ಇನ್ಮುಂದೆ ಫೋನ್ ಪೇ, ಗೂಗಲ್ ಪೇನಲ್ಲಿ 10,000ಕ್ಕಿಂತ ಹೆಚ್ಚು ಹಣ ಕಳುಹಿಸಲು 1 ಗಂಟೆ ಕಾಯಬೇಕು!

ಡಿಜಿಟಲ್ ಮೋಸ ತಡೆಗೆ RBI ಹೊಸ ಯೋಜನೆ

ಭಾರತದಲ್ಲಿ ಡಿಜಿಟಲ್ ಪಾವತಿ ವ್ಯವಸ್ಥೆಯಲ್ಲಿ ಕ್ರಾಂತಿ ತಂದಿರುವ UPI (Unified Payments Interface) ಬಳಕೆ ದಿನದಿಂದ ದಿನಕ್ಕೆ ಹೆಚ್ಚುತ್ತಿದೆ. ಆದರೆ ಇದರ ಜೊತೆಗೆ ಆನ್‌ಲೈನ್ ಮೋಸಗಳ ಸಂಖ್ಯೆಯೂ ಹೆಚ್ಚುತ್ತಿರುವ ಹಿನ್ನೆಲೆ ಭಾರತೀಯ ರಿಸರ್ವ್ ಬ್ಯಾಂಕ್ (RBI) ಹೊಸ ಭದ್ರತಾ ಕ್ರಮವನ್ನು ಪರಿಗಣಿಸುತ್ತಿದೆ.

ಇತ್ತೀಚಿನ ವರದಿಗಳ ಪ್ರಕಾರ, ₹10,000ಕ್ಕಿಂತ ಹೆಚ್ಚು ಮೊತ್ತವನ್ನು UPI, IMPS ಮುಂತಾದ ಡಿಜಿಟಲ್ ವಿಧಾನಗಳಿಂದ ಕಳುಹಿಸಿದರೆ, ಆ ಟ್ರಾನ್ಸಾಕ್ಷನ್ ತಕ್ಷಣ ಪೂರ್ಣಗೊಳ್ಳದೆ ಒಂದು ಗಂಟೆಯ ನಂತರ ಪ್ರಕ್ರಿಯೆ ಪೂರ್ಣಗೊಳ್ಳುವ ವ್ಯವಸ್ಥೆ ತರಲು RBI ಯೋಚಿಸುತ್ತಿದೆ.

ಏಕೆ ತರಲಾಗುತ್ತಿದೆ ಈ ನಿಯಮ?

ಕಳೆದ ಕೆಲವು ವರ್ಷಗಳಲ್ಲಿ ಭಾರತದಲ್ಲಿ ಡಿಜಿಟಲ್ ಮೋಸ ಪ್ರಕರಣಗಳು ಆತಂಕಕಾರಿ ಮಟ್ಟಕ್ಕೆ ಏರಿವೆ. 2021ರಲ್ಲಿ ಸುಮಾರು 2.6 ಲಕ್ಷ ಪ್ರಕರಣಗಳು ದಾಖಲಾಗಿದ್ದರೆ, 2025ರ ವೇಳೆಗೆ ಅದು 28 ಲಕ್ಷಕ್ಕೂ ಹೆಚ್ಚು ಪ್ರಕರಣಗಳಿಗೆ ಏರಿಕೆಯಾಗಿದೆ.

ಮೋಸದ ಮೂಲಕ ಕಳೆದುಹೋದ ಹಣದ ಮೊತ್ತವೂ ಭಾರೀ ಪ್ರಮಾಣದಲ್ಲಿ ಹೆಚ್ಚಾಗಿದೆ. ಕೆಲವೇ ವರ್ಷಗಳಲ್ಲಿ ₹551 ಕೋಟಿಯಿಂದ ₹22,000 ಕೋಟಿಗೂ ಹೆಚ್ಚು ನಷ್ಟ ಸಂಭವಿಸಿರುವುದಾಗಿ ವರದಿಗಳು ಹೇಳುತ್ತವೆ.

ಅನೇಕ ಸಂದರ್ಭಗಳಲ್ಲಿ ಹ್ಯಾಕಿಂಗ್ ಮಾಡುವುದಕ್ಕಿಂತ, ಮೋಸಗಾರರು ಭಯ ಹುಟ್ಟಿಸುವುದು ಅಥವಾ ಲಾಭದ ಆಸೆ ತೋರಿಸುವುದು ಮೂಲಕ ಜನರಿಂದಲೇ ಹಣ ವರ್ಗಾವಣೆ ಮಾಡಿಸುತ್ತಿದ್ದಾರೆ. ಈ ಹಿನ್ನೆಲೆಯಲ್ಲಿ ಒಂದು ಗಂಟೆಯ ವಿಳಂಬ ಇದ್ದರೆ, ವ್ಯಕ್ತಿಗೆ ತನ್ನ ತಪ್ಪು ಅರಿಯಲು ಅಥವಾ ಕುಟುಂಬದವರೊಂದಿಗೆ ಮಾತನಾಡಲು ಸಮಯ ಸಿಗುತ್ತದೆ ಎಂಬುದು RBI ಯ ಅಭಿಪ್ರಾಯ.

ಯಾವ ಪಾವತಿಗಳಿಗೆ ಈ ನಿಯಮ ಅನ್ವಯಿಸುವುದಿಲ್ಲ?

RBI ಪ್ರಸ್ತಾವನೆಯ ಪ್ರಕಾರ, ಎಲ್ಲ ಡಿಜಿಟಲ್ ಪಾವತಿಗಳಿಗೆ ಈ ಒಂದು ಗಂಟೆಯ ನಿಯಮ ಅನ್ವಯಿಸುವುದಿಲ್ಲ.

ಮರ್ಚಂಟ್ ಪೇಮೆಂಟ್ (ದುಕಾಣಗಳಲ್ಲಿ ಸ್ಕ್ಯಾನ್ ಮಾಡಿ ಮಾಡುವ ಪಾವತಿಗಳು) ಮೇಲೆ ಈ ನಿಯಮ ಇರದು
ನೀವು ಆಗಾಗ್ಗೆ ಹಣ ಕಳುಹಿಸುವವರನ್ನು Trusted List ನಲ್ಲಿ ಸೇರಿಸಿದರೆ, ಅವರಿಗೆ ಹಣ ತಕ್ಷಣ ಹೋಗುತ್ತದೆ
e-Mandate, ಚೆಕ್ ಪೇಮೆಂಟ್ ಮತ್ತು NACH ಲಾವಾದೇವಿಗಳಿಗೂ ಯಾವುದೇ ಪರಿಣಾಮ ಇರದು

ಹಿರಿಯ ನಾಗರಿಕರು ಮತ್ತು ದಿವ್ಯಾಂಗರಿಗೆ ವಿಶೇಷ ನಿಯಮ?

ಕೆಲವು ವರದಿಗಳ ಪ್ರಕಾರ, 70 ವರ್ಷಕ್ಕಿಂತ ಮೇಲ್ಪಟ್ಟವರು ಅಥವಾ ದಿವ್ಯಾಂಗರು ದೊಡ್ಡ ಮೊತ್ತದ ಹಣ ವರ್ಗಾವಣೆ ಮಾಡುವಾಗ ಕುಟುಂಬದ ವಿಶ್ವಾಸಾರ್ಹ ವ್ಯಕ್ತಿಯ ಅನುಮತಿ ಅಗತ್ಯವಾಗಬಹುದು ಎಂಬ ಪ್ರಸ್ತಾಪವೂ ಇದೆ.

ಇದಲ್ಲದೆ, ಒಂದು ಖಾತೆಗೆ ವರ್ಷದಲ್ಲಿ ₹25 ಲಕ್ಷಕ್ಕಿಂತ ಹೆಚ್ಚು ಹಣ ಬಂದರೆ ಹೆಚ್ಚುವರಿ ಪರಿಶೀಲನೆ ನಡೆಸುವಂತೆ ಕೂಡ ಶಿಫಾರಸು ಮಾಡಲಾಗಿದೆ.

ಅಂತಿಮ ನಿರ್ಧಾರ ಯಾವಾಗ?

ಈ ಹೊಸ ನಿಯಮಗಳ ಬಗ್ಗೆ RBI ಸಾರ್ವಜನಿಕರಿಂದ ಹಾಗೂ ವಿವಿಧ ಸಂಸ್ಥೆಗಳಿಂದ 2026 ಮೇ 8ರವರೆಗೆ ಸಲಹೆಗಳನ್ನು ಆಹ್ವಾನಿಸಿದೆ. ಬಳಿಕ ಅಂತಿಮ ನಿರ್ಧಾರ ಕೈಗೊಳ್ಳುವ ಸಾಧ್ಯತೆ ಇದೆ.

ಒಂದು ವೇಳೆ ಈ ನಿಯಮ ಜಾರಿಗೆ ಬಂದರೆ, ಈಗಿರುವ Instant UPI Payment ವ್ಯವಸ್ಥೆಯಲ್ಲಿ ಸ್ವಲ್ಪ ವಿಳಂಬ ಉಂಟಾಗಬಹುದು. ಆದರೆ ಇದರ ಮುಖ್ಯ ಉದ್ದೇಶ ಜನರ ಹಣವನ್ನು ಡಿಜಿಟಲ್ ಮೋಸಗಳಿಂದ ರಕ್ಷಿಸುವುದಾಗಿದೆ.