ಹೋಮ್ ಲೋನ್ ಪಡೆಯಲು ಎಷ್ಟು ಸಿಬಿಲ್ ಸ್ಕೋರ್ ಬೇಕು? ಕಡಿಮೆ ಬಡ್ಡಿಗೆ ಸಾಲ ಪಡೆಯುವ ಮಾರ್ಗ

ಹೋಮ್ ಲೋನ್‌ಗೆ ಸಿಬಿಲ್ ಸ್ಕೋರ್ ಯಾಕೆ ಮುಖ್ಯ?

Home Loan: ಸ್ವಂತ ಮನೆ ಖರೀದಿಸುವುದು ಪ್ರತಿಯೊಬ್ಬರ ಜೀವನದ ದೊಡ್ಡ ಕನಸು. ಆದರೆ ಮನೆ ಖರೀದಿ ಮಾಡಲು ಹೆಚ್ಚಿನ ಹಣ ಬೇಕಾಗುವುದರಿಂದ ಹಲವರು ಹೋಮ್ ಲೋನ್ ಮೇಲೆ ಅವಲಂಬಿತರಾಗುತ್ತಾರೆ. ಹಲವರಿಗೆ ಉತ್ತಮ ಸಂಬಳ ಇದ್ದರೆ ಸಾಲ ಸುಲಭವಾಗಿ ಸಿಗುತ್ತದೆ ಎಂದು ಅನಿಸುತ್ತದೆ. ಆದರೆ ವಾಸ್ತವದಲ್ಲಿ ಬ್ಯಾಂಕುಗಳು ಮೊದಲಿಗೆ ಪರಿಶೀಲಿಸುವುದು ನಿಮ್ಮ ಸಿಬಿಲ್ ಸ್ಕೋರ್ (Credit Score) ಆಗಿದೆ.

ಸಾಲ ಪಡೆದ ನಂತರ ನೀವು ಹಿಂದಿನ ಸಾಲಗಳು ಅಥವಾ ಕ್ರೆಡಿಟ್ ಕಾರ್ಡ್ ಬಿಲ್ಲುಗಳನ್ನು ಸಮಯಕ್ಕೆ ಸರಿಯಾಗಿ ಪಾವತಿಸಿದ್ದೀರಾ ಎಂಬುದನ್ನು ಈ ಸ್ಕೋರ್ ತೋರಿಸುತ್ತದೆ. ಆದ್ದರಿಂದಲೇ ಬ್ಯಾಂಕುಗಳು ಸಾಲ ನೀಡುವ ಮೊದಲು ಅರ್ಜಿದಾರರ ಹಣಕಾಸು ಶಿಸ್ತನ್ನು ಅಳೆಯಲು ಸಿಬಿಲ್ ಸ್ಕೋರ್ ಅನ್ನು ಮುಖ್ಯವಾಗಿ ಪರಿಗಣಿಸುತ್ತವೆ.

ಕ್ರೆಡಿಟ್ ಸ್ಕೋರ್ ಎಂದರೆ ಏನು?

ಕ್ರೆಡಿಟ್ ಸ್ಕೋರ್ ಎಂದರೆ ವ್ಯಕ್ತಿಯ ಹಣಕಾಸಿನ ವಿಶ್ವಾಸಾರ್ಹತೆಯನ್ನು ಸೂಚಿಸುವ ಅಂಕೆ. ಇದು ಸಾಮಾನ್ಯವಾಗಿ 300 ರಿಂದ 900 ನಡುವಿನ ಅಂಕೆಗಳಲ್ಲಿರುತ್ತದೆ. ನೀವು ಹಿಂದಿನ ಸಾಲಗಳನ್ನು ಹೇಗೆ ತೀರಿಸಿದ್ದೀರಿ, ಕ್ರೆಡಿಟ್ ಕಾರ್ಡ್ ಪಾವತಿಗಳನ್ನು ಸಮಯಕ್ಕೆ ಮಾಡಿದೀರಾ ಎಂಬುದರ ಆಧಾರದ ಮೇಲೆ ಈ ಅಂಕೆ ಲೆಕ್ಕ ಹಾಕಲಾಗುತ್ತದೆ.

ಭಾರತದಲ್ಲಿ ಇದನ್ನು ಸಾಮಾನ್ಯವಾಗಿ ಸಿಬಿಲ್ ಸ್ಕೋರ್ ಎಂದು ಕರೆಯಲಾಗುತ್ತದೆ. ಟ್ರಾನ್ಸ್‌ಯೂನಿಯನ್ ಸಿಬಿಲ್, ಎಕ್ಸ್‌ಪೀರಿಯನ್ ಮುಂತಾದ ಸಂಸ್ಥೆಗಳು ಈ ಸ್ಕೋರ್ ಅನ್ನು ಲೆಕ್ಕಿಸಿ ಬ್ಯಾಂಕುಗಳಿಗೆ ನೀಡುತ್ತವೆ.

ಹೋಮ್ ಲೋನ್ ಪಡೆಯಲು ಎಷ್ಟು ಸ್ಕೋರ್ ಬೇಕು?

ಸಾಮಾನ್ಯವಾಗಿ 700 ಕ್ಕಿಂತ ಹೆಚ್ಚು ಸಿಬಿಲ್ ಸ್ಕೋರ್ ಇದ್ದರೆ ಬ್ಯಾಂಕುಗಳು ಹೋಮ್ ಲೋನ್ ನೀಡಲು ಸಿದ್ಧವಾಗುತ್ತವೆ. ನಿಮ್ಮ ಸ್ಕೋರ್ 750 ಅಥವಾ ಅದಕ್ಕಿಂತ ಹೆಚ್ಚು ಇದ್ದರೆ ಬ್ಯಾಂಕುಗಳ ದೃಷ್ಟಿಯಲ್ಲಿ ನೀವು ವಿಶ್ವಾಸಾರ್ಹ ಗ್ರಾಹಕರಾಗಿ ಕಾಣುತ್ತೀರಿ. ಇದರ ಪರಿಣಾಮವಾಗಿ ಕಡಿಮೆ ಬಡ್ಡಿದರದಲ್ಲಿ ಸಾಲ ಪಡೆಯುವ ಅವಕಾಶವೂ ಹೆಚ್ಚುತ್ತದೆ.

ಇದೇ ವೇಳೆ 600 ಕ್ಕಿಂತ ಕಡಿಮೆ ಸ್ಕೋರ್ ಇದ್ದರೆ ಹೋಮ್ ಲೋನ್ ಪಡೆಯುವುದು ಕಷ್ಟವಾಗುತ್ತದೆ. ಕೆಲವೊಮ್ಮೆ ಸಾಲ ಸಿಕ್ಕರೂ ಹೆಚ್ಚಿನ ಬಡ್ಡಿದರ ವಿಧಿಸುವ ಸಾಧ್ಯತೆ ಇರುತ್ತದೆ.

ಸಿಬಿಲ್ ಸ್ಕೋರ್ ಮಾತ್ರ ಸಾಕೇ?

ಬ್ಯಾಂಕುಗಳು ಕೇವಲ ಕ್ರೆಡಿಟ್ ಸ್ಕೋರ್ ನೋಡಿದಷ್ಟೇ ಸಾಲ ಮಂಜೂರು ಮಾಡುವುದಿಲ್ಲ. ನಿಮ್ಮ ಆದಾಯದ ಸ್ಥಿರತೆ, ನೀವು ಖರೀದಿಸಲು ಬಯಸುವ ಮನೆಯ ಮೌಲ್ಯ, ಹಾಗೂ ಆ ಆಸ್ತಿಯ ಮೇಲೆ ಯಾವುದೇ ಕಾನೂನು ಸಮಸ್ಯೆಗಳಿದೆಯೇ ಎಂಬುದನ್ನೂ ಪರಿಶೀಲಿಸಲಾಗುತ್ತದೆ.

ಬ್ಯಾಂಕ್ ಪ್ರತಿನಿಧಿಗಳು ಆಸ್ತಿಯ ಮೌಲ್ಯ ಹಾಗೂ ದಾಖಲೆಗಳನ್ನು ಪರಿಶೀಲಿಸಿ ಎಲ್ಲವೂ ಸರಿಯಾಗಿದ್ದರೆ ಮಾತ್ರ ಹೋಮ್ ಲೋನ್ ಮಂಜೂರು ಮಾಡುತ್ತಾರೆ.

ಸಾಲ ತೆಗೆದುಕೊಳ್ಳುವ ಮೊದಲು ಗಮನಿಸಬೇಕಾದ ವಿಷಯಗಳು

ಹೋಮ್ ಲೋನ್ ಆಯ್ಕೆ ಮಾಡುವಾಗ ಕೇವಲ ಕಡಿಮೆ ಬಡ್ಡಿದರವನ್ನು ಮಾತ್ರ ಗಮನಿಸುವುದು ಸರಿಯಲ್ಲ. ಪ್ರಾಸೆಸಿಂಗ್ ಫೀ, ಅಡಗಿದ ಶುಲ್ಕಗಳು, ವಿಮಾ ವೆಚ್ಚ ಹಾಗೂ ತಡವಾಗಿ ಪಾವತಿಸಿದರೆ ವಿಧಿಸುವ ದಂಡಗಳ ಬಗ್ಗೆ ಕೂಡ ಸಂಪೂರ್ಣ ಮಾಹಿತಿ ಪಡೆಯಬೇಕು.

ಇದೇ ವೇಳೆ ಸಾಲದ ಅವಧಿಯೂ ಮಹತ್ವದ್ದಾಗಿದೆ. ಅವಧಿ ಹೆಚ್ಚು ಇದ್ದರೆ EMI ಕಡಿಮೆ ಇರುತ್ತದೆ, ಆದರೆ ಒಟ್ಟು ಬಡ್ಡಿ ಹೆಚ್ಚು ಪಾವತಿಸಬೇಕಾಗುತ್ತದೆ. ಅವಧಿ ಕಡಿಮೆ ಇದ್ದರೆ EMI ಹೆಚ್ಚಾದರೂ ಬಡ್ಡಿ ಭಾರ ಕಡಿಮೆ ಆಗುತ್ತದೆ. ಆದ್ದರಿಂದ ನಿಮ್ಮ ಆದಾಯ ಮತ್ತು ಸಾಮರ್ಥ್ಯವನ್ನು ಗಮನಿಸಿ ಸರಿಯಾದ ನಿರ್ಧಾರ ತೆಗೆದುಕೊಳ್ಳುವುದು ಉತ್ತಮ.