ಅರ್ಧರಾತ್ರಿ ಮಹಿಳೆಯ ಮೈ-ಕೈ ಮುಟ್ಟಿ ಕಿರುಕುಳ: ಉಬರ್ ಡ್ರೈವರ್ ವಿರುದ್ಧ ಪ್ರಕರಣ

ದೆಹಲಿಯ ಪಿತಾಂಪುರ ಪ್ರದೇಶದಲ್ಲಿ ನಡೆದ ಘಟನೆ ಆತಂಕಕ್ಕೆ ಕಾರಣವಾಗಿದೆ. ಅರ್ಧರಾತ್ರಿ ಸಮಯದಲ್ಲಿ ಉಬರ್ ಬೈಕ್ ಸೇವೆ ಬಳಸುತ್ತಿದ್ದ ಮಹಿಳೆಯೊಂದಿಗೆ ಚಾಲಕ ಅಸಭ್ಯವಾಗಿ ವರ್ತಿಸಿದ್ದಾನೆ ಎಂಬ ಆರೋಪ ಕೇಳಿಬಂದಿದೆ. ಮಹಿಳೆಯ ಹೇಳಿಕೆಯ ಪ್ರಕಾರ, ಚಾಲಕ ಹಲವು ಬಾರಿ ಅನಾವಶ್ಯಕವಾಗಿ ತಾಕಿ ಕಿರುಕುಳ ನೀಡಲು ಯತ್ನಿಸಿದ್ದಾನೆ.

ಈ ಘಟನೆ ಮಾರ್ಚ್ 12ರಂದು ರಾತ್ರಿ ಸುಮಾರು 1.28ರ ಸಮಯದಲ್ಲಿ ನಡೆದಿದೆ ಎಂದು ತಿಳಿದುಬಂದಿದೆ. ಮಹಿಳೆ ರೋಹಿಣಿ ಸೆಕ್ಟರ್-15 ಪ್ರದೇಶದಿಂದ ಎಂ.ಬಿ. ಬ್ಲಾಕ್ ಮಾರ್ಕೆಟ್‌ಗೆ ಹೋಗಲು ಉಬರ್ ಬೈಕ್ ರೈಡ್ ಬುಕ್ ಮಾಡಿಕೊಂಡಿದ್ದಳು. ಆರಂಭದಲ್ಲಿ ಎಲ್ಲವೂ ಸಾಮಾನ್ಯವಾಗಿದ್ದರೂ, ಪ್ರಯಾಣ ಮುಂದುವರಿದಂತೆ ಚಾಲಕನ ವರ್ತನೆ ಅನುಮಾನಾಸ್ಪದವಾಗಿ ಪರಿಣಮಿಸಿತು.

ಪ್ರಯಾಣದ ವೇಳೆ ಅಸಭ್ಯ ವರ್ತನೆ ಆರೋಪ

ಬೈಕ್ ಮೇಲೆ ಕುಳಿತ ಕೆಲವೇ ಕ್ಷಣಗಳಲ್ಲಿ ಚಾಲಕ ಮಹಿಳೆಯನ್ನು ಉದ್ದೇಶಪೂರ್ವಕವಾಗಿ ತಾಕಲು ಆರಂಭಿಸಿದ್ದಾನೆ ಎಂದು ಆರೋಪಿಸಲಾಗಿದೆ. ಮಹಿಳೆ ಇದಕ್ಕೆ ವಿರೋಧ ವ್ಯಕ್ತಪಡಿಸಿ ಎಚ್ಚರಿಸಿದರೂ ಚಾಲಕ ತನ್ನ ವರ್ತನೆಯನ್ನು ನಿಲ್ಲಿಸಲಿಲ್ಲ. ಅಲ್ಲದೆ, ಬೈಕ್ ಅನ್ನು ಅತಿವೇಗದಲ್ಲಿ ಚಲಾಯಿಸಿ ಸ್ಪೀಡ್ ಬ್ರೇಕರ್‌ಗಳಲ್ಲೂ ವೇಗ ಕಡಿಮೆ ಮಾಡದೆ ಮುಂದುವರಿದಿದ್ದಾನೆ.

ಮಹಿಳೆ ನಿಧಾನವಾಗಿ ಓಡಿಸಲು ಹೇಳಿದರೂ ಚಾಲಕ ಕೇಳದೇ, ಹಿಂಬದಿಯಿಂದ ಹಿಡಿದು ಕಿರುಕುಳ ನೀಡಲು ಯತ್ನಿಸಿದ್ದಾನೆ ಎಂದು ಆರೋಪಿಸಲಾಗಿದೆ. ಈ ಬಗ್ಗೆ ಯಾರಿಗಾದರೂ ಹೇಳಿದರೆ ಅಥವಾ ಗಟ್ಟಿಯಾಗಿ ಕೂಗಿದರೆ ಹಾನಿ ಮಾಡುವುದಾಗಿ ಬೆದರಿಕೆ ಹಾಕಿದನೆಂದು ಮಹಿಳೆ ಪೊಲೀಸರಿಗೆ ತಿಳಿಸಿದ್ದಾಳೆ. ಇನ್ನೂ ಗಮ್ಯಸ್ಥಾನಕ್ಕೆ ಹೋಗಬೇಕಾದ ಮಾರ್ಗವನ್ನು ಬಿಟ್ಟು ಬೇರೆ ದಾರಿಯಲ್ಲಿ ಬೈಕ್ ಓಡಿಸಿದ್ದಾನೆ ಎಂಬ ಆರೋಪವೂ ಕೇಳಿಬಂದಿದೆ.

ಸಹಾಯಕ್ಕೆ ಬಂದ ಸ್ಥಳೀಯರು

ಈ ಪರಿಸ್ಥಿತಿಯಲ್ಲಿ ಮಹಿಳೆ ಭಯಗೊಂಡು ಅಳುತ್ತಾ ಸಹಾಯಕ್ಕಾಗಿ ಕೂಗಲು ಆರಂಭಿಸಿದ್ದಾಳೆ. ಬೈಕ್ ನಿಲ್ಲಿಸದಿದ್ದರೆ ಜಿಗಿದುಬಿಡುವುದಾಗಿ ಎಚ್ಚರಿಸಿದ್ದಾಳೆ. ಕೊನೆಗೆ ಎಫ್-ಯು ಬ್ಲಾಕ್‌ನ ಸರ್ವೋದಯ ವಿದ್ಯಾಲಯದ ಬಳಿ ಚಾಲಕ ಅವಳನ್ನು ಇಳಿಸಿ ಅಲ್ಲಿಂದ ತೆರಳಿದ್ದಾನೆ.

ಅಲ್ಲಿ ಇದ್ದ ಭದ್ರತಾ ಸಿಬ್ಬಂದಿ ಹಾಗೂ ಕೆಲವು ಮಹಿಳೆಯರು ಅವಳಿಗೆ ನೆರವು ನೀಡಿದರು. ಬಳಿಕ ಮಹಿಳೆ ಉಬರ್ ಕಂಪನಿಗೆ ಈ ಕುರಿತು ದೂರು ನೀಡಿದ್ದು, ಪೊಲೀಸ್ ಸಹಾಯವಾಣಿ ಮೂಲಕವೂ ಮಾಹಿತಿ ನೀಡಿದ್ದಾಳೆ.

ಪೊಲೀಸ್ ತನಿಖೆ ಆರಂಭ

ಪೊಲೀಸರ ಮಾಹಿತಿ ಪ್ರಕಾರ, ಈ ಪ್ರಕರಣದಲ್ಲಿ ಆರೋಪಿಯಾಗಿರುವ ಉಬರ್ ಚಾಲಕನನ್ನು ಸಚಿನ್ ಎಂದು ಗುರುತಿಸಲಾಗಿದೆ. ಮಹಿಳೆಯ ದೂರು ಆಧಾರವಾಗಿ ಪ್ರಕರಣ ದಾಖಲಿಸಿಕೊಂಡಿರುವ ಪೊಲೀಸರು ತನಿಖೆ ನಡೆಸುತ್ತಿದ್ದಾರೆ. ಘಟನೆಯ ಕುರಿತು ಹೆಚ್ಚಿನ ಮಾಹಿತಿ ಸಂಗ್ರಹಿಸಲಾಗುತ್ತಿದೆ.