ಘೋರ ದುರಂತ; ಮನೆ ಛಾವಣಿ ಕುಸಿದು 20 ದಿನದ ಮಗು ಸೇರಿ ಮೂವರು ಸಾವು
ಉತ್ತರ ಪ್ರದೇಶದ ಕಾನ್ಪುರದಲ್ಲಿ ಹಳೆಯ ಮನೆಯ ಮೇಲ್ಛಾವಣಿ ಕುಸಿದು 20 ದಿನದ ಹಸುಗೂಸು ಸೇರಿದಂತೆ ಒಂದೇ ಕುಟುಂಬದ ಮೂವರು ಮೃತಪಟ್ಟಿದ್ದಾರೆ. ಮಗುವನ್ನು ಉಳಿಸಲು ತಾಯಿ ನಡೆಸಿದ ಕೊನೆಯ ಪ್ರಯತ್ನ ಮನಕಲಕುವಂತಿದೆ.
ಮಗುವನ್ನು ಅಪ್ಪಿಕೊಂಡೇ ಪ್ರಾಣಬಿಟ್ಟ ತಾಯಿ
ಮಗುವಿನ ಮೇಲೆ ಕುಸಿದು ಬೀಳುತ್ತಿದ್ದ ಮನೆಯ ಅವಶೇಷಗಳಿಂದ ಅದನ್ನು ರಕ್ಷಿಸಲು ತಾಯಿ ಕೊನೆಯ ಕ್ಷಣದವರೆಗೂ ಪ್ರಯತ್ನಿಸಿದ್ದಾರೆ. ಆದರೆ ವಿಧಿಯಾಟಕ್ಕೆ ತಾಯಿ ಮತ್ತು ಕಂದಮ್ಮ ಇಬ್ಬರೂ ಬಲಿಯಾಗಿರುವ ಘಟನೆ ಉತ್ತರ ಪ್ರದೇಶದ (Uttar Pradesh) ಕಾನ್ಪುರದಲ್ಲಿ (Kanpur) ಇಡೀ ಪ್ರದೇಶವನ್ನೇ ಕಣ್ಣೀರಿನಲ್ಲಿ ಮುಳುಗಿಸಿದೆ.
ಕಾನ್ಪುರದ ಪಾಂಕಿ ಪಡಾವ್ ಪ್ರದೇಶದಲ್ಲಿ ಭಾನುವಾರ ಬೆಳಗ್ಗೆ ಸುಮಾರು 35 ವರ್ಷ ಹಳೆಯ ಮನೆಯ ಮೇಲ್ಛಾವಣಿ ಏಕಾಏಕಿ ಕುಸಿದಿದೆ. ಈ ವೇಳೆ ಮನೆಯೊಳಗೆ ನಾಲ್ವರು ಕುಟುಂಬ ಸದಸ್ಯರಿದ್ದರು. ಛಾವಣಿಯ ಅವಶೇಷಗಳಡಿ ಸಿಲುಕಿದವರನ್ನು ಸ್ಥಳೀಯರು ತಕ್ಷಣವೇ ರಕ್ಷಿಸಿ ಆಸ್ಪತ್ರೆಗೆ ಕರೆದೊಯ್ದಿದ್ದಾರೆ.
ಈ ದುರಂತದಲ್ಲಿ 60 ವರ್ಷದ ವಿನೋದಿನಿ ಶುಕ್ಲಾ, 28 ವರ್ಷದ ಅನ್ಷಿಕಾ ಶುಕ್ಲಾ ಹಾಗೂ ಕೇವಲ 20 ದಿನಗಳ ಹಿಂದಷ್ಟೇ ಜನಿಸಿದ್ದ ಆರವ್ ಮೃತಪಟ್ಟಿದ್ದಾರೆ. ಅನ್ಷಿಕಾ ಅವರ ಪತಿ 32 ವರ್ಷದ ಹರ್ಷ ಶುಕ್ಲಾ ಗಾಯಗೊಂಡಿದ್ದು, ಪ್ರಾಣಾಪಾಯದಿಂದ ಪಾರಾಗಿದ್ದಾರೆ.
