ಪ್ರಾಣ ತೆಗೆದ ಬಿರಿಯಾನಿ! ಉಪ್ಪು ಜಾಸ್ತಿ ಹಾಕಿದ ಹೆಂಡತಿಯನ್ನು ಹೊಡೆದು ಕೊಂದ ಗಂಡ

• ಬಿರಿಯಾನಿ ಜಗಳ: ಉಪ್ಪು ವಿಚಾರಕ್ಕೆ ವಾಗ್ವಾದ
• ಪತ್ನಿಯ ಮೇಲೆ ನಿರಂತರ ಹಲ್ಲೆ ಆರೋಪ
• ಹತ್ಯೆ ಪ್ರಕರಣ: ಪತಿ ಬಂಧನ, ಪೊಲೀಸ್ ತನಿಖೆ

Biryani Salt Dispute: ಒಂದು ಕ್ಷಣದ ಕೋಪ… ಆದರೆ ಪರಿಣಾಮ ಭೀಕರ. ಬಿರಿಯಾನಿಯಲ್ಲಿ ಉಪ್ಪು ಹೆಚ್ಚು ಎಂದು ಆರಂಭವಾದ ಜಗಳ, ಕೊನೆಗೆ ಮಹಿಳೆಯೊಬ್ಬರ ಪ್ರಾಣ ಕಸಿದುಕೊಂಡಿದೆ. ಈ ಆಘಾತಕಾರಿ ಘಟನೆ ಮುಂಬೈ ನಗರದ ಬಾಯಂಗನ್‌ವಾಡಿ ಪ್ರದೇಶದಲ್ಲಿ ನಡೆದಿದೆ.

ಮೃತ ಮಹಿಳೆಯನ್ನು ನಜಿಯಾ ಪರ್ವೀನ್ ಎಂದು ಗುರುತಿಸಲಾಗಿದ್ದು, ಆಕೆ ತನ್ನ ಪತಿ ಮಂಜಾರ್ ಜೊತೆ ಸುಮಾರು ಎರಡು ವರ್ಷಗಳ ಹಿಂದೆ, ಅಕ್ಟೋಬರ್ 2023ರಲ್ಲಿ ಪ್ರೇಮ ವಿವಾಹವಾಗಿದ್ದಳು. ಆದರೆ ಮದುವೆಯ ನಂತರ ಮಂಜಾರ್‌ನ ವರ್ತನೆ ಸಂಪೂರ್ಣವಾಗಿ ಬದಲಾಗಿದೆ ಎಂದು ನಜಿಯಾದ ಕುಟುಂಬ ಆರೋಪಿಸಿದೆ.

ಸಣ್ಣ ಸಣ್ಣ ವಿಚಾರಗಳಿಗೂ ನಜಿಯಾದ ಮೇಲೆ ಹಲ್ಲೆ ನಡೆಸುತ್ತಿದ್ದನೆಂದು ಕುಟುಂಬದವರು ಪೊಲೀಸರಿಗೆ ಮಾಹಿತಿ ನೀಡಿದ್ದಾರೆ.

ಇದನ್ನೂ ಓದಿ: ನಿತ್ಯ ವಧುವಿನ ಮದುವೆ ಮೋಸ: ಯುವಕರೇ ಗುರಿ, ರಾತ್ರೋ-ರಾತ್ರಿ ಲಕ್ಷಗಳೊಂದಿಗೆ ಪರಾರಿ

ಕುಟುಂಬದ ಹೇಳಿಕೆ ಪ್ರಕಾರ, ಮಂಜಾರ್‌ನ ಹಿಂಸಾತ್ಮಕ ವರ್ತನೆ ದಿನೇದಿನೇ ಹೆಚ್ಚುತ್ತಾ ಹೋಗಿದ್ದು, ಮೂರು ತಿಂಗಳ ಹಿಂದೆ ನಡೆದ ಹಲ್ಲೆಯಲ್ಲಿ ನಜಿಯಾದ ಹಲ್ಲು ಕೂಡ ಮುರಿದಿತ್ತು. ಆದರೂ ಆಕೆ ಸಹಿಸಿಕೊಂಡೇ ಜೀವನ ಸಾಗಿಸುತ್ತಿದ್ದಳು ಎನ್ನಲಾಗಿದೆ.

ಪೊಲೀಸರು ನೀಡಿದ ಮಾಹಿತಿ ಪ್ರಕಾರ, ಡಿಸೆಂಬರ್ 20ರ ರಾತ್ರಿ ನಜಿಯಾ ಮನೆಯಲ್ಲಿ ಬಿರಿಯಾನಿ ತಯಾರಿಸಿದ್ದಳು. ಊಟದ ವೇಳೆ ಬಿರಿಯಾನಿಯಲ್ಲಿ ಉಪ್ಪು ಹೆಚ್ಚು ಎಂದು ಪತಿ ಆಕ್ರೋಶಗೊಂಡಿದ್ದಾನೆ. ಮಾತಿನ ಜಗಳ ತೀವ್ರ ಸ್ವರೂಪ ಪಡೆದು, ಕೋಪದಲ್ಲಿ ಮಂಜಾರ್ ನಜಿಯಾಳ ತಲೆಯನ್ನು ಗೋಡೆಗೆ ಬಲವಾಗಿ ಢಿಕ್ಕಿ ಹೊಡೆಸಿದ್ದಾನೆ.

ಇದನ್ನೂ ಓದಿ: ಮೂರು ವರ್ಷದಲ್ಲಿ ಮೂರು ಮದುವೆ: ಇಬ್ಬರು ಪತ್ನಿಗಳ ದೂರು, ವ್ಯಕ್ತಿ ಅರೆಸ್ಟ್

ತಲೆಗೆ ಗಂಭೀರ ಗಾಯಗಳಾಗಿ, ಅಧಿಕ ರಕ್ತಸ್ರಾವದಿಂದ ನಜಿಯಾ ಸ್ಥಳದಲ್ಲೇ ಸಾವನ್ನಪ್ಪಿದ್ದಾಳೆ. ವಿಷಯ ತಿಳಿದ ತಕ್ಷಣ ಶಿವಾಜಿ ನಗರ ಠಾಣೆಯ ಪೊಲೀಸರು ಸ್ಥಳಕ್ಕೆ ಧಾವಿಸಿ, ಮೃತದೇಹವನ್ನು ಮರಣೋತ್ತರ ಪರೀಕ್ಷೆಗೆ ಕಳುಹಿಸಿದ್ದಾರೆ.

ಆರೋಪಿ ಮಂಜಾರ್ ಇಮಾಮ್ ಹುಸೇನ್ ವಿರುದ್ಧ ಸಂಬಂಧಿತ ಕ್ರಿಮಿನಲ್ ಕಾನೂನು ವಿಧಿಗಳ ಅಡಿಯಲ್ಲಿ ಹತ್ಯೆ ಪ್ರಕರಣ ದಾಖಲಿಸಲಾಗಿದೆ. ಪರಾರಿಯಾಗಲು ಯತ್ನಿಸುತ್ತಿದ್ದ ಆರೋಪಿ ಈಗ ಪೊಲೀಸ್ ವಶದಲ್ಲಿದ್ದು, ಪ್ರಕರಣದ ತನಿಖೆ ಮುಂದುವರಿದಿದೆ.