ಎಟಿಎಂನಲ್ಲಿ ಡೆಬಿಟ್ ಕಾರ್ಡ್ ಸಿಲುಕಿದರೆ ಏನು ಮಾಡಬೇಕು? ಈ ಸರಳ ಕ್ರಮ ಗೊತ್ತಿದ್ದರೆ ಟೆನ್ಷನ್ ಬೇಡ

Debit Card: ಹಣ ತೆಗೆಯಲು ಎಟಿಎಂಗೆ ಹೋದಾಗ ಕೆಲವೊಮ್ಮೆ ಅನಿರೀಕ್ಷಿತ ಸಮಸ್ಯೆಗಳು ಎದುರಾಗಬಹುದು. ವಿಶೇಷವಾಗಿ ಹಣ ತೆಗೆಯುವ ಪ್ರಕ್ರಿಯೆಯ ಮಧ್ಯೆ ಡೆಬಿಟ್ ಕಾರ್ಡ್ ಯಂತ್ರದೊಳಗೆ ಸಿಲುಕುವುದು ಹಲವು ಜನರಿಗೆ ಆತಂಕ ಉಂಟುಮಾಡುವ ಘಟನೆ. ಆ ಕ್ಷಣದಲ್ಲಿ ಏನು ಮಾಡಬೇಕು ಎಂಬುದು ಅರ್ಥವಾಗದೆ ಹಲವರು ಗಾಬರಿಯಾಗುತ್ತಾರೆ.

ಆದರೆ ಇಂತಹ ಸಂದರ್ಭಗಳಲ್ಲಿ ಮೊದಲಿಗೆ ಶಾಂತವಾಗಿರುವುದು ಮುಖ್ಯ. ಸಾಮಾನ್ಯವಾಗಿ ತಾಂತ್ರಿಕ ದೋಷ, ನೆಟ್‌ವರ್ಕ್ ಸಮಸ್ಯೆ, ವಿದ್ಯುತ್ ವ್ಯತ್ಯಯ ಅಥವಾ ತಪ್ಪು PIN ಅನ್ನು ಹಲವಾರು ಬಾರಿ ನಮೂದಿಸುವುದು ಮುಂತಾದ ಕಾರಣಗಳಿಂದ ATM ಯಂತ್ರ ಕಾರ್ಡ್ ಅನ್ನು ಒಳಗೇ ಹಿಡಿದುಕೊಳ್ಳಬಹುದು. ಇದು ಭದ್ರತಾ ಕ್ರಮದ ಭಾಗವಾಗಿರುತ್ತದೆ.

ಕಾರ್ಡ್ ಯಂತ್ರದಲ್ಲಿ ಸಿಲುಕಿದರೆ ಮೊದಲನೆಯದಾಗಿ ನಿಮ್ಮ ಬ್ಯಾಂಕ್ ಕಸ್ಟಮರ್ ಕೇರ್‌ಗೆ ಕರೆ ಮಾಡಿ. ATM ಯಂತ್ರದ ಸ್ಥಳ, ಸಮಯ ಹಾಗೂ ATM ಸಂಖ್ಯೆ ಇದ್ದರೆ ಅದನ್ನೂ ತಿಳಿಸುವುದು ಉತ್ತಮ. ಇದರಿಂದ ಬ್ಯಾಂಕ್ ಸಿಬ್ಬಂದಿಗೆ ಸಮಸ್ಯೆ ಗುರುತಿಸಲು ಸುಲಭವಾಗುತ್ತದೆ.

ಬ್ಯಾಂಕ್ ಸಿಬ್ಬಂದಿಯೊಂದಿಗೆ ಮಾತನಾಡುವಾಗ ನಿಮ್ಮ ಡೆಬಿಟ್ ಕಾರ್ಡ್ ಅನ್ನು ತಕ್ಷಣ ಬ್ಲಾಕ್ ಅಥವಾ ಹಾಟ್‌ಲಿಸ್ಟ್ ಮಾಡುವ ಅವಕಾಶವೂ ಇದೆ. ಹೀಗೆ ಮಾಡಿದರೆ ನಿಮ್ಮ ಖಾತೆಯಿಂದ ಯಾವುದೇ ವಹಿವಾಟು ನಡೆಯುವುದನ್ನು ತಡೆಯಬಹುದು. ಇದು ನಿಮ್ಮ ಹಣದ ಸುರಕ್ಷತೆಯನ್ನು ಖಚಿತಪಡಿಸುತ್ತದೆ.

ಸಾಮಾನ್ಯವಾಗಿ ಬ್ಯಾಂಕ್ ಎರಡು ಆಯ್ಕೆಗಳು ನೀಡುತ್ತದೆ. ಮೊದಲ ಆಯ್ಕೆ ಎಂದರೆ ಕಾರ್ಡ್ ರದ್ದು ಮಾಡಿ ಹೊಸ ಕಾರ್ಡ್‌ಗೆ ಅರ್ಜಿ ಹಾಕುವುದು. ಇದನ್ನು ಮಾಡಿದರೆ ಸುಮಾರು 7 ರಿಂದ 10 ದಿನಗಳೊಳಗೆ ಹೊಸ ಡೆಬಿಟ್ ಕಾರ್ಡ್ ನಿಮ್ಮ ವಿಳಾಸಕ್ಕೆ ತಲುಪುತ್ತದೆ.

ಮತ್ತೊಂದು ಆಯ್ಕೆ ಎಂದರೆ ಸಿಲುಕಿದ ಕಾರ್ಡ್ ಅನ್ನು ಮರಳಿ ಪಡೆಯುವುದು. ನಿಮ್ಮದೇ ಬ್ಯಾಂಕ್ ATM ನಲ್ಲಿ ಕಾರ್ಡ್ ಸಿಲುಕಿದರೆ ಅದನ್ನು ಮರಳಿ ಪಡೆಯುವುದು ಸುಲಭವಾಗಿರುತ್ತದೆ. ಆದರೆ ಬೇರೆ ಬ್ಯಾಂಕ್ ATM ಆಗಿದ್ದರೆ ಪ್ರಕ್ರಿಯೆಗೆ ಸ್ವಲ್ಪ ಸಮಯ ಬೇಕಾಗಬಹುದು.

ಸಾಮಾನ್ಯವಾಗಿ ATM ನಿರ್ವಹಣಾ ತಂಡ ಯಂತ್ರದಿಂದ ಕಾರ್ಡ್ ತೆಗೆದು ಸಂಬಂಧಿತ ಬ್ಯಾಂಕ್‌ಗೆ ಕಳುಹಿಸುತ್ತದೆ. ನಂತರ ಬ್ಯಾಂಕ್ ಗ್ರಾಹಕರಿಗೆ ಮಾಹಿತಿ ನೀಡುತ್ತದೆ. ಕೆಲವು ಸಂದರ್ಭಗಳಲ್ಲಿ ಗ್ರಾಹಕರು ಗುರುತಿನ ದಾಖಲೆ ತೋರಿಸಿ ಬ್ಯಾಂಕ್ ಶಾಖೆಗೆ ಭೇಟಿ ನೀಡಿ ಕಾರ್ಡ್ ಪಡೆದುಕೊಳ್ಳಬೇಕು.

ಹೀಗಾಗಿ ATM ನಲ್ಲಿ ಕಾರ್ಡ್ ಸಿಲುಕಿದಾಗ ಆತಂಕಪಡುವ ಬದಲು ತಕ್ಷಣ ಬ್ಯಾಂಕ್‌ಗೆ ಮಾಹಿತಿ ನೀಡುವುದು ಮತ್ತು ಅಗತ್ಯ ಸುರಕ್ಷತಾ ಕ್ರಮಗಳನ್ನು ಕೈಗೊಳ್ಳುವುದು ಅತ್ಯಂತ ಮುಖ್ಯ.