ರಕ್ಷಣಾ ಕಾರ್ಯಾಚರಣೆ ವೇಳೆ ಕಂಡುಬಂದ ದೃಶ್ಯ ಸ್ಥಳೀಯರ ಮನಕಲಕಿದೆ. ಛಾವಣಿ ಕುಸಿಯುತ್ತಿದ್ದಂತೆ ತನ್ನ ಪುಟ್ಟ ಮಗುವನ್ನು ಎದೆಗೆ ಬಿಗಿಯಾಗಿ ಅಪ್ಪಿಕೊಂಡ ಅನ್ಷಿಕಾ, ಅವಶೇಷಗಳ ಹೊಡೆತದಿಂದ ಮಗುವನ್ನು ರಕ್ಷಿಸಲು ತನ್ನ ದೇಹವನ್ನೇ ಕವಚದಂತೆ ಬಳಸಿಕೊಂಡಿದ್ದರು. ದುರದೃಷ್ಟವಶಾತ್ ತಾಯಿ ಮತ್ತು ಮಗುವನ್ನು ಉಳಿಸಿಕೊಳ್ಳಲು ಸಾಧ್ಯವಾಗಲಿಲ್ಲ.
ಮಣ್ಣಿನ ಜೊತೆಗೆ ಬಿದಿರು ಹಾಗೂ ಮರದ ಶೀಟ್‌ಗಳನ್ನು ಬಳಸಿ ಮನೆಯ ಛಾವಣಿ ನಿರ್ಮಿಸಲಾಗಿತ್ತು. ನಿರಂತರ ನೀರು ಸೋರಿಕೆಯಿಂದ ಮೇಲ್ಛಾವಣಿಯಲ್ಲಿ ತೇವಾಂಶ ಹೆಚ್ಚಾಗಿ, ಭಾರ ಹೆಚ್ಚಾದ ಪರಿಣಾಮ ಕುಸಿತ ಸಂಭವಿಸಿರಬಹುದು ಎಂದು ಉಪ ಪೊಲೀಸ್ ಆಯುಕ್ತ ಎಸ್.ಎಂ. ಕಾಸಿಮ್ ಅಬಿದಿ ತಿಳಿಸಿದ್ದಾರೆ.
ಘಟನೆಯ ಬಳಿಕ ಮೃತದೇಹಗಳನ್ನು ಮರಣೋತ್ತರ ಪರೀಕ್ಷೆಗೆ ಕಳುಹಿಸಲು ಕುಟುಂಬಸ್ಥರು ಆರಂಭದಲ್ಲಿ ಒಪ್ಪಿರಲಿಲ್ಲ. ಬಳಿಕ ಪೊಲೀಸರು ಮನವೊಲಿಸಿ ಅಗತ್ಯ ಪ್ರಕ್ರಿಯೆ ಕೈಗೊಂಡಿದ್ದಾರೆ. ಕಂದಾಯ ಇಲಾಖೆ ಅಧಿಕಾರಿಗಳು ಕೂಡ ಸ್ಥಳಕ್ಕೆ ಭೇಟಿ ನೀಡಿ ಪರಿಶೀಲನೆ ನಡೆಸಿದ್ದಾರೆ.
ಒಂದು ಕುಟುಂಬದ ಮೂವರನ್ನು ಕಳೆದುಕೊಂಡ ಈ ಘಟನೆ ಹಳೆಯ ಹಾಗೂ ಶಿಥಿಲಗೊಂಡ ಮನೆಗಳ ಸುರಕ್ಷತೆಯ ಬಗ್ಗೆ ಮತ್ತೊಮ್ಮೆ ಗಂಭೀರ ಪ್ರಶ್ನೆಗಳನ್ನು ಎತ್ತಿದೆ.
ಕರ್ನಾಟಕ ರಾಜ್ಯದ ಮೂಲೆಮೂಲೆಗಳ ಕನ್ನಡ ಸುದ್ದಿಗಳ ಜೊತೆಗೆ ದಿನದ ಪ್ರಮುಖ ಬೆಳವಣಿಗೆಗಳನ್ನು Kannada News Today ಮೂಲಕ ತಿಳಿಯಿರಿ.
