ದಿನಕ್ಕೆ 7 ಲೀಟರ್ ಹಾಲು ಕೊಡುವ ಮೇಕೆ! ಭಾರತಕ್ಕೆ ಬಂತು ‘ಮಿಲ್ಕ್ ಕ್ವೀನ್’

ಕಾಶ್ಮೀರಕ್ಕೆ ಬಂದ ‘ಮಿಲ್ಕ್ ಕ್ವೀನ್’ ಸಾನೆನ್ ಮೇಕೆ

ಜಮ್ಮು-ಕಾಶ್ಮೀರದ ಪಶುಸಂಗೋಪನೆ ಕ್ಷೇತ್ರದಲ್ಲಿ ಹೊಸ ಅಧ್ಯಾಯ ಆರಂಭವಾಗುವ ಲಕ್ಷಣಗಳು ಕಾಣಿಸುತ್ತಿವೆ. ಸ್ವಿಟ್ಜರ್‌ಲ್ಯಾಂಡ್ ಮೂಲದ ವಿಶ್ವಪ್ರಸಿದ್ಧ ಸಾನೆನ್ (Saanen) ಮೇಕೆ ಜಾತಿ ಮೊದಲ ಬಾರಿಗೆ ಕಾಶ್ಮೀರಕ್ಕೆ ತರಲಾಗಿದ್ದು, ರೈತರಿಗೆ ಹೊಸ ಆದಾಯದ ದಾರಿಯನ್ನು ತೆರೆದಿಡಲಿದೆ ಎಂಬ ನಿರೀಕ್ಷೆ ಇದೆ.

ಈ ಮೇಕೆ ಜಾತಿಯನ್ನು ಜಗತ್ತಿನಾದ್ಯಂತ “ಮಿಲ್ಕ್ ಕ್ವೀನ್” ಎಂದು ಕರೆಯಲಾಗುತ್ತದೆ. ಸಾಮಾನ್ಯವಾಗಿ ಒಂದು ಮೇಕೆ ದಿನಕ್ಕೆ 1 ರಿಂದ 2 ಲೀಟರ್ ಹಾಲು ಕೊಟ್ಟರೆ, ಸಾನೆನ್ ಮೇಕೆ ದಿನಕ್ಕೆ ಸರಾಸರಿ 5 ರಿಂದ 7 ಲೀಟರ್ ಹಾಲು ಕೊಡುವ ಸಾಮರ್ಥ್ಯ ಹೊಂದಿದೆ. ಹೀಗಾಗಿ ಹಾಲಿನ ಉತ್ಪಾದನೆ ಹೆಚ್ಚಿಸಲು ಇದು ಅತ್ಯಂತ ಲಾಭದಾಯಕ ಜಾತಿಯೆಂದು ಪರಿಣಿತರು ಹೇಳುತ್ತಾರೆ.

ರೈತರ ಆದಾಯ ಹೆಚ್ಚಿಸುವ ನಿರೀಕ್ಷೆ

ಜಮ್ಮು-ಕಾಶ್ಮೀರ ಸರ್ಕಾರವು ಮೊದಲ ಬಾರಿಗೆ ಈ ವಿದೇಶಿ ಜಾತಿಯನ್ನು ತನ್ನ ಪಶುಸಂಗೋಪನಾ ಯೋಜನೆಗಳಲ್ಲಿ ಸೇರಿಸಿದೆ. ಈ ಮೇಕೆಗಳ ಮೂಲಕ ರಾಜ್ಯದಲ್ಲಿ ಹಾಲು ಉತ್ಪಾದನೆ ಹೆಚ್ಚಿಸಿ, ರೈತರ ಆದಾಯವನ್ನು ದ್ವಿಗುಣಗೊಳಿಸುವುದು ಸರ್ಕಾರದ ಮುಖ್ಯ ಉದ್ದೇಶವಾಗಿದೆ.

ಕಾಶ್ಮೀರದ ಚಳಿಗಾಲದ ಹವಾಮಾನ ಸ್ವಿಟ್ಜರ್‌ಲ್ಯಾಂಡ್‌ನ ಪರಿಸರಕ್ಕೆ ಹೋಲಿಕೆಯಾಗಿರುವುದರಿಂದ, ಈ ಮೇಕೆಗಳು ಇಲ್ಲಿ ಸುಲಭವಾಗಿ ಹೊಂದಿಕೊಳ್ಳುತ್ತವೆ ಎಂದು ತಜ್ಞರು ಹೇಳುತ್ತಿದ್ದಾರೆ. ಇದರಿಂದ ಡೈರಿ ಮತ್ತು ಪಶುಸಂಗೋಪನೆ ಕ್ಷೇತ್ರದಲ್ಲಿ ಹೊಸ ಅವಕಾಶಗಳು ಸೃಷ್ಟಿಯಾಗುವ ಸಾಧ್ಯತೆ ಇದೆ.

ಅಭಿವೃದ್ಧಿ ಯೋಜನೆ

ಪಶುಸಂಗೋಪನಾ ಇಲಾಖೆ ಈ ಮೇಕೆಗಳನ್ನು ವಿದೇಶದಿಂದ ತರಿಸಿ, ಸ್ಥಳೀಯ ಪರಿಸರಕ್ಕೆ ಅವು ಹೇಗೆ ಹೊಂದಿಕೊಳ್ಳುತ್ತವೆ ಎಂಬುದರ ಬಗ್ಗೆ ಅಧ್ಯಯನ ನಡೆಸುತ್ತಿದೆ. ಯೋಜನೆ ಯಶಸ್ವಿಯಾದರೆ, ಸ್ಥಳೀಯ ಮೇಕೆಗಳ ಜೊತೆ ಸಂಕರ ಜಾತಿ (Cross-breeding) ಮಾಡಿ ಹೆಚ್ಚಿನ ಹಾಲು ನೀಡುವ ಹೊಸ ಜಾತಿಗಳನ್ನು ಅಭಿವೃದ್ಧಿಪಡಿಸುವ ಯೋಚನೆಯೂ ಇದೆ.

ಗ್ರಾಮೀಣ ಪ್ರದೇಶಗಳಲ್ಲಿ ಕೃಷಿಯ ಜೊತೆಗೆ ಪಶುಸಂಗೋಪನೆ ಪ್ರಮುಖ ಜೀವನೋಪಾಯವಾಗಿದೆ. ಈ ಹಿನ್ನೆಲೆಯಲ್ಲಿ ಸಾನೆನ್ ಮೇಕೆಗಳ ಆಗಮನದಿಂದ ಗ್ರಾಮೀಣ ಆರ್ಥಿಕತೆಗೆ ಬಲ ಸಿಗುವ ಜೊತೆಗೆ ಉದ್ಯೋಗ ಅವಕಾಶಗಳೂ ಹೆಚ್ಚಾಗಬಹುದು ಎಂದು ತಜ್ಞರು ಅಭಿಪ್ರಾಯಪಡುತ್ತಾರೆ.

ಇಲ್ಲಿಯವರೆಗೆ “ಬಡವರ ಹಸು” ಎಂದು ಕರೆಯಲ್ಪಡುವ ಮೇಕೆ ಸಾಕಾಣಿಕೆ, ಇದೀಗ ಈ ಹೊಸ ಜಾತಿಯ ಮೂಲಕ ರೈತರಿಗೆ ಹೆಚ್ಚಿನ ಆದಾಯ ತರುವ ಅವಕಾಶ ಒದಗಿಸಲಿದೆ. ಸರಿಯಾದ ನಿರ್ವಹಣೆ ಮತ್ತು ತಂತ್ರಜ್ಞಾನ ಬಳಕೆ ಮಾಡಿದರೆ, ಈ ಸಾನೆನ್ ಮೇಕೆಗಳು ಕಾಶ್ಮೀರ ರೈತರಿಗೆ ನಿಜವಾದ ಆರ್ಥಿಕ ಬಲವಾಗಿ ಪರಿಣಮಿಸಬಹುದು.