New Rules: ಪ್ಯಾನ್ ಕಾರ್ಡ್, ಸಿಬಿಲ್, ಗ್ಯಾಸ್ ಬೆಲೆ; ಜನವರಿ 1ರಿಂದ ಎಲ್ಲವೂ ಬದಲಾಯ್ತು! ಹೊಸ ರೂಲ್ಸ್
ಜನವರಿ 1ರಿಂದ ದೇಶದಲ್ಲಿ ಹೊಸ ನಿಯಮಗಳು ಜಾರಿಗೆ ಬಂದಿದ್ದು ಆದಾಯ ತೆರಿಗೆ ಸಿಬಿಲ್ ಪಾನ್-ಆಧಾರ್ ಎಲ್‌ಪಿಜಿ ಬೆಲೆ ಬದಲಾವಣೆಗಳು ಜನಸಾಮಾನ್ಯರ ಹಣಕಾಸಿನ ಮೇಲೆ ನೇರ ಪರಿಣಾಮ ಬೀರುತ್ತವೆ
- ಜನವರಿ 1 ಹೊಸ ನಿಯಮಗಳು ಬದಲಾವಣೆ
- ಸಿಬಿಲ್ ಸ್ಕೋರ್ ಅಪ್‌ಡೇಟ್ ನಿಯಮ
- ಪಾನ್-ಆಧಾರ್ ಲಿಂಕ್, ಎಲ್‌ಪಿಜಿ ಬೆಲೆ
ಹೊಸ ವರ್ಷಕ್ಕೆ ಕಾಲಿಟ್ಟಂತೆ, ದೇಶದ ಹಣಕಾಸು ವ್ಯವಸ್ಥೆಯಲ್ಲಿ ಹಲವು ಬದಲಾವಣೆಗಳು ಜಾರಿಗೆ ಬಂದಿವೆ. ಕ್ಯಾಲೆಂಡರ್ ಮಾತ್ರವಲ್ಲ, ನಿಯಮಗಳೂ ಬದಲಾಗಿವೆ. ಜನವರಿ 1ರಿಂದ ಅನ್ವಯವಾಗಿರುವ ಈ ನಿಯಮಗಳನ್ನು ತಿಳಿದುಕೊಳ್ಳದೆ ಇದ್ದರೆ, ನೇರವಾಗಿ ನಿಮ್ಮ ಹಣಕಾಸಿನ ಮೇಲೆ ಪರಿಣಾಮ ಬೀರುವ ಸಾಧ್ಯತೆ ಇದೆ.
ಆದಾಯ ತೆರಿಗೆ ರಿಟರ್ನ್ಸ್ ಗಡುವು ಮುಕ್ತಾಯ
2025–26 ಹಣಕಾಸು ವರ್ಷಕ್ಕೆ ಸಂಬಂಧಿಸಿದ ಆದಾಯ ತೆರಿಗೆ ರಿಟರ್ನ್ಸ್ ಸಲ್ಲಿಸುವ ಕೊನೆಯ ಅವಕಾಶ ಡಿಸೆಂಬರ್ 31ರೊಂದಿಗೆ ಮುಕ್ತಾಯವಾಗಿದೆ. ಈಗ ಹೊಸ ವರ್ಷದಿಂದ ಐಟಿಆರ್ ಹಾಗೂ ಐಟಿಆರ್-U ಸಲ್ಲಿಕೆಗೆ ಅವಕಾಶ ಇಲ್ಲ. ಇದರಿಂದಾಗಿ ಇನ್ನೂ ರಿಟರ್ನ್ಸ್ ಸಲ್ಲಿಸದವರು ದಂಡ ಹಾಗೂ ಇತರ ಸಮಸ್ಯೆಗಳನ್ನು ಎದುರಿಸಬೇಕಾಗುತ್ತದೆ.
ಸಿಬಿಲ್ ಸ್ಕೋರ್ ಅಪ್‌ಡೇಟ್‌ನಲ್ಲಿ ಹೊಸ ವ್ಯವಸ್ಥೆ
ಈವರೆಗೆ ಬ್ಯಾಂಕ್‌ಗಳು 15 ದಿನಕ್ಕೊಮ್ಮೆ ಮಾತ್ರ ಸಿಬಿಲ್ ಸ್ಕೋರ್ ಅನ್ನು ಅಪ್‌ಡೇಟ್ ಮಾಡುತ್ತಿದ್ದವು. ಆದರೆ ಜನವರಿ 1ರಿಂದ ಈ ಪ್ರಕ್ರಿಯೆ ವೇಗ ಪಡೆದು, ವಾರಕ್ಕೆ ಒಂದು ಬಾರಿ ಕ್ರೆಡಿಟ್ ಸ್ಕೋರ್ ಅಪ್‌ಡೇಟ್ ಕಡ್ಡಾಯವಾಗಿದೆ. ಇದರಿಂದ ಸಾಲ, ಕ್ರೆಡಿಟ್ ಕಾರ್ಡ್ ಪಡೆಯುವಲ್ಲಿ ಬದಲಾವಣೆಗಳು ತಕ್ಷಣವೇ ಗೋಚರವಾಗಲಿವೆ.
ಪಾನ್-ಆಧಾರ್ ಲಿಂಕ್‌ಗೆ ಡೆಡ್‌ಲೈನ್ ಅಂತ್ಯ
ಪಾನ್ ಕಾರ್ಡ್ ಅನ್ನು ