ಜಾರ್ಖಂಡ್‌ನಲ್ಲಿ ಮತ್ತೆ ಹಕ್ಕಿಜ್ವರ ಭೀತಿ; 4 ಸಾವಿರ ಕೋಳಿ, ಬಾತುಕೋಳಿಗಳ ಹತ್ಯೆಗೆ ಮುಂದಾದ ಅಧಿಕಾರಿಗಳು

ಜಾರ್ಖಂಡ್‌ನ ಬೊಕಾರೊ ಜಿಲ್ಲೆಯಲ್ಲಿ ಹಕ್ಕಿಜ್ವರ ಭೀತಿ ಹುಟ್ಟಿಸುತ್ತಿದೆ. ಬೊಕಾರೊ ಜಿಲ್ಲೆಯಲ್ಲಿ ರಾಜ್ಯ ಸರ್ಕಾರ ನಡೆಸುತ್ತಿರುವ ಕೋಳಿ ಫಾರಂನಲ್ಲಿ ಹಕ್ಕಿಜ್ವರ ಹರಡುತ್ತಿದ್ದು, ಕೋಳಿ, ಬಾತುಕೋಳಿ ಸೇರಿದಂತೆ ಸುಮಾರು 4 ಸಾವಿರ ಪಕ್ಷಿಗಳನ್ನು ಕೊಲ್ಲಲು ಪಶುಸಂಗೋಪನಾ ಇಲಾಖೆ ನಿರ್ಧರಿಸಿದೆ.

ಶನಿವಾರ ತಡರಾತ್ರಿ ಈ ಪ್ರಕ್ರಿಯೆ ಆರಂಭವಾಗಿದೆ. ಸರಕಾರಿ ಕೋಳಿ ಫಾರಂನಲ್ಲಿ ಇದೇ ತಿಂಗಳ 2ರಿಂದ ಕೋಳಿಗಳು ಸಾಯುತ್ತಿವೆ. ಇದಕ್ಕೆ ಕಾರಣಗಳನ್ನು ಪರಿಶೀಲಿಸಿದಾಗ, ಇದು ಹಕ್ಕಿಜ್ವರ ಎಂದು ಕರೆಯಲ್ಪಡುವ ಏವಿಯನ್ ಇನ್ಫ್ಲುಯೆಂಜಾ ವೈರಸ್‌ನ H5N1 ಎಂದು ಕಂಡುಬಂದಿದೆ ಎಂದು ಅಧಿಕಾರಿಗಳು ಬಹಿರಂಗಪಡಿಸಿದರು ಮತ್ತು ಇದರಿಂದ ಪಕ್ಷಿಗಳು ಸಾಯುತ್ತಿವೆ ಎಂದು ದೃಢಪಡಿಸಲಾಯಿತು.

ಪ್ರೋಟೀನ್ ಅಂಶ ಹೆಚ್ಚಿರುವ ಕಡಕ್ ನಾಥ್ ಕೋಳಿಗಳಲ್ಲಿ ಈ ವೈರಸ್ ಪತ್ತೆಯಾಗಿದ್ದು, ಇದರಿಂದ ಲೋಹಂಚಲ್ ನ ಫಾರಂನಲ್ಲಿ 800 ಕಡಕ್ ನಾಥ್ ಕೋಳಿಗಳು ಸಾವನ್ನಪ್ಪಿವೆ.

ಈ ಹಿನ್ನೆಲೆಯಲ್ಲಿ ಲೋಹಂಚಲ್ ಫಾರಂನ ಒಂದು ಕಿಲೋಮೀಟರ್ ವ್ಯಾಪ್ತಿಯಲ್ಲಿ 3,856 ಕೋಳಿ ಮತ್ತು ಬಾತುಕೋಳಿಗಳನ್ನು ಕೊಲ್ಲಲು ನಿರ್ಧರಿಸಲಾಗಿದೆ ಎಂದು ರಾಂಚಿಯ ಪ್ರಾಣಿ ಆರೋಗ್ಯ ಮತ್ತು ಉತ್ಪಾದನಾ ಸಂಸ್ಥೆಯ ನಿರ್ದೇಶಕ ಡಾ.ಬಿಪಿನ್ ಬಿಹಾರಿ ಮಹ್ತಾ ತಿಳಿಸಿದ್ದಾರೆ.

ಈಗಾಗಲೇ ಈ ಪ್ರಕ್ರಿಯೆ ಆರಂಭವಾಗಿದ್ದು, ಭಾನುವಾರವೂ ಮುಂದುವರಿಯಲಿದೆ ಎಂದು ತಿಳಿದುಬಂದಿದೆ. 1 ಕಿ.ಮೀ.ವರೆಗಿನ ಕೋಳಿ ಫಾರಂ ಪ್ರದೇಶವನ್ನು ಪೀಡಿತ ಪ್ರದೇಶ ಎಂದು ಘೋಷಿಸಲಾಗಿದ್ದು, 10 ಕಿ.ಮೀ ಪ್ರದೇಶವನ್ನು ಕಣ್ಗಾವಲು ವಲಯ ಎಂದು ಘೋಷಿಸಲಾಗಿದೆ ಎಂದು ಹೇಳಲಾಗಿದೆ.

ಈಗಾಗಲೇ ಆ ಭಾಗದಲ್ಲಿ ಬಾತುಕೋಳಿ, ಕೋಳಿಗಳ ಮಾರಾಟವನ್ನು ನಿಲ್ಲಿಸಲಾಗಿದೆ ಎಂದು ತಿಳಿದುಬಂದಿದೆ. ರಾಜ್ಯಾದ್ಯಂತ ಹಕ್ಕಿಜ್ವರದ ಮುನ್ನೆಚ್ಚರಿಕೆ ನೀಡಲಾಗಿದ್ದು, ಕೋಳಿ ಫಾರಂಗಳ ಮೇಲೆ ಕಟ್ಟೆಚ್ಚರ ವಹಿಸಲಾಗಿದೆ ಎಂದರು.

Bird flu again in Jharkhand, Officials to kill 4 thousand chickens and ducks

Follow us On

Advertisement