿಸುತ್ತಿರುವವರಿಗೆ ದೊಡ್ಡ ರಿಯಾಯಿತಿ ದೊರೆಯಲಿದೆ.

ಕಂಪನಿಯ ಮಾಹಿತಿಯ ಪ್ರಕಾರ, ಹೊಸ ಎಲೆಕ್ಟ್ರಿಕ್ ವಾಹನಗಳ ಖರೀದಿಗೆ ಒಟ್ಟು ₹40,000ವರೆಗೆ ಪ್ರಯೋಜನಗಳು ದೊರೆಯಬಹುದು. ಇದರ ಜೊತೆಗೆ ಬ್ಯಾಂಕ್ ಆಫ್ ಬರೋಡಾ, ಸ್ಕಾಪಿಯಾ ಫೆಡರಲ್ ಬ್ಯಾಂಕ್, ಯೆಸ್ ಬ್ಯಾಂಕ್, ಐಡಿಎಫ್‌ಸಿ ಫಸ್ಟ್ ಬ್ಯಾಂಕ್ ಹಾಗೂ HSBC ಕ್ರೆಡಿಟ್ ಕಾರ್ಡ್‌ಗಳ ಮೂಲಕ ಪಾವತಿ ಮಾಡಿದರೆ ಹೆಚ್ಚುವರಿಯಾಗಿ ₹10,000ವರೆಗೆ ಡಿಸ್ಕೌಂಟ್ ಸಿಗಲಿದೆ. ಹೀಗಾಗಿ ಒಟ್ಟು ರಿಯಾಯಿತಿ ₹50,000ವರೆಗೆ ತಲುಪಬಹುದು.

ಕಡಿಮೆ ಬೆಲೆಯಲ್ಲಿ ಓಲಾ ಸ್ಕೂಟರ್‌ಗಳು

ಈ ವಿಶೇಷ ಆಫರ್ ಭಾಗವಾಗಿ ಕೆಲವು ಮಾದರಿಗಳ ಬೆಲೆಯನ್ನು ಗಣನೀಯವಾಗಿ ಕಡಿಮೆ ಮಾಡಲಾಗಿದೆ. Ola S1 X (2kWh) ಹಾಗೂ Ola Roadster X (2.5kWh) ಮಾದರಿಗಳ ಆರಂಭಿಕ ಬೆಲೆಯನ್ನು ಕೇವಲ ₹49,999ಕ್ಕೆ ನಿಗದಿಪಡಿಸಲಾಗಿದೆ. ಈ ಬೆಲೆ ಎಲೆಕ್ಟ್ರಿಕ್ ವಾಹನಗಳ ಸೆಗ್ಮೆಂಟ್‌ನಲ್ಲಿ ಅತ್ಯಂತ ಆಕರ್ಷಕ ಎಂದು ಹೇಳಬಹುದು.

ಇದೇ ವೇಳೆ Roadster X+ 9.1 ಹೈಎಂಡ್ ಮಾದರಿಯ ಮೇಲೂ ₹50,000ವರೆಗೆ ರಿಯಾಯಿತಿ ನೀಡಲಾಗಿದೆ. ಈ ಆಫರ್‌ನಿಂದಾಗಿ ಈ ಬೈಕ್ ಅನ್ನು ಸುಮಾರು ₹1,39,999 ಬೆಲೆಯಲ್ಲಿ ಖರೀದಿಸುವ ಅವಕಾಶ ಸಿಗುತ್ತಿದೆ. ಜೊತೆಗೆ ಈ ಸೇಲ್‌ನಲ್ಲಿ ಖರೀದಿಸಿದ ವಾಹನಗಳಿಗೆ ಕಂಪನಿ 8 ವರ್ಷಗಳ ಬ್ಯಾಟರಿ ವಾರಂಟಿ ನೀಡುತ್ತಿರುವುದು ಗ್ರಾಹಕರಿಗೆ ಮತ್ತೊಂದು ದೊಡ್ಡ ಲಾಭವಾಗಿದೆ.

ಲಕ್ಕಿ ಡ್ರಾ ಬಹುಮಾನವೂ ಇದೆ

ಈ ಎರಡು ದಿನಗಳ ಆಫರ್‌ನಲ್ಲಿ ವಾಹನ ಖರೀದಿಸಿದ ಗ್ರಾಹಕರಲ್ಲಿ ಒಬ್ಬರಿಗೆ ಲಕ್ಕಿ ಡ್ರಾ ಮೂಲಕ ವಿಶೇಷ ‘ಓಲಾ ಸೋನಾ ಸ್ಪೆಷಲ್ ಎಡಿಷನ್’ ವಾಹನವನ್ನು ಬಹುಮಾನವಾಗಿ ನೀಡಲಾಗುತ್ತದೆ. ಜೊತೆಗೆ 4680 ಭಾರತ ಸೆಲ್‌ನೊಂದಿಗೆ ಬಂದಿರುವ Roadster X+ 9.1 ಮಾದರಿಯ ಬುಕ್ಕಿಂಗ್ ಗಡುವನ್ನೂ ಕಂಪನಿ ವಿಸ್ತರಿಸಿದೆ.

ಒಟ್ಟಾರೆ ಅಕ್ಷಯ ತೃತೀಯದ ಸಂದರ್ಭದಲ್ಲಿ ಓಲಾ ಎಲೆಕ್ಟ್ರಿಕ್ ಘೋಷಿಸಿರುವ ಈ ಆಫರ್‌ಗಳು ಎಲೆಕ್ಟ್ರಿಕ್ ವಾಹನ ಖರೀದಿಸಲು ಬಯಸುವವರಿಗೆ ಉತ್ತಮ ಅವಕಾಶವೆಂದು ಹೇಳಬಹುದು. ಕಡಿಮೆ ಬೆಲೆಗೆ ಹೊಸ ತಂತ್ರಜ್ಞಾನ ಮತ್ತು ಉತ್ತಮ ಫೀಚರ್‌ಗಳಿರುವ ಸ್ಕೂಟರ್ ಪಡೆಯಲು ಇದು ಸರಿಯಾದ ಸಮಯ ಎಂದು ತಜ್ಞರು ಅಭಿಪ್ರಾಯಪಡುತ್ತಿದ್ದಾರೆ.