ಯೂಟ್ಯೂಬ್, ಇನ್ಸ್ಟಾಗ್ರಾಂ ಆದಾಯಕ್ಕೆ ತೆರಿಗೆ ಕಟ್ಟಬೇಕೇ? ನಿಯಮ ಹೀಗಿದೆ
ಸಾಮಾಜಿಕ ಜಾಲತಾಣಗಳು ಹಾಗೂ ಫ್ರೀಲಾನ್ಸಿಂಗ್ ಮೂಲಕ ಹಣ ಗಳಿಸುವವರ ಸಂಖ್ಯೆ ಹೆಚ್ಚುತ್ತಿದೆ. ಆದರೆ ಆದಾಯ ತೆರಿಗೆ ರಿಟರ್ನ್ಸ್, ವೆಚ್ಚದ ಲೆಕ್ಕ ಹಾಗೂ ಮುಂಗಡ ತೆರಿಗೆ ನಿಯಮಗಳನ್ನು ಪಾಲಿಸುವುದು ಅತ್ಯಗತ್ಯವಾಗಿದೆ.
ಸಾಮಾಜಿಕ ಜಾಲತಾಣಗಳನ್ನು ಆದಾಯದ ಮೂಲವನ್ನಾಗಿ ಮಾಡಿಕೊಂಡಿರುವವರಿಗೆ ಆದಾಯ ತೆರಿಗೆ ಕುರಿತು ಸ್ಪಷ್ಟ ಅರಿವು ಇರಬೇಕು. ಯೂಟ್ಯೂಬ್, ಇನ್ಸ್ಟಾಗ್ರಾಂ, ಫ್ರೀಲಾನ್ಸಿಂಗ್ ಅಥವಾ ಡಿಜಿಟಲ್ ಸೇವೆಗಳ ಮೂಲಕ ಹಣ ಗಳಿಸುವವರು ತೆರಿಗೆ ನಿಯಮಗಳಿಂದ ಹೊರತಾಗುವುದಿಲ್ಲ.
ತಜ್ಞರ ಮಾಹಿತಿ ಪ್ರಕಾರ, ಈ ರೀತಿಯ ಆದಾಯವನ್ನು ವೃತ್ತಿಪರ ಆದಾಯ ಎಂದು ಪರಿಗಣಿಸಲಾಗುತ್ತದೆ. ಹೀಗಾಗಿ ವಾರ್ಷಿಕ ಆದಾಯದ ಜೊತೆಗೆ ವ್ಯವಹಾರಕ್ಕೆ ಸಂಬಂಧಿಸಿದ ವೆಚ್ಚಗಳನ್ನು ದಾಖಲಿಸಿಕೊಂಡು, ಅದರ ಬಳಿಕ ಉಳಿಯುವ ಲಾಭದ ಮೇಲಷ್ಟೇ ತೆರಿಗೆ ವಿಧಿಸಲಾಗುತ್ತದೆ.
ಕ್ಯಾಮೆರಾ, ಕಂಪ್ಯೂಟರ್, ಮೊಬೈಲ್, ಇಂಟರ್ನೆಟ್, ಸ್ಟುಡಿಯೋ ಬಾಡಿಗೆ, ಸಾಫ್ಟ್ವೇರ್ ಚಂದಾ, ಎಡಿಟರ್ ಹಾಗೂ ಡಿಸೈನರ್ಗಳಿಗೆ ನೀಡುವ ಪಾವತಿಗಳಂತಹ ಹಲವು ವೆಚ್ಚಗಳನ್ನು ಕಡಿತವಾಗಿ ಪರಿಗಣಿಸಬಹುದು. ಇದರಿಂದ ತೆರಿಗೆ ಹೊರೆ ಕಡಿಮೆಯಾಗುವ ಸಾಧ್ಯತೆಯಿದೆ.
ಯೂಟ್ಯೂಬ್ ಜಾಹೀರಾತು, ಬ್ರ್ಯಾಂಡ್ ಸಹಭಾಗಿತ್ವ, ಅಫಿಲಿಯೇಟ್ ಆದಾಯ ಸೇರಿದಂತೆ ಎಲ್ಲ ಡಿಜಿಟಲ್ ಆದಾಯಗಳನ್ನು ಆದಾಯ ತೆರಿಗೆ ಇಲಾಖೆಗೆ ಘೋಷಿಸುವುದು ಕಡ್ಡಾಯ. ಕೆಲವು ಸಂದರ್ಭಗಳಲ್ಲಿ ಜಿಎಸ್ಟಿ ನಿಯಮಗಳೂ ಅನ್ವಯಿಸಬಹುದು.
ಸಣ್ಣ ಪ್ರಮಾಣದ ವೃತ್ತಿಪರರಿಗೆ ಸೆಕ್ಷನ್ 44ADA ಸರಳ ತೆರಿಗೆ ವ್ಯವಸ್ಥೆಯನ್ನು ಒದಗಿಸುತ್ತದೆ. ಆದರೆ ನಿಜವಾದ ವೆಚ್ಚಗಳು ಹೆಚ್ಚಿನ ಪ್ರಮಾಣದಲ್ಲಿದ್ದರೆ ಸಾಮಾನ್ಯ ತೆರಿಗೆ ವಿಧಾನವನ್ನು ಆಯ್ಕೆ ಮಾಡುವುದು ಲಾಭದಾಯಕವಾಗಬಹುದು.
ವಾರ್ಷಿಕ ತೆರಿಗೆ ಬಾಧ್ಯತೆ ₹10,000 ಮೀರಿದರೆ ಮುಂಗಡ ತೆರಿಗೆ ಪಾವತಿಸುವುದು ಅಗತ್ಯ. ಇದನ್ನು ನಿರ್ಲಕ್ಷಿಸಿದರೆ ತೆರಿಗೆಯ ಜೊತೆಗೆ ಹೆಚ್ಚುವರಿ ಬಡ್ಡಿ ಪಾವತಿಸಬೇಕಾದ ಪರಿಸ್ಥಿತಿ ಎದುರಾಗಬಹುದು.
ಡಿಜಿಟಲ್ ಕ್ಷೇತ್ರದಲ್ಲಿ ಯಶಸ್ಸು ಸಾಧಿಸುವುದರ ಜೊತೆಗೆ ತೆರಿಗೆ ನಿಯಮಗಳನ್ನು ಪಾಲಿಸುವುದೂ ಅಷ್ಟೇ ಮುಖ್ಯ. ಸರಿಯಾದ ದಾಖಲೆ ನಿರ್ವಹಣೆ ಮತ್ತು ಸಮಯಕ್ಕೆ ಸರಿಯಾಗಿ ರಿಟರ್ನ್ಸ್ ಸಲ್ಲಿಸುವ ಮೂಲಕ ಭವಿಷ್ಯದಲ್ಲಿ ಕಾನೂನು ಸಂಬಂಧಿತ ಸಮಸ್ಯೆಗಳನ್ನು ತಪ್ಪಿಸಿಕೊಳ್ಳಬಹುದು.
