Marriage Fraud: ನಿತ್ಯ ವಧುವಿನ ಮದುವೆ ಮೋಸ: ಯುವಕರೇ ಗುರಿ, ರಾತ್ರೋ-ರಾತ್ರಿ ಲಕ್ಷಗಳೊಂದಿಗೆ ಪರಾರಿ
ಮದುವೆ ಹೆಸರಿನಲ್ಲಿ ಯುವಕರನ್ನು ಗುರಿಯಾಗಿಸಿಕೊಂಡು, ಮಧ್ಯವರ್ತಿಗಳ ಸಹಾಯದಿಂದ ಸರಣಿ ಮದುವೆ ಮಾಡಿಕೊಂಡು ಲಕ್ಷಾಂತರ ಹಣ ಪಡೆದು ಪರಾರಿಯಾಗುತ್ತಿದ್ದ ನಿತ್ಯ ವಧುವಿನ ಮದುವೆ ಮೋಸ ಇದೀಗ ಬೆಳಕಿಗೆ ಬಂದಿದೆ.
Image: Ai Generated
- ಯುವಕರನ್ನು ಗುರಿಯಾಗಿಸಿಕೊಂಡು ಮದುವೆ ಮೋಸ
- ಮದುವೆ ಬಳಿಕ ಹಣದೊಂದಿಗೆ ಲಕ್ಷಗಳೊಂದಿಗೆ
- ಪೊಲೀಸ್ ಕ್ರಮ: ದೂರು, ಕೌನ್ಸೆಲಿಂಗ್ ಮೂಲಕ ತನಿಖೆ
Marriage Fraud: ಮದುವೆ ಎನ್ನುವುದು ಜೀವನದ ಮಹತ್ವದ ನಿರ್ಧಾರ. ಭವಿಷ್ಯ, ಕುಟುಂಬ, ಉದ್ಯೋಗ ಎಲ್ಲವನ್ನೂ ಯೋಚಿಸಿ ಯುವಕರು ಮದುವೆಗೆ ಹೆಜ್ಜೆ ಇಡುತ್ತಾರೆ. ಆದರೆ ಇದೇ ನಂಬಿಕೆಯನ್ನು ದುರುಪಯೋಗಪಡಿಸಿಕೊಂಡು, ಮದುವೆ ಹೆಸರಿನಲ್ಲಿ ಮೋಸ ಮಾಡುವ ಘಟನೆ ಇದೀಗ ಬಹಿರಂಗವಾಗಿದೆ.
ಯುವಕರನ್ನೇ ಗುರಿಯಾಗಿಸಿಕೊಂಡು, ಮಧ್ಯವರ್ತಿಗಳ ಸಹಾಯದಿಂದ ಸರಣಿ ಮದುವೆ ಆಗುತ್ತಿದ್ದ ನಿತ್ಯ ವಧುವಿನ ಕೃತ್ಯ ಕೊನೆಗೂ ಪೊಲೀಸರ ಗಮನಕ್ಕೆ ಬಂದಿದೆ.
ಈ ಘಟನೆ ಇಚ್ಚಾಪುರಂ ಪಟ್ಟಣದಲ್ಲಿ ನಡೆದಿದ್ದು, 19 ವರ್ಷದ ಯುವತಿ ವಾಣಿ ಈ ಮದುವೆ ಮೋಸದ ಕೇಂದ್ರಬಿಂದುವಾಗಿದ್ದಾಳೆ ಎನ್ನಲಾಗಿದೆ. ತಾಯಿ ನಿಧನ ಹಾಗೂ ತಂದೆ ಕುಟುಂಬದಿಂದ ದೂರವಾದ ಹಿನ್ನೆಲೆ, ಸಂಬಂಧಿಕರ ಮನೆಯಲ್ಲಿ ಬೆಳೆದ ವಾಣಿಯನ್ನು ಬಳಸಿಕೊಂಡು, ಕೆಲವು ಮಹಿಳೆಯರು ಯುವಕರೊಂದಿಗೆ ಮದುವೆ ಮಾಡಿಸಿ ಲಕ್ಷಾಂತರ ರೂಪಾಯಿ ವಸೂಲಿ ಮಾಡುವ ಜಾಲವೊಂದನ್ನು ನಿರ್ಮಿಸಿದ್ದರು ಎಂಬ ಆರೋಪ ಕೇಳಿಬಂದಿದೆ.
