ಪ್ಯಾನ್ ಕಾರ್ಡ್ ಇದ್ದರೆ ಈ ಸುದ್ದಿ ಮಿಸ್ ಮಾಡ್ಬೇಡಿ! ಏಪ್ರಿಲ್ 1ರಿಂದ ಹೊಸ ನಿಯಮಗಳು

ಪ್ಯಾನ್ ಕಾರ್ಡ್ ನಿಯಮಗಳಲ್ಲಿ ಮಹತ್ವದ ಬದಲಾವಣೆ

PAN Card Rules: ದೇಶದಲ್ಲಿ ಹಣಕಾಸು ವ್ಯವಹಾರಗಳನ್ನು ಹೆಚ್ಚು ಪಾರದರ್ಶಕಗೊಳಿಸಲು ಆದಾಯ ತೆರಿಗೆ ಇಲಾಖೆ PAN ಕಾರ್ಡ್ ಸಂಬಂಧಿತ ಹಲವು ಹೊಸ ನಿಯಮಗಳನ್ನು ಪರಿಚಯಿಸಿದೆ. ಈ ಹೊಸ ನಿಯಮಗಳು 2026ರ ಏಪ್ರಿಲ್ 1ರಿಂದ ಜಾರಿಗೆ ಬರಲಿವೆ. ಸಾಮಾನ್ಯ ನಾಗರಿಕರಿಂದ ವ್ಯಾಪಾರಸ್ಥರ ತನಕ ಎಲ್ಲರ ಮೇಲೂ ಇದರ ಪರಿಣಾಮ ಬೀಳುವ ಸಾಧ್ಯತೆ ಇದೆ.

ಪ್ರಸ್ತುತ ಕೇವಲ ಆಧಾರ್ ಕಾರ್ಡ್ ಮೂಲಕ ಸುಲಭವಾಗಿ PAN ಪಡೆಯುವ ವ್ಯವಸ್ಥೆ ಇದೆ. ಆದರೆ ಮಾರ್ಚ್ 31, 2026 ನಂತರ ಈ ಪ್ರಕ್ರಿಯೆಯಲ್ಲಿ ಬದಲಾವಣೆ ಆಗಲಿದೆ. ಹೊಸ PAN ಕಾರ್ಡ್‌ಗೆ ಅರ್ಜಿ ಸಲ್ಲಿಸುವವರು ಜನನ ಪ್ರಮಾಣಪತ್ರ, ಮತದಾರರ ಗುರುತಿನ ಚೀಟಿ, ಮೆಟ್ರಿಕ್ಯುಲೇಷನ್ ಪ್ರಮಾಣಪತ್ರ ಅಥವಾ ಪಾಸ್‌ಪೋರ್ಟ್ ಮುಂತಾದ ದಾಖಲೆಗಳನ್ನು ನೀಡಬೇಕಾಗುತ್ತದೆ.

ಪ್ಯಾನ್ ಕಾರ್ಡ್ ಅರ್ಜಿ ಪ್ರಕ್ರಿಯೆ ಬದಲಾಗಲಿದೆ

ಏಪ್ರಿಲ್ 1ರಿಂದ ಹಳೆಯ PAN ಅರ್ಜಿ ಫಾರ್ಮ್‌ಗಳು ಅಮಾನ್ಯವಾಗಲಿವೆ. ಹೊಸ ಫಾರ್ಮಾಟ್‌ನಲ್ಲೇ ಅರ್ಜಿ ಸಲ್ಲಿಸಬೇಕು. ಜೊತೆಗೆ PAN ಕಾರ್ಡ್‌ನಲ್ಲಿ ಇರುವ ಹೆಸರು ಈಗಿನಿಂದ ಸಂಪೂರ್ಣವಾಗಿ ಆಧಾರ್‌ನಲ್ಲಿ ಇರುವ ವಿವರಗಳ ಪ್ರಕಾರವೇ ಇರಬೇಕು. ಬೇರೆ ಹೆಸರುಗಳ ಗುರುತುಗಳನ್ನು ತೆಗೆದುಹಾಕಲಾಗುತ್ತದೆ.

ಇದರಿಂದ ಗುರುತು ಪರಿಶೀಲನೆ ಪ್ರಕ್ರಿಯೆ ಹೆಚ್ಚು ಸ್ಪಷ್ಟವಾಗಲಿದೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.

ಹಣಕಾಸು ವ್ಯವಹಾರಗಳಲ್ಲಿ ಹೊಸ ನಿಯಮ

ಹೊಸ ನಿಯಮಗಳ ಪ್ರಕಾರ ಹಲವು ಹಣಕಾಸು ವ್ಯವಹಾರಗಳಲ್ಲಿ PAN ಕಾರ್ಡ್ ಬಳಕೆಗೆ ಸಂಬಂಧಿಸಿದ ಮಿತಿಗಳಲ್ಲಿ ಬದಲಾವಣೆ ಮಾಡಲಾಗಿದೆ.

ಬ್ಯಾಂಕ್ ನಗದು ಠೇವಣಿ:

ಈಗ ಒಂದು ದಿನದಲ್ಲಿ ₹50,000 ಠೇವಣಿ ಮಾಡಿದರೆ PAN ನೀಡಬೇಕು. ಆದರೆ ಹೊಸ ನಿಯಮದ ಪ್ರಕಾರ ದಿನದ ಮಿತಿ ಬದಲು ವಾರ್ಷಿಕ ಮಿತಿ ಅನ್ವಯವಾಗುತ್ತದೆ. ಒಂದು ಆರ್ಥಿಕ ವರ್ಷದಲ್ಲಿ ಎಲ್ಲಾ ಬ್ಯಾಂಕ್ ಖಾತೆಗಳಲ್ಲಿ ಸೇರಿ ₹10 ಲಕ್ಷಕ್ಕಿಂತ ಹೆಚ್ಚು ಠೇವಣಿ ಮಾಡಿದರೆ PAN ಕಡ್ಡಾಯ.

ವಾಹನ ಖರೀದಿ – ಮಾರಾಟ:

ಇದುವರೆಗೆ ಯಾವುದೇ ವಾಹನ ಖರೀದಿಸಿದರೂ PAN ಕೇಳಲಾಗುತ್ತಿತ್ತು. ಹೊಸ ನಿಯಮದ ಪ್ರಕಾರ ವಾಹನದ ಬೆಲೆ ₹5 ಲಕ್ಷ ಮೀರಿದರೆ ಮಾತ್ರ PAN ಅಗತ್ಯ. ಇದರಿಂದ ಎರಡು ಚಕ್ರ ವಾಹನ ಖರೀದಿಸುವವರಿಗೆ ಸ್ವಲ್ಪ ಅನುಕೂಲವಾಗಲಿದೆ.

ಹೋಟೆಲ್ ಬಿಲ್ ಮತ್ತು ಆಸ್ತಿ ವ್ಯವಹಾರ

ಹೋಟೆಲ್ ಅಥವಾ ರೆಸ್ಟೋರೆಂಟ್‌ಗಳಲ್ಲಿ PAN ವಿವರ ನೀಡಬೇಕಾದ ಮಿತಿಯನ್ನು ₹50,000 ರಿಂದ ₹1 ಲಕ್ಷಕ್ಕೆ ಹೆಚ್ಚಿಸಲಾಗಿದೆ. ಅಂದರೆ ಒಂದು ಲಕ್ಷದೊಳಗಿನ ಬಿಲ್ಲಿಗೆ PAN ನೀಡುವ ಅಗತ್ಯ ಇರುವುದಿಲ್ಲ.

ಆಸ್ತಿ ಖರೀದಿ ಅಥವಾ ಮಾರಾಟದಲ್ಲಿ ಈಗಿನ ₹10 ಲಕ್ಷ ಮಿತಿಯನ್ನು ₹20 ಲಕ್ಷಕ್ಕೆ ಹೆಚ್ಚಿಸುವ ಪ್ರಸ್ತಾವನೆ ಇದೆ. 20 ಲಕ್ಷಕ್ಕಿಂತ ಹೆಚ್ಚು ಮೌಲ್ಯದ ವ್ಯವಹಾರಗಳಿಗೆ ಮಾತ್ರ PAN ಕಡ್ಡಾಯವಾಗಲಿದೆ.

ಈ ಬದಲಾವಣೆಗಳ ಹಿಂದಿನ ಉದ್ದೇಶ

ದೊಡ್ಡ ಮೊತ್ತದ ಹಣಕಾಸು ವ್ಯವಹಾರಗಳನ್ನು ಸುಲಭವಾಗಿ ಟ್ರ್ಯಾಕ್ ಮಾಡಲು ಕೇಂದ್ರ ಸರ್ಕಾರ ಈ ಕ್ರಮಗಳನ್ನು ಕೈಗೊಂಡಿದೆ. ಇವುಗಳಿಂದ ಆರ್ಥಿಕ ವ್ಯವಸ್ಥೆ ಹೆಚ್ಚು ಪಾರದರ್ಶಕವಾಗಲಿದೆ ಎಂದು ಆದಾಯ ತೆರಿಗೆ ಇಲಾಖೆ ಹೇಳಿದೆ.

ಆದ್ದರಿಂದ PAN ಕಾರ್ಡ್ ಪಡೆಯಬೇಕಾದವರು ಅಥವಾ ಯಾವುದೇ ತಿದ್ದುಪಡಿ ಮಾಡಬೇಕಾದವರು ಮಾರ್ಚ್ 31ರೊಳಗೆ ಪ್ರಕ್ರಿಯೆ ಪೂರ್ಣಗೊಳಿಸುವುದು ಉತ್ತಮ ಎಂದು ತಜ್ಞರು ಸಲಹೆ ನೀಡಿದ್ದಾರೆ. ಏಪ್ರಿಲ್ 1 ನಂತರ ಹೊಸ ನಿಯಮಗಳೊಂದಿಗೆ ಪ್ರಕ್ರಿಯೆ ಹೆಚ್ಚು ಕಟ್ಟುನಿಟ್ಟಾಗಲಿದೆ.