Gold Price: ಚಿನ್ನದ ಬೆಲೆ ನಿರ್ಧಾರ ಮಾಡೋದು ಯಾರು? ಚಿನ್ನದ ಬೆಲೆ ಇಳಿಕೆ, ಏರಿಕೆ ಯಾರು ನಿಗದಿ ಮಾಡ್ತಾರೆ ಗೊತ್ತಾ?
Gold Price: ಪ್ರತಿ ದಿನ ಚಿನ್ನ-ಬೆಳ್ಳಿ ಬೆಲೆ ಏರಿಕೆ, ಇಳಿಕೆ ಕಂಡು ಜನರಲ್ಲಿ ಗೊಂದಲ ಸೃಷ್ಟಿಯಾಗುತ್ತಿದೆ. ಸರ್ಕಾರವೇ ನಿಗದಿ ಮಾಡುತ್ತದೆ ಎನ್ನುವ ಭ್ರಮೆ ಇದ್ದರೂ, ನಿಜವಾಗಿ ಬೇರೆ ಸಂಸ್ಥೆಗಳು ಬೆಲೆ ನಿರ್ಧಾರದಲ್ಲಿ ಪ್ರಮುಖ ಪಾತ್ರ ವಹಿಸುತ್ತವೆ.
ಚಿನ್ನದ ಬೆಲೆ ನಿಗದಿ ಮಾಡುವುದು ಯಾರು?
Gold Price: ಇತ್ತೀಚಿನ ದಿನಗಳಲ್ಲಿ ಚಿನ್ನ ಮತ್ತು ಬೆಳ್ಳಿ ಬೆಲೆಗಳು ಸಾಮಾನ್ಯ ಜನರಿಗೆ ಕೈಗೆಟುಕದಂತಾಗಿವೆ. ಮದುವೆ, ಹಬ್ಬ, ಶುಭಕಾರ್ಯ ಬಂದಾಗ ಚಿನ್ನ ಖರೀದಿಸುವುದು ನಮ್ಮ ಸಂಪ್ರದಾಯ. ಆದರೆ ಅಂಗಡಿಗೆ ಹೋದಾಗ ಪ್ರತಿ ದಿನ ಬದಲಾದ ದರ ನೋಡಿದರೆ ಹಲವರು ಆಶ್ಚರ್ಯಗೊಳ್ಳುತ್ತಾರೆ.
ಬಹುತೇಕ ಜನರು ಚಿನ್ನದ ಬೆಲೆಗಳನ್ನು ಕೇಂದ್ರ ಸರ್ಕಾರ ಅಥವಾ ರಿಸರ್ವ್ ಬ್ಯಾಂಕ್ ನಿಗದಿ ಮಾಡುತ್ತದೆ ಎಂದು ಭಾವಿಸುತ್ತಾರೆ. ಕೆಲವರು “ಸರ್ಕಾರ ಬೆಲೆ ಹೆಚ್ಚಿಸಿದೆ” ಎಂದು ಮಾತಾಡುತ್ತಾರೆ. ಆದರೆ ವಾಸ್ತವದಲ್ಲಿ ಈ ನಿರ್ಧಾರ ಸರ್ಕಾರದ ನೇರ ನಿಯಂತ್ರಣದಲ್ಲಿ ಇರುವುದಿಲ್ಲ.
ಐಬಿಜೆಎ ಹೇಗೆ ಕೆಲಸ ಮಾಡುತ್ತದೆ?
ದೇಶದ ಪ್ರಮುಖ ಚಿನ್ನ ಡೀಲರ್‌ಗಳು ಮತ್ತು ಜುವೆಲ್ಲರ್ಸ್‌ಗಳಿಂದ ಖರೀದಿ-ಮಾರಾಟದ ಕೋಟ್‌ಗಳನ್ನು ಸಂಗ್ರಹಿಸುವ Indian Bullion and Jewellers Association (IBJA) ಪ್ರತಿದಿನ ಸರಾಸರಿ ಬೆಂಚ್ ಮಾರ್ಕ್ ದರವನ್ನು ಲೆಕ್ಕ ಹಾಕುತ್ತದೆ. ಇದೇ ದರವನ್ನು ಆಧರಿಸಿ ಮಾರುಕಟ್ಟೆಯಲ್ಲಿ ಚಿನ್ನ-ಬೆಳ್ಳಿ ಬೆಲೆ ಪ್ರಕಟವಾಗುತ್ತದೆ.
ಅಂದರೆ, ದೇಶದಾದ್ಯಂತ ನಡೆಯುವ ವಹಿವಾಟಿನ ಸರಾಸರಿ ಅಂಕಿ-ಅಂಶವೇ ಅಂತಿಮ ದರಕ್ಕೆ ಕಾರಣವಾಗುತ್ತದೆ. ಹೀಗಾಗಿ ಬೆಲೆಗಳು ಪ್ರತಿದಿನ ಸ್ವಲ್ಪಸ್ವಲ್ಪ ಬದಲಾಗುತ್ತವೆ.
ವಿದೇಶಿ ಮಾರುಕಟ್ಟೆ ಪ್ರಭಾವ
ನಾವು ಬಳಸುವ ಚಿನ್ನದ ಬಹುಪಾಲು ವಿದೇಶಗಳಿಂದ ಆಮದು ಆಗುತ್ತದೆ. ಲಂಡನ್, ನ್ಯೂಯಾರ್ಕ್ ಬುಲಿಯನ್ ಮಾರುಕಟ್ಟೆಗಳಲ್ಲಿ ಔನ್ಸ್‌ಗೊಂದು ದರ ಎಷ್ಟು ಎಂಬುದನ್ನು ಗಮನಿಸಿ, ಅದನ್ನು ರೂಪಾಯಿಗೆ ಪರಿವರ್ತಿಸಲಾಗುತ್ತದೆ. ಡಾಲರ್ ಮೌಲ್ಯ ಹೆಚ್ಚಾದರೆ ಅಥವಾ ರೂಪಾಯಿ ದುರ್ಬಲವಾದರೆ, ನಮ್ಮ ದೇಶದಲ್ಲಿ ಚಿನ್ನದ ಬೆಲೆ ಕೂಡ ಏರಿಕೆಯಾಗುತ್ತದೆ.
ಇದಕ್ಕೆ ಜೊತೆಗೆ ಆಮದು ಸುಂಕ, ಜಿಎಸ್ಟಿ, ಸಾರಿಗೆ ವೆಚ್ಚ, ಸ್ಥಳೀಯ ತೆರಿಗೆಗಳು ಸೇರಿ ಅಂತಿಮವಾಗಿ ಗ್ರಾಹಕರಿಗೆ ತಲುಪುವ ದರ ನಿರ್ಧಾರವಾಗುತ್ತದೆ. ಹೀಗಾಗಿ ಕೇವಲ ಒಂದು ಕಾರಣವಲ್ಲ, ಹಲವು ಅಂಶಗಳು ಸೇರಿ ಚಿನ್ನದ ಬೆಲೆ ತೀರ್ಮಾನವಾಗುತ್ತದೆ.
ತುರ್ತು ಅಗತ್ಯವಿಲ್ಲದಿದ್ದರೆ ಬೆಲೆಗಳನ್ನು ಗಮನಿಸಿ ಖರೀದಿ ಮಾಡುವುದು ಉತ್ತಮ ಎಂದು ತಜ್ಞರು ಸಲಹೆ ಕೊಡುತ್ತಾರೆ. ಹೂಡಿಕೆ ದೃಷ್ಟಿಯಿಂದ ನೋಡಿದರೆ, ದೀರ್ಘಕಾಲದಲ್ಲಿ ಚಿನ್ನ ಸುರಕ್ಷಿತ ಆಯ್ಕೆಯಾಗಿದ್ದರೂ, ದಿನನಿತ್ಯದ ಏರಿಳಿತಗಳಿಗೆ ಗಾಬರಿಯಾಗಬಾರದು.