ವಿಧಾನ ಒಂದೇ – ಬೇರೆ ಊರಿನ ಮದುವೆಯಾಗದ ಯುವಕರನ್ನು ಹುಡುಕಿ, ವಾಣಿಯೊಂದಿಗೆ ಮದುವೆ ಮಾಡಿಸುತ್ತಿದ್ದರು. ಮದುವೆಯಾದ ಕೆಲವೇ ದಿನಗಳಲ್ಲಿ ವಾಣಿ ಆ ಮನೆಯನ್ನೇ ತೊರೆದು ಹೋಗುತ್ತಿದ್ದು, ಮತ್ತೆ ಮತ್ತೊಬ್ಬ ಯುವಕನೊಂದಿಗೆ ಮದುವೆ ನಡೆಯುತ್ತಿತ್ತು. ಈ ರೀತಿ ಸರಣಿ ಮದುವೆಗಳು ನಡೆಯುತ್ತಿವೆ ಎನ್ನುವ ಶಂಕೆ ಇದೀಗ ದೃಢವಾಗಿದೆ.
ಇದನ್ನೂ ಓದಿ: ಮೂರು ವರ್ಷದಲ್ಲಿ ಮೂರು ಮದುವೆ: ಇಬ್ಬರು ಪತ್ನಿಗಳ ದೂರು, ವ್ಯಕ್ತಿ ಅರೆಸ್ಟ್
ಇತ್ತೀಚೆಗೆ ಕರ್ನಾಟಕದ (Karnataka) ಯುವಕ ಸುರೇಶ್ ಎಂಬವರು ಪೊಲೀಸರ ಮೊರೆ ಹೋಗಿದ್ದಾರೆ. ಕೆಲ ದಿನಗಳ ಹಿಂದಷ್ಟೇ ತನ್ನೊಂದಿಗೆ ಮದುವೆಯಾಗಿದ್ದ ವಾಣಿ, ಏಕಾಏಕಿ ಕಾಣೆಯಾಗಿದ್ದಾಳೆ ಎಂದು ಅವರು ದೂರಿದ್ದಾರೆ. ವಿಷಯ ತಿಳಿದ ಪೊಲೀಸರು ವಾಣಿಯನ್ನು ಠಾಣೆಗೆ ಕರೆಸಿ ವಿಚಾರಣೆ ಹಾಗೂ ಕೌನ್ಸೆಲಿಂಗ್ ನಡೆಸಿದ್ದಾರೆ.
ಪೊಲೀಸ್ ವಿಚಾರಣೆಯಲ್ಲಿ ವಾಣಿ, ತಾನು ಒಂದೇ ಮದುವೆ ಮಾಡಿಕೊಂಡಿದ್ದು, ಇನ್ನೆರಡು ಬಾರಿ ನಿಶ್ಚಿತಾರ್ಥ ನಡೆದಿತ್ತು ಎಂದು ಹೇಳಿದ್ದಾಳೆ. ಹಣದ ಆಸೆಗೆ ಮಧ್ಯವರ್ತಿಗಳ ಮಾತು ಕೇಳಿ ಮದುವೆಗೆ ಒಪ್ಪಿಕೊಂಡಿದ್ದೇನೆ ಎಂದು ಆಕೆ ಒಪ್ಪಿಕೊಂಡಿದ್ದಾಳೆ ಎನ್ನಲಾಗಿದೆ. ಆದರೆ, ಹಲವರು ಆರೋಪಿಸುತ್ತಿರುವಂತೆ ಎಂಟು ಮದುವೆ ಮಾಡಿಕೊಂಡಿಲ್ಲ ಎಂದು ಆಕೆ ಸ್ಪಷ್ಟಪಡಿಸಿದ್ದಾಳೆ.
ಈ ಪ್ರಕರಣದಲ್ಲಿ ಮದುವೆಗಾಗಿ ನೀಡಿದ ಹಣವನ್ನು ಮರುಪಾವತಿಸಬೇಕು ಎಂದು ಪೀಡಿತ ಯುವಕ ಪೊಲೀಸರಿಗೆ ಮನವಿ ಮಾಡಿಕೊಂಡಿದ್ದಾನೆ. ಸದ್ಯ ಪೊಲೀಸರು ಎಲ್ಲ ಪಕ್ಷಗಳಿಗೂ ಕೌನ್ಸೆಲಿಂಗ್ ನಡೆಸುತ್ತಿದ್ದು, ಪ್ರಕರಣಕ್ಕೆ ಶಾಶ್ವತ ಪರಿಹಾರ ಕಂಡುಹಿಡಿಯುವ ಪ್ರಯತ್ನ ಮುಂದುವರಿದಿದೆ.
