Rental Agreement: 11 ತಿಂಗಳ ರೆಂಟಲ್ ಅಗ್ರಿಮೆಂಟ್ ಹಿಂದಿರುವ ಕಾನೂನು ಕಾರಣ ತಿಳಿಯಿರಿ!

• 11 ತಿಂಗಳ ರೆಂಟಲ್ ಅಗ್ರಿಮೆಂಟ್ ಹಿಂದೆ ಕಾನೂನು ಕಾರಣ
• ರೆಂಟಲ್ ಅಗ್ರಿಮೆಂಟ್ ನಿಯಮಗಳು ತಿಳಿದರೆ ವಿವಾದ ಕಡಿಮೆ
• ಬಾಡಿಗೆ ಒಪ್ಪಂದ ಸೈನ್ ಮಾಡೋ ಮುಂಚೆ ಅರ್ಥ ಮಾಡಿಕೊಳ್ಳಿ

Rental Agreement: ಇಂದು ಸಣ್ಣ ಪಟ್ಟಣದಿಂದ ಮೆಟ್ರೋ ನಗರಗಳವರೆಗೆ ಬಾಡಿಗೆ ಮನೆಗಳ (Rent House) ಬೇಡಿಕೆ ಹೆಚ್ಚಾಗಿದೆ. ಈ ಹಿನ್ನೆಲೆಯಲ್ಲಿ ಮನೆ ಯಜಮಾನ ಮತ್ತು ಬಾಡಿಗೆದಾರರ ನಡುವೆ ಸ್ಪಷ್ಟತೆ ಇರಲು ರೆಂಟಲ್ ಅಗ್ರಿಮೆಂಟ್ ಅತ್ಯಗತ್ಯ ದಾಖಲೆ ಆಗಿದೆ. ಇದು ಕೇವಲ ಒಂದು ಕಾಗದವಲ್ಲ, ಇಬ್ಬರ ಹಕ್ಕು–ಬಾಧ್ಯತೆಗಳನ್ನು ನಿಶ್ಚಿತಗೊಳಿಸುವ ಒಪ್ಪಂದವಾಗಿದೆ.

ಹೆಚ್ಚು ಜನರಿಗೆ ಕುತೂಹಲ ಹುಟ್ಟಿಸುವ ವಿಷಯವೆಂದರೆ, ಯಾಕೆ ಹೆಚ್ಚಿನ ಬಾಡಿಗೆ ಒಪ್ಪಂದಗಳು 11 ತಿಂಗಳಿಗಷ್ಟೇ ಸೀಮಿತವಾಗಿವೆ? ಇದರ ಹಿಂದೆ ಮುಖ್ಯವಾಗಿ ಕಾನೂನು ಅಂಶವಿದೆ.

ಒಂದು ವರ್ಷ ಅಥವಾ 12 ತಿಂಗಳಿಗಿಂತ ಹೆಚ್ಚು ಅವಧಿಯ ಲೀಸ್ ಒಪ್ಪಂದವನ್ನು ಕಡ್ಡಾಯವಾಗಿ ರಿಜಿಸ್ಟರ್ ಮಾಡಬೇಕು. ಆದರೆ 11 ತಿಂಗಳಿಗಿಂತ ಕಡಿಮೆ ಅವಧಿಗೆ ರಿಜಿಸ್ಟ್ರೇಶನ್ ಅಗತ್ಯವಿಲ್ಲ. ಹೀಗಾಗಿ ಸ್ಟಾಂಪ್ ಡ್ಯೂಟಿ ಮತ್ತು ನೋಂದಣಿ ವೆಚ್ಚವನ್ನು ತಪ್ಪಿಸಲು ಯಜಮಾನರು 11 ತಿಂಗಳ ಆಯ್ಕೆಯನ್ನು ಇಷ್ಟಪಡುತ್ತಾರೆ.

ಇನ್ನೊಂದು ಪ್ರಮುಖ ಕಾರಣ ಆರ್ಥಿಕ ಹಾಗೂ ಸೌಕರ್ಯ. ಪ್ರತಿ 11 ತಿಂಗಳಿಗೊಮ್ಮೆ ಹೊಸ ಒಪ್ಪಂದ ಮಾಡಿಕೊಳ್ಳಲು ಅವಕಾಶ ಇರುವುದರಿಂದ ಬಾಡಿಗೆ ಹೆಚ್ಚಿಸುವುದು ಯಜಮಾನರಿಗೆ ಸುಲಭವಾಗುತ್ತದೆ. ಅದೇ ಸಮಯದಲ್ಲಿ ಬಾಡಿಗೆದಾರರಿಗೂ ಅಗತ್ಯವಿದ್ದರೆ ಮನೆ ಬದಲಾಯಿಸಲು ಸ್ವಲ್ಪ ಸ್ವಾತಂತ್ರ್ಯ ಸಿಗುತ್ತದೆ. ದೀರ್ಘಾವಧಿಯ ಬದ್ಧತೆ ಇಲ್ಲದಿರುವುದು ಎರಡೂ ಪಕ್ಷಗಳಿಗೆ ಸಹಾಯಕವಾಗುತ್ತದೆ.

ಆದರೆ ಒಪ್ಪಂದಕ್ಕೆ ಸಹಿ ಮಾಡುವ ಮೊದಲು ಕೆಲವು ವಿಷಯಗಳನ್ನು ಪರಿಶೀಲಿಸುವುದು ಅನಿವಾರ್ಯ. ಮೊದಲನೆಯದಾಗಿ ಬಾಡಿಗೆ ಮೊತ್ತ ಸ್ಪಷ್ಟವಾಗಿರಬೇಕು. ಪಾವತಿ ದಿನಾಂಕ, ತಡವಾದರೆ ದಂಡ, ಮೆಂಟೈನನ್ಸ್ ಮತ್ತು ಪಾರ್ಕಿಂಗ್ ಶುಲ್ಕ ಒಳಗೊಂಡಿದೆಯೇ ಎಂಬುದನ್ನು ಖಚಿತಪಡಿಸಿಕೊಳ್ಳಬೇಕು.

ಬಾಡಿಗೆ ಹೆಚ್ಚಳದ ಷರತ್ತುಗಳನ್ನು ಕೂಡ ಗಮನಿಸಬೇಕು. ಎಷ್ಟು ಶೇಕಡಾ ಹೆಚ್ಚಳ, ಯಾವ ಅವಧಿಯಲ್ಲಿ ಜಾರಿಯಾಗುತ್ತದೆ ಎಂಬ ವಿವರ ಒಪ್ಪಂದದಲ್ಲಿ ಇರಬೇಕು.

ನೋಟಿಸ್ ಪೀರಿಯಡ್ ಹಾಗೂ ಲಾಕ್-ಇನ್ ಅವಧಿಯ ಮಾಹಿತಿ ಸ್ಪಷ್ಟವಾಗಿರಬೇಕು. ಮನೆ ಖಾಲಿ ಮಾಡುವ ಮುನ್ನ ಎಷ್ಟು ದಿನಗಳ ಮುಂಚಿತವಾಗಿ ತಿಳಿಸಬೇಕು? ಯಜಮಾನ ಕೂಡ ಅದೇ ನಿಯಮ ಪಾಲಿಸಬೇಕೇ? ಇವು ವಿವಾದ ತಪ್ಪಿಸಲು ಮುಖ್ಯ.

ಮನೆ ಬಳಕೆಯ ನಿರ್ಬಂಧಗಳು, ಪೆಟ್ ಪ್ರಾಣಿಗಳ ಅನುಮತಿ, ಪಾರ್ಕಿಂಗ್ ನಿಯಮಗಳು ಮುಂತಾದ ಅಂಶಗಳು ಸ್ಪಷ್ಟವಾಗಿರಬೇಕು.

ಅತ್ಯಂತ ಮುಖ್ಯವಾದುದು ಸೆಕ್ಯೂರಿಟಿ ಡಿಪಾಜಿಟ್. ಎಷ್ಟು ಮೊತ್ತ? ಯಾವಾಗ ಮತ್ತು ಹೇಗೆ ಮರಳಿಸಲಾಗುತ್ತದೆ? ಈ ಪ್ರಶ್ನೆಗಳಿಗೆ ಸ್ಪಷ್ಟ ಉತ್ತರ ಒಪ್ಪಂದದಲ್ಲಿ ಇರಲೇಬೇಕು. ಬಹುತೇಕ ವಿವಾದಗಳು ಇದೇ ವಿಷಯದ ಮೇಲೆ ಉಂಟಾಗುತ್ತವೆ.

ಒಟ್ಟಾರೆ, 11 ತಿಂಗಳ ರೆಂಟಲ್ ಅಗ್ರಿಮೆಂಟ್ ಯಜಮಾನ–ಬಾಡಿಗೆದಾರರಿಬ್ಬರಿಗೂ ಕಾನೂನು ಮತ್ತು ಖರ್ಚಿನ ದೃಷ್ಟಿಯಿಂದ ಅನುಕೂಲಕರ ಆಯ್ಕೆ. ಆದರೆ ಸಹಿ ಮಾಡುವ ಮೊದಲು ಪ್ರತಿಯೊಂದು ಅಂಶವನ್ನೂ ಜಾಗರೂಕವಾಗಿ ಓದುವುದು ಉತ್ತಮ.