ಇನ್ಮುಂದೆ ಎಟಿಎಂನಲ್ಲಿ 10, 20, 50 ರೂಪಾಯಿ ಚಿಲ್ಲರೆ ನೋಟುಗಳು ಸಿಗಲಿವೆ!
ಯುಪಿಐ ಬಳಕೆ ಹೆಚ್ಚಾದರೂ ಚಿಲ್ಲರೆ ಸಮಸ್ಯೆ ಮುಂದುವರಿದ ಹಿನ್ನೆಲೆ, ATMಗಳಿಂದ 10, 20, 50 ರೂ. ನೋಟುಗಳನ್ನು ಪಡೆಯುವ ಪ್ರಯೋಗವನ್ನು ಸರ್ಕಾರ ಆರಂಭಿಸಿದ್ದು, ಜನರಿಗೆ ದಿನನಿತ್ಯದ ವಹಿವಾಟಿಗೆ ಪರಿಹಾರ ನಿರೀಕ್ಷೆ ಮೂಡಿದೆ.
ಡಿಜಿಟಲ್ ಪಾವತಿಗಳು ವೇಗವಾಗಿ ಹೆಚ್ಚುತ್ತಿದ್ದರೂ, ಭಾರತದಲ್ಲಿ ಚಿಲ್ಲರೆ ನೋಟುಗಳ ಅವಶ್ಯಕತೆ ಇನ್ನೂ ಕಡಿಮೆಯಾಗಿಲ್ಲ. ಬಸ್ ಟಿಕೆಟ್, ಆಟೋ ಪ್ರಯಾಣ, ಟೀ ಅಂಗಡಿ, ಸ್ಥಳೀಯ ಮಾರುಕಟ್ಟೆಗಳಲ್ಲಿ ಖರೀದಿ ವೇಳೆ ಚಿಲ್ಲರೆ ಇಲ್ಲದೆ ಜನರು ಆಗಾಗ್ಗೆ ಸಂಕಷ್ಟ ಅನುಭವಿಸುತ್ತಿದ್ದಾರೆ. ಈ ಹಿನ್ನೆಲೆ ಸರ್ಕಾರ ಹೊಸ ಹೆಜ್ಜೆ ಇಟ್ಟಿದೆ.
ATMಗಳಿಂದಲೇ ಸಣ್ಣ ನೋಟುಗಳು
ಇನ್ನು ಮುಂದೆ ATMಗಳಿಗೆ ಹೋದರೆ ಕೇವಲ 100 ಅಥವಾ 500 ರೂ. ನೋಟುಗಳಷ್ಟೇ ಅಲ್ಲ, 10, 20 ಮತ್ತು 50 ರೂ. ನೋಟುಗಳನ್ನೂ ಪಡೆಯುವ ಅವಕಾಶ ಸಿಗಲಿದೆ. ಈ ಉದ್ದೇಶಕ್ಕಾಗಿ ಕೆಲವು ನಗರಗಳಲ್ಲಿ ಪೈಲಟ್ ಪ್ರಾಜೆಕ್ಟ್ ಆರಂಭಿಸಲಾಗಿದೆ. ಮೊದಲ ಹಂತದಲ್ಲಿ ಈ ವ್ಯವಸ್ಥೆಯನ್ನು ಪ್ರಯೋಗಾತ್ಮಕವಾಗಿ ಜಾರಿಗೆ ತರಲಾಗುತ್ತಿದೆ.
ಮೊದಲ ಪ್ರಯೋಗ ಎಲ್ಲಿ?
ಮುಂಬೈನಲ್ಲಿ ಸದ್ಯ ಈ ಹೊಸ ATM ವ್ಯವಸ್ಥೆಯನ್ನು ಪರೀಕ್ಷಿಸಲಾಗುತ್ತಿದೆ. ಚಿಲ್ಲರೆ ನೋಟುಗಳ ಬೇಡಿಕೆ ಹೆಚ್ಚಿರುವ ಪ್ರದೇಶಗಳನ್ನು ಆಯ್ಕೆ ಮಾಡಿಕೊಂಡು ಈ ಪ್ರಯೋಗ ನಡೆಯುತ್ತಿದೆ. ಪ್ರಯೋಗ ಯಶಸ್ವಿಯಾದರೆ, ಮುಂದಿನ ದಿನಗಳಲ್ಲಿ ಇತರ ನಗರಗಳು ಹಾಗೂ ಪಟ್ಟಣಗಳಿಗೂ ವಿಸ್ತರಿಸುವ ನಿರೀಕ್ಷೆ ಇದೆ.
ಜನಸಂದಣಿ ಪ್ರದೇಶಗಳಲ್ಲಿ ATM ಸ್ಥಾಪನೆ
ಆಸ್ಪತ್ರೆಗಳು, ಬಸ್ ನಿಲ್ದಾಣಗಳು, ರೈಲು ನಿಲ್ದಾಣಗಳು, ಸ್ಥಳೀಯ ಮಾರುಕಟ್ಟೆಗಳು, ಸರ್ಕಾರಿ ಕಚೇರಿಗಳ ಸುತ್ತಮುತ್ತ ಈ ಹೊಸ ATMಗಳನ್ನು ಸ್ಥಾಪಿಸಲು ಯೋಜನೆ ರೂಪಿಸಲಾಗಿದೆ. ಇಂತಹ ಪ್ರದೇಶಗಳಲ್ಲಿ ದಿನನಿತ್ಯ ನಗರ ವಹಿವಾಟು ಹೆಚ್ಚು ನಡೆಯುವುದರಿಂದ ಚಿಲ್ಲರೆ ನೋಟುಗಳ ಅಗತ್ಯವೂ ಹೆಚ್ಚಾಗಿರುತ್ತದೆ.
ದೊಡ್ಡ ನೋಟು ಬದಲಾವಣೆಗೂ ಸೌಲಭ್ಯ
ಸರ್ಕಾರದ ಯೋಚನೆ ಇದಕ್ಕಷ್ಟೇ ಸೀಮಿತವಾಗಿಲ್ಲ. ಜನರು ತಮ್ಮ ದೊಡ್ಡ ನೋಟುಗಳನ್ನು ಸಣ್ಣ ನೋಟುಗಳಾಗಿ ಬದಲಿಸಿಕೊಳ್ಳಲು ಸಹಾಯಕವಾಗುವ ಯಂತ್ರಗಳನ್ನೂ ಪರಿಚಯಿಸಲು ಚಿಂತನೆ ನಡೆಸಲಾಗಿದೆ.
ಯುಪಿಐ ಬಳಕೆ ಹೆಚ್ಚಾದರೂ, ಸಣ್ಣ ವ್ಯಾಪಾರಿಗಳು, ರಸ್ತೆ ಬದಿ ವ್ಯಾಪಾರಿಗಳು, ಪ್ರಯಾಣಿಕರು ಹಾಗೂ ದಿನಗೂಲಿ ಕಾರ್ಮಿಕರು ಇನ್ನೂ ನಗದು ಮೇಲೆಯೇ ಅವಲಂಬಿತರಾಗಿದ್ದಾರೆ.
