ಮೇಕೆ ಸಾಕಾಣಿಕೆಗೂ ಮೀರಿದ ಲಾಭ ಕೊಡ್ತಿದೆ ಈ ಟರ್ಕಿ ಕೋಳಿ ಸಾಕಾಣಿಕೆ! ಕಡಿಮೆ ಹೂಡಿಕೆ, ಹೆಚ್ಚು ಆದಾಯ

Turkey Farming: ಇತ್ತೀಚಿನ ದಿನಗಳಲ್ಲಿ ರೈತರು ಸಂಪ್ರದಾಯಿಕ ಬೆಳೆಗಳಿಗೆ ಮಾತ್ರ ಸೀಮಿತವಾಗದೆ ಹೊಸ ಉದ್ಯಮಗಳತ್ತ ಮುಖ ಮಾಡುತ್ತಿದ್ದಾರೆ. ಅದರಲ್ಲೂ ಟರ್ಕಿ ಕೋಳಿ ಸಾಕಣೆ ಗ್ರಾಮೀಣ ಭಾಗದಲ್ಲಿ ವೇಗವಾಗಿ ಜನಪ್ರಿಯವಾಗುತ್ತಿದೆ. ಕಡಿಮೆ ಜಾಗ, ಕಡಿಮೆ ಖರ್ಚು ಮತ್ತು ಕಡಿಮೆ ಶ್ರಮದಲ್ಲಿ ಉತ್ತಮ ಆದಾಯ ಸಿಗುತ್ತಿರುವುದರಿಂದ ಯುವ ರೈತರು ಈ ಉದ್ಯಮವನ್ನು ಆಸಕ್ತಿಯಿಂದ ಆರಂಭಿಸುತ್ತಿದ್ದಾರೆ.

ಶಿವಮೊಗ್ಗ ಜಿಲ್ಲೆಯ ಹೊಸನಗರ ತಾಲೂಕಿನ ಹರೀಶ್ ಗೌಡ ಎಂಬ ಯುವ ರೈತ ಮೊದಲಿಗೆ ಕುರಿ ಸಾಕಣೆ ಮಾಡುತ್ತಿದ್ದರು. ನಂತರ ಪ್ರಯೋಗಾತ್ಮಕವಾಗಿ ಟರ್ಕಿ ಕೋಳಿಗಳನ್ನು ಸಾಕಲು ಆರಂಭಿಸಿದರು. ಆರಂಭದಲ್ಲಿ ಕೇವಲ 12 ಕೋಳಿಗಳಿಂದ ಶುರು ಮಾಡಿದ ಅವರು ಈಗ ಉತ್ತಮ ಆದಾಯ ಗಳಿಸುತ್ತಿದ್ದಾರೆ. ಅವರ ಅನುಭವ ನೋಡಿದ ಸ್ಥಳೀಯ ರೈತರೂ ಈ ಉದ್ಯಮದ ಕಡೆ ಗಮನ ಹರಿಸುತ್ತಿದ್ದಾರೆ.

ಸಾಮಾನ್ಯ ಕೋಳಿಗಳಿಗಿಂತ ಟರ್ಕಿ ಕೋಳಿಗಳ ತೂಕ ಬಹಳ ಹೆಚ್ಚು ಇರುತ್ತದೆ. ಸರಿಯಾದ ಆಹಾರ ನೀಡಿದರೆ ಒಂದು ಟರ್ಕಿ ಕೋಳಿ ಸುಲಭವಾಗಿ 10 ರಿಂದ 13 ಕೆಜಿ ತೂಕ ಪಡೆಯುತ್ತದೆ. ಹೀಗಾಗಿ ಮಾರುಕಟ್ಟೆಯಲ್ಲಿ ಒಂದೇ ಕೋಳಿಗೆ ಸಾವಿರಾರು ರೂಪಾಯಿ ಬೆಲೆ ಸಿಗುತ್ತದೆ. ಜೀವಂತ ಟರ್ಕಿ ಕೋಳಿಗೆ ₹4,000 ರಿಂದ ₹6,000 ವರೆಗೆ ಬೆಲೆ ದೊರೆಯುತ್ತಿರುವುದು ರೈತರ ಉತ್ಸಾಹ ಹೆಚ್ಚಿಸಿದೆ.

ಇದಲ್ಲದೆ ಈ ಕೋಳಿಗಳಿಗೆ ಸಾಮಾನ್ಯ ರೋಗಗಳು ಕಡಿಮೆ ಕಾಣಿಸಿಕೊಳ್ಳುತ್ತವೆ. ಹಸಿರು ಮೇವು, ಧಾನ್ಯ ಮತ್ತು ಎಲೆಗಳನ್ನು ತಿನ್ನುತ್ತಲೇ ಆರೋಗ್ಯಕರವಾಗಿ ಬೆಳೆಯುತ್ತವೆ. ಇದರಿಂದ ಆಹಾರ ವೆಚ್ಚವೂ ಕಡಿಮೆಯಾಗುತ್ತದೆ. ಕಡಿಮೆ ಹೂಡಿಕೆಯಲ್ಲಿ ವೇಗವಾಗಿ ಲಾಭ ನೀಡುವ ಉದ್ಯಮವಾಗಿರುವುದರಿಂದ ಇದನ್ನು ಅನೇಕರು “ಗ್ರಾಮೀಣ ಸ್ಟಾರ್ಟ್‌ಅಪ್” ಎಂದೇ ಕರೆಯುತ್ತಿದ್ದಾರೆ.

ನಗರ ಪ್ರದೇಶಗಳ ಹೋಟೆಲ್‌ಗಳು ಮತ್ತು ಜಿಮ್‌ಗೆ ಹೋಗುವ ಯುವಕರಲ್ಲಿ ಟರ್ಕಿ ಮಾಂಸಕ್ಕೆ ಬೇಡಿಕೆ ಹೆಚ್ಚಾಗಿದೆ. ಕಡಿಮೆ ಕೊಲೆಸ್ಟ್ರಾಲ್ ಮತ್ತು ಹೆಚ್ಚಿನ ಪ್ರೋಟೀನ್ ಇರುವ ಕಾರಣ ಆರೋಗ್ಯ ಕಾಳಜಿ ಇರುವವರು ಇದನ್ನು ಹೆಚ್ಚು ಆಯ್ಕೆ ಮಾಡುತ್ತಿದ್ದಾರೆ. ಇದರ ಪರಿಣಾಮವಾಗಿ ರೈತರಿಗೆ ಸ್ಥಳೀಯ ಮಾರುಕಟ್ಟೆಯಲ್ಲೇ ಉತ್ತಮ ಗ್ರಾಹಕರು ಸಿಗುತ್ತಿದ್ದಾರೆ.

ಸರಿಯಾದ ಯೋಜನೆ ಮಾಡಿಕೊಂಡು ಟರ್ಕಿ ಕೋಳಿ ಸಾಕಣೆ ಆರಂಭಿಸಿದರೆ ಕೆಲವೇ ತಿಂಗಳಲ್ಲಿ ಉತ್ತಮ ಆದಾಯ ಗಳಿಸಬಹುದು ಎಂದು ಕೃಷಿ ತಜ್ಞರು ಹೇಳುತ್ತಿದ್ದಾರೆ. ಗ್ರಾಮೀಣ ಯುವಕರಿಗೆ ಇದು ಉತ್ತಮ ಸ್ವಯಂ ಉದ್ಯೋಗದ ಅವಕಾಶವಾಗಿಯೂ ರೂಪುಗೊಳ್ಳುತ್ತಿದೆ.