Business Idea: ಮೆಡಿಕಲ್ ಶಾಪ್ ಆರಂಭ ಹೇಗೆ? ಯಾವ ಲೈಸೆನ್ಸ್ ಬೇಕು? ಲಾಭ ಎಷ್ಟಿದೆ ಗೊತ್ತಾ
ಮೆಡಿಕಲ್ ಶಾಪ್ ಆರಂಭಿಸುವುದು ಲಾಭದಾಯಕ ವ್ಯವಹಾರವಾದರೂ ನಿಯಮಗಳು ಕಟ್ಟುನಿಟ್ಟಾಗಿವೆ. ಅಗತ್ಯ ಶಿಕ್ಷಣ, ಲೈಸೆನ್ಸ್ ಹಾಗೂ ಸರ್ಕಾರಿ ಅನುಮತಿ ಇಲ್ಲದಿದ್ದರೆ ಅಂಗಡಿ ತೆರೆಯಲು ಅವಕಾಶವೇ ಸಿಗದು.
- ಮೆಡಿಕಲ್ ಶಾಪ್ ಬಿಸಿನೆಸ್ ಮಾಡಲು ಫಾರ್ಮಸಿ ವಿದ್ಯಾರ್ಹತೆ ಕಡ್ಡಾಯ
- ಮೆಡಿಕಲ್ ಶಾಪ್ ಲೈಸೆನ್ಸ್ ಇಲ್ಲದೆ ಅಂಗಡಿ ತೆರೆದರೆ ರದ್ದು
- ಮೆಡಿಕಲ್ ಶಾಪ್ ಆರಂಭಕ್ಕೆ ಡ್ರಗ್ ಇನ್ಸ್‌ಪೆಕ್ಟರ್ ಅನುಮತಿ ಅಗತ್ಯ
Business Idea: ವ್ಯಾಪಾರ ಆರಂಭಿಸಬೇಕು ಎನ್ನುವ ಆಸಕ್ತಿ ಹಲವರಿಗೆ ಇದ್ದರೂ, ಯಾವ ಬಿಸಿನೆಸ್ ಆಯ್ಕೆ ಮಾಡಬೇಕು ಎಂಬ ಗೊಂದಲ ಸಾಮಾನ್ಯ. ಅಂಥವರಿಗೆ ಸದಾ ಬೇಡಿಕೆಯಲ್ಲಿರುವ ಮತ್ತು ನಿರಂತರ ಆದಾಯ ನೀಡುವ ಆಯ್ಕೆ ಎಂದರೆ ಮೆಡಿಕಲ್ ಶಾಪ್ (Medical Shop). ಅನಾರೋಗ್ಯ ಬಂದಾಗ ಜನರು ಮೊದಲು ಹೋಗುವುದು ಔಷಧಿ ಅಂಗಡಿಗೆ. ಈ ಕಾರಣಕ್ಕೆ ಈ ಬಿಸಿನೆಸ್‌ಗೆ ಬೇಡಿಕೆ ಯಾವಾಗಲೂ ಸ್ಥಿರವಾಗಿದೆ.
ಆದರೆ ಮೆಡಿಕಲ್ ಶಾಪ್ ತೆರೆಯುವುದು ಸಾಮಾನ್ಯ ಅಂಗಡಿ ತೆಗೆಯುವಂತಲ್ಲ. ಔಷಧಿ ಮಾರಾಟ ಜನರ ಆರೋಗ್ಯಕ್ಕೆ ಸಂಬಂಧಿಸಿದ ವಿಷಯವಾಗಿರುವುದರಿಂದ ಸರ್ಕಾರ ಕಟ್ಟುನಿಟ್ಟಿನ ನಿಯಮಗಳನ್ನು ವಿಧಿಸಿದೆ.
ನಿಯಮಗಳನ್ನು ಪಾಲಿಸದೇ ಅಂಗಡಿ ಆರಂಭಿಸಿದರೆ, ಲೈಸೆನ್ಸ್ ರದ್ದು ಮಾಡುವ ಜೊತೆಗೆ ಅಂಗಡಿಯನ್ನು ಮುಚ್ಚುವ ಸಾಧ್ಯತೆಯೂ ಇದೆ.
ಅಗತ್ಯ ವಿದ್ಯಾರ್ಹತೆ ಏನು?
ಮೆಡಿಕಲ್ ಶಾಪ್ ಆರಂಭಿಸಲು ಫಾರ್ಮಸಿ ಕ್ಷೇತ್ರದ ವಿದ್ಯಾರ್ಹತೆ ಕಡ್ಡಾಯ. ಬಿ.ಫಾರ್ಮಸಿ (4 ವರ್ಷ) ಅಥವಾ ಡಿಪ್ಲೊಮಾ ಇನ್ ಫಾರ್ಮಸಿ (D.Pharm) (2 ವರ್ಷ) ಪೂರ್ಣಗೊಳಿಸಿರಬೇಕು. ಈ ಕೋರ್ಸ್‌ಗಳ ಪ್ರಮಾಣಪತ್ರಗಳಿಲ್ಲದೆ ಔಷಧಿ ಮಾರಾಟಕ್ಕೆ ಅನುಮತಿ ಸಿಗುವುದಿಲ್ಲ.
ಲೈಸೆನ್ಸ್ ಮತ್ತು ಸರ್ಕಾರಿ ಅನುಮತಿ
ಮೆಡಿಕಲ್ ಶಾಪ್‌ಗಾಗಿ ರಾಜ್ಯ ಸರ್ಕಾರದ ಡ್ರಗ್ ಕಂಟ್ರೋಲ್ ಇಲಾಖೆಯಿಂದ ಲೈಸೆನ್ಸ್ ಪಡೆಯಬೇಕು. ಜೊತೆಗೆ Pharmacy Council of India ನಿಯಮಗಳಂತೆ ನೋಂದಣಿ ಅಗತ್ಯ. ಅರ್ಜಿಯೊಂದಿಗೆ ವಿದ್ಯಾರ್ಹತಾ ಪ್ರಮಾಣಪತ್ರ, ಅಂಗಡಿಯ ವಿಳಾಸ, ಬಾಡಿಗೆ ಒಪ್ಪಂದ ಅಥವಾ ಸ್ವಂತ ಕಟ್ಟಡದ ದಾಖಲೆಗಳನ್ನು ಸಲ್ಲಿಸಬೇಕು.
ಪರಿಶೀಲನೆ ನಂತರವೇ ಅಂಗಡಿ ಆರಂಭ
ಅರ್ಜಿಯ ಪರಿಶೀಲನೆಯ ಬಳಿಕ ಡ್ರಗ್ ಇನ್ಸ್‌ಪೆಕ್ಟರ್ ಅಂಗಡಿಗೆ ಭೇಟಿ ನೀಡಿ ತಪಾಸಣೆ ನಡೆಸುತ್ತಾರೆ. ಎಲ್ಲ ನಿಯಮಗಳು ಸರಿಯಾಗಿದ್ದರೆ ಮಾತ್ರ ಲೈಸೆನ್ಸ್ ನೀಡಲಾಗುತ್ತದೆ. ಈ ಅನುಮತಿ ಬಂದ ನಂತರವೇ ಮೆಡಿಕಲ್ ಶಾಪ್ ಕಾರ್ಯಾರಂಭ ಮಾಡಬೇಕು. ನಿಯಮ ಉಲ್ಲಂಘಿಸಿದರೆ ಲೈಸೆನ್ಸ್ ರದ್ದು ಆಗುವ ಸಾಧ್ಯತೆ ಇದೆ.
