INS ವಿಕ್ರಾಂತ್‌ನ ನಾಲ್ಕನೇ ಹಂತದ ಪ್ರಯೋಗಗಳು ಯಶಸ್ವಿ

ಹೈದರಾಬಾದ್: ಸ್ವದೇಶಿ ವಿಮಾನವಾಹಕ ನೌಕೆ ಐಎನ್‌ಎಸ್ ವಿಕ್ರಾಂತ್ ನಾಲ್ಕನೇ ಹಂತದ ಪ್ರಯೋಗಗಳನ್ನು ಯಶಸ್ವಿಯಾಗಿ ಪೂರ್ಣಗೊಳಿಸಿದೆ. ವಿವಿಧ ಷರತ್ತುಗಳು ಮತ್ತು ಸವಾಲುಗಳಿಗೆ ಅನುಗುಣವಾಗಿ ಆನ್‌ಬೋರ್ಡ್ ವಾಯುಯಾನ ಸೌಲಭ್ಯ ಸೇರಿದಂತೆ ಎಲ್ಲಾ ರೀತಿಯ ಉಪಕರಣಗಳನ್ನು ಪರೀಕ್ಷಿಸಲಾಗಿದೆ ಎಂದು ನೌಕಾಪಡೆ ಭಾನುವಾರ ತಿಳಿಸಿದೆ.

ತಿಂಗಳಾಂತ್ಯದೊಳಗೆ ನೌಕೆಯನ್ನು ತಲುಪಿಸುವ ಗುರಿ ಹೊಂದಲಾಗಿದ್ದು, ಆಜಾದಿ ಕಾ ಅಮೃತ್ ಮಹೋತ್ಸವದ ಅಂಗವಾಗಿ ಈ ವರ್ಷದ ಆಗಸ್ಟ್‌ನಲ್ಲಿ ಇದನ್ನು ಪ್ರಾರಂಭಿಸಲಾಗುವುದು ಎಂದು ಹೇಳಲಾಗಿದೆ.

ಭಾರತೀಯ ನೌಕಾಪಡೆ ಮತ್ತು ಕೊಚ್ಚಿನ್ ಶಿಪ್‌ಯಾರ್ಡ್ ಲಿಮಿಟೆಡ್ ಜಂಟಿಯಾಗಿ ನಿರ್ಮಿಸಿದೆ. ಶಿಪ್‌ಯಾರ್ಡ್‌ನಲ್ಲಿರುವ 2000 ಉದ್ಯೋಗಿಗಳ ಜೊತೆಗೆ ವಿವಿಧ ಕಂಪನಿಗಳ 12000 ತಜ್ಞರು ಹಡಗಿನ ನಿರ್ಮಾಣದಲ್ಲಿ ತೊಡಗಿಸಿಕೊಂಡಿದ್ದಾರೆ.

ಕಳೆದ ವರ್ಷ ಆಗಸ್ಟ್‌ನಲ್ಲಿ ಐಎನ್‌ಎಸ್ ವಿಕ್ರಾಂತ್ ತನ್ನ ಮೊದಲ ಸಮುದ್ರ ಪ್ರಯೋಗವನ್ನು ಯಶಸ್ವಿಯಾಗಿ ಪೂರ್ಣಗೊಳಿಸಿತು. ಎರಡನೇ ಹಂತವು ಅಕ್ಟೋಬರ್‌ನಲ್ಲಿ ಪೂರ್ಣಗೊಂಡಿತು ಮತ್ತು ಮೂರನೇ ಹಂತವು ಈ ವರ್ಷದ ಜನವರಿಯಲ್ಲಿ ಪೂರ್ಣಗೊಂಡಿತು. ಐಎನ್ ಎಸ್ ವಿಕ್ರಾಂತ್ ಸೇರ್ಪಡೆಯಿಂದ ಭಾರತೀಯ ನೌಕಾಪಡೆಯ ಶಕ್ತಿ ಮತ್ತಷ್ಟು ಹೆಚ್ಚಲಿದೆ.

ಈ ಹಡಗು 14 ಮಹಡಿಗಳನ್ನು ಹೊಂದಿದೆ. ಇದರ ತೂಕ 40 ಸಾವಿರ ಟನ್. ಇದು 30 ರಿಂದ 40 ವಿಮಾನಗಳಿಗೆ ಅವಕಾಶ ಕಲ್ಪಿಸುತ್ತದೆ. ಹಡಗು 262 ಮೀಟರ್ ಉದ್ದ ಮತ್ತು 59 ಮೀಟರ್ ಎತ್ತರ ಇರಲಿದೆ. ಪ್ರಸ್ತುತ ಭಾರತೀಯ ನೌಕಾಪಡೆ ಐಎನ್ಎಸ್ ವಿಕ್ರಮಾದಿತ್ಯ ಹೊಂದಿದೆ. ಇದು ದೇಶದ ಏಕೈಕ ವಿಮಾನವಾಹಕ ನೌಕೆಯಾಗಿದೆ. ಐಎನ್ ಎಸ್ ವಿಕ್ರಾಂತ್ ಸೇರ್ಪಡೆಯೊಂದಿಗೆ ನೌಕಾಪಡೆಗೆ ಮತ್ತೊಂದು ವಾಹಕ ನೌಕೆ ಲಭ್ಯವಾಗಲಿದೆ.

fourth-phase-of-sea-trials-of-ins-vikrant-successful

Follow us On

Advertisement