ಕೇವಲ 55 ರೂಪಾಯಿ ಕಟ್ಟಿದರೆ ಸಾಕು, ತಿಂಗಳಿಗೆ 3,000 ಪಿಂಚಣಿ! ನೇರ ಖಾತೆಗೆ ಹಣ

PM Shram Yogi Mandhan Pension Scheme: ವೃದ್ಧಾಪ್ಯದಲ್ಲಿ ಸ್ಥಿರ ಆದಾಯದ ಕೊರತೆ ಅಸಂಘಟಿತ ಕ್ಷೇತ್ರದಲ್ಲಿ ಕೆಲಸ ಮಾಡುವ ಲಕ್ಷಾಂತರ ಕಾರ್ಮಿಕರ ಪ್ರಮುಖ ಚಿಂತೆಯಾಗಿದೆ. ದಿನಗೂಲಿ ಕಾರ್ಮಿಕರು, ಬೀದಿ ವ್ಯಾಪಾರಿಗಳು, ರಿಕ್ಷಾ ಚಾಲಕರು, ಗೃಹ ಕಾರ್ಮಿಕರು ಹಾಗೂ ಸಣ್ಣ ವ್ಯಾಪಾರಿಗಳು ನಿವೃತ್ತಿಯ ನಂತರ ಜೀವನ ಸಾಗಿಸುವುದು ಕಷ್ಟವಾಗಬಹುದು. ಇಂತಹವರಿಗೆ ನೆರವಾಗಲು ಕೇಂದ್ರ ಸರ್ಕಾರ ಪ್ರಧಾನ ಮಂತ್ರಿ ಶ್ರಮ ಯೋಗಿ ಮಾನ್‌ಧನ್ (PM-SYM) ಯೋಜನೆಯನ್ನು ಜಾರಿಗೊಳಿಸಿದೆ.

2019ರಲ್ಲಿ ಆರಂಭವಾದ ಈ ಯೋಜನೆ ಅಸಂಘಟಿತ ವಲಯದ ಕಡಿಮೆ ಆದಾಯದ ಕಾರ್ಮಿಕರಿಗಾಗಿ ರೂಪಿಸಲಾಗಿದೆ. ಯೋಜನೆಗೆ ಸೇರಿಕೊಂಡ ಬಳಿಕ ಫಲಾನುಭವಿಗಳು ತಮ್ಮ ವಯಸ್ಸಿನ ಆಧಾರದ ಮೇಲೆ ಪ್ರತಿ ತಿಂಗಳು ನಿಗದಿತ ಮೊತ್ತವನ್ನು ಪಾವತಿಸಬೇಕು. ವಿಶೇಷವೆಂದರೆ, ಫಲಾನುಭವಿ ಪಾವತಿಸುವಷ್ಟೇ ಮೊತ್ತವನ್ನು ಕೇಂದ್ರ ಸರ್ಕಾರವೂ ತನ್ನ ಪಾಲಿನಿಂದ ಜಮೆ ಮಾಡುತ್ತದೆ.

ಈ ಯೋಜನೆಯ ಲಾಭ ಪಡೆಯಲು ಅರ್ಜಿದಾರರ ವಯಸ್ಸು 18 ರಿಂದ 40 ವರ್ಷಗಳ ನಡುವೆ ಇರಬೇಕು. ತಿಂಗಳ ಆದಾಯ ₹15,000 ಅಥವಾ ಅದಕ್ಕಿಂತ ಕಡಿಮೆ ಇರಬೇಕು. ಆದಾಯ ತೆರಿಗೆ ಪಾವತಿದಾರರು ಅಥವಾ EPFO, ESIC, NPS ಮುಂತಾದ ಇತರ ಸಾಮಾಜಿಕ ಭದ್ರತಾ ಯೋಜನೆಗಳ ಸದಸ್ಯರು ಈ ಯೋಜನೆಗೆ ಅರ್ಹರಾಗಿರುವುದಿಲ್ಲ.

ಯೋಜನೆಯಡಿ ಪಾವತಿಸಬೇಕಾದ ಮೊತ್ತ ವಯಸ್ಸಿನ ಮೇಲೆ ಅವಲಂಬಿತವಾಗಿರುತ್ತದೆ. 18ನೇ ವಯಸ್ಸಿನಲ್ಲಿ ಸೇರಿಕೊಳ್ಳುವವರು ತಿಂಗಳಿಗೆ ಕೇವಲ ₹55 ಪಾವತಿಸಿದರೆ ಸಾಕು. 40ನೇ ವಯಸ್ಸಿನಲ್ಲಿ ಸೇರುವವರು ತಿಂಗಳಿಗೆ ₹200ವರೆಗೆ ಪಾವತಿಸಬೇಕಾಗುತ್ತದೆ. ಉದಾಹರಣೆಗೆ, ಫಲಾನುಭವಿ ತಿಂಗಳಿಗೆ ₹100 ಪಾವತಿಸಿದರೆ ಸರ್ಕಾರವೂ ಅದೇ ಪ್ರಮಾಣದ ₹100 ಸೇರಿಸುತ್ತದೆ.

60 ವರ್ಷ ವಯಸ್ಸು ಪೂರ್ಣಗೊಂಡ ನಂತರ ಫಲಾನುಭವಿಗೆ ಪ್ರತಿ ತಿಂಗಳು ಕನಿಷ್ಠ ₹3,000 ಪಿಂಚಣಿ ದೊರೆಯುತ್ತದೆ. ಇದು ನಿವೃತ್ತಿಯ ನಂತರದ ಜೀವನಕ್ಕೆ ಒಂದು ಭದ್ರ ಆದಾಯ ಮೂಲವಾಗಬಹುದು. ಪತಿ ಮತ್ತು ಪತ್ನಿ ಇಬ್ಬರೂ ಪ್ರತ್ಯೇಕವಾಗಿ ಯೋಜನೆಗೆ ಸೇರಿದ್ದರೆ, ಇಬ್ಬರಿಗೂ ಪ್ರತ್ಯೇಕ ಪಿಂಚಣಿ ದೊರೆಯುತ್ತದೆ. ಹೀಗಾಗಿ ಕುಟುಂಬಕ್ಕೆ ತಿಂಗಳಿಗೆ ₹6,000ವರೆಗೆ ಪಿಂಚಣಿ ಆದಾಯ ಬರಬಹುದು.

ಯೋಜನೆಗೆ ಸೇರುವುದು ಸಹ ಸುಲಭವಾಗಿದೆ. ಸಮೀಪದ ಕಾಮನ್ ಸರ್ವೀಸ್ ಸೆಂಟರ್ (CSC)ಗೆ ಭೇಟಿ ನೀಡಿ ಆಧಾರ್ ಕಾರ್ಡ್ ಮತ್ತು ಬ್ಯಾಂಕ್ ಖಾತೆ ವಿವರಗಳನ್ನು ಸಲ್ಲಿಸಿದರೆ ನೋಂದಣಿ ಮಾಡಿಕೊಳ್ಳಬಹುದು. ಆಟೋ ಡೆಬಿಟ್ ಸೌಲಭ್ಯವೂ ಲಭ್ಯವಿದ್ದು, ಪ್ರತಿ ತಿಂಗಳು ಹಣ ಸ್ವಯಂಚಾಲಿತವಾಗಿ ಕಡಿತಗೊಳ್ಳುತ್ತದೆ.

ಇನ್ನೊಂದು ಪ್ರಮುಖ ಅಂಶವೆಂದರೆ, ಪಿಂಚಣಿ ಆರಂಭವಾದ ನಂತರ ಫಲಾನುಭವಿ ಮೃತಪಟ್ಟರೆ, ಅವರ ಜೀವನ ಸಂಗಾತಿಗೆ ಕುಟುಂಬ ಪಿಂಚಣಿ ನೀಡಲಾಗುತ್ತದೆ. ಸಾಮಾನ್ಯ ಪಿಂಚಣಿಯ ಶೇ.50ರಷ್ಟು ಮೊತ್ತ ಕುಟುಂಬ ಪಿಂಚಣಿಯಾಗಿ ಸಿಗಲಿದೆ.