Country Chicken: ಸಂಕ್ರಾಂತಿ ಡಿಮ್ಯಾಂಡ್! ನಾಟಿಕೋಳಿ ಬೆಲೆ ದುಬಾರಿ ಮಟ್ಟಕ್ಕೆ ಏರಿಕೆ; 2 ಸಾವಿರ ಮೀರಿದ ದರ
ಸಂಕ್ರಾಂತಿ ಹಬ್ಬ ಹತ್ತಿರವಾಗುತ್ತಿದ್ದಂತೆ ನಾಟಿಕೋಳಿ ಬೆಲೆ ದುಬಾರಿ ಮಟ್ಟಕ್ಕೆ ಏರಿಕೆ ಕಂಡಿದ್ದು ಸರಬರಾಜು ಕಡಿಮೆಯಾದ ಕಾರಣ ಗ್ರಾಮ ಮತ್ತು ನಗರ ಮಾರುಕಟ್ಟೆಗಳಲ್ಲಿ ಕೇಜಿಗೆ ಎರಡು ಸಾವಿರ ಮೀರಿದ ದರಗಳು ಗ್ರಾಹಕರಿಗೆ ದೊಡ್ಡ ಶಾಕ್ ನೀಡಿವೆ
- ನಾಟಿಕೋಳಿ ಬೆಲೆ ಸಂಕ್ರಾಂತಿಗೆ ಕೇಜಿಗೆ ₹2,500 ಸಮೀಪ
- ಬಾಯ್ಲರ್ ಕೋಳಿ ಮತ್ತು ನಾಟಿಕೋಳಿಗೆ ಬೇಡಿಕೆ ಜಾಸ್ತಿ
- ಸಂಕ್ರಾಂತಿ ಡಿಮ್ಯಾಂಡ್ ಕಾರಣ ಬೆಲೆ ದುಬಾರಿ
Country Chicken Price: ಸಂಕ್ರಾಂತಿ ಹಬ್ಬ (Sankranti Festival) ಬಂದಾಗ ನಾಟಿಕೋಳಿ ಮಾಂಸಕ್ಕೆ ಬೇಡಿಕೆ ಹೆಚ್ಚಾಗುವುದು ಹೊಸದೇನಲ್ಲ. ದೇವರಿಗೆ ಹರಕೆ ತೀರಿಸುವುದು, ಹಬ್ಬದ ಊಟಕ್ಕೆ ವಿಶೇಷ ಅಡುಗೆ ಮಾಡುವ ಸಂಪ್ರದಾಯದ ಕಾರಣ ಜನರು ಬಾಯ್ಲರ್ ಚಿಕನ್ ಬದಲು ನಾಟಿಕೋಳಿಯತ್ತ ಹೆಚ್ಚು ಮೊರೆ ಹೋಗುತ್ತಾರೆ. ಇದೇ ಸಂಪ್ರದಾಯ ಈಗ ಬೆಲೆ ಏರಿಕೆಗೆ (Price Hike) ಪ್ರಮುಖ ಕಾರಣವಾಗಿದೆ.
ಈ ಬಾರಿ ಏಕೆ ಇಷ್ಟು ದುಬಾರಿ?
ಸಾಮಾನ್ಯ ದಿನಗಳಲ್ಲಿ ಕೇಜಿಗೆ ₹1,000 ದಷ್ಟಿದ್ದ ನಾಟಿಕೋಳಿ ಬೆಲೆ, ಹಬ್ಬದ ಸಮಯದಲ್ಲಿ ₹1,500ವರೆಗೆ ಏರಿಕೆಯಾಗುವುದು ಸಹಜ. ಆದರೆ ಈ ಬಾರಿ ಕೋಳಿ ಸಾಕಾಣಿಕೆ ಮಾಡುವವರು ಗ್ರಾಮಗಳಲ್ಲಿ ಕಡಿಮೆಯಾಗಿರುವುದು, ಜೊತೆಗೆ ವೈರಸ್ ಭೀತಿ ಕಾರಣ ಉತ್ಪಾದನೆ ಕುಸಿದಿದೆ. ಇದರ ಪರಿಣಾಮವಾಗಿ ಸರಬರಾಜು ತೀವ್ರವಾಗಿ ಇಳಿದು, ಬೆಲೆ ₹2,000 ರಿಂದ ₹2,500ವರೆಗೆ ಹಾರಿದೆ.
ನಗರಗಳಲ್ಲೂ ಅದೇ ಪರಿಸ್ಥಿತಿ
ಈ ಸಮಸ್ಯೆ ಗ್ರಾಮಗಳಿಗೆ ಮಾತ್ರ ಸೀಮಿತವಾಗಿಲ್ಲ. ನಗರ ಮಾರುಕಟ್ಟೆಗಳಲ್ಲೂ ನಾಟಿಕೋಳಿ ದೊರಕುವುದು ಕಷ್ಟವಾಗಿದೆ. ಕೆಲ ಕಡೆ ಕೇಜಿಗೆ ₹1,800–₹2,000 ವರೆಗೂ ದರ ಹೇಳಲಾಗುತ್ತಿದೆ. ಮಟನ್ ಕೇಜಿಗೆ ₹800 ಇದ್ದರೂ, ನಾಟಿಕೋಳಿ ಅದಕ್ಕಿಂತ ದುಬಾರಿಯಾಗಿರುವುದು ಗ್ರಾಹಕರಿಗೆ ಅಚ್ಚರಿ ತಂದಿದೆ.
ವೈರಸ್ ಪರಿಣಾಮವೂ ಕಾರಣ
ಇತ್ತೀಚೆಗೆ ಕೋಳಿಗಳಲ್ಲಿ ಹರಡುತ್ತಿರುವ ವೈರಸ್‌ಗಳಿಂದ ನಾಟಿಕೋಳಿಗಳ ಸಾವು ಹೆಚ್ಚಾಗಿದೆ. ಈ ಆತಂಕದಿಂದ ಹಲವರು ಕೋಳಿ ಸಾಕುವುದನ್ನೇ ಬಿಟ್ಟಿದ್ದಾರೆ. ಇದರ ಜೊತೆಗೆ ಹಬ್ಬದ ಸಮಯದಲ್ಲಿ ಬಾಯ್ಲರ್ ಚಿಕನ್ ಮೇಲೂ ಒತ್ತಡ ಹೆಚ್ಚಿದ್ದು, ಸ್ಕಿನ್‌ಲೆಸ್ ಚಿಕನ್ ಕೇಜಿಗೆ ₹320 ತಲುಪಿದೆ. ಹಬ್ಬಕ್ಕೆ ಚಿಕನ್ ಊಟ ಅಂದ್ರೆ ಖರ್ಚು ತಪ್ಪದ ಪರಿಸ್ಥಿತಿ ನಿರ್ಮಾಣವಾಗಿದೆ.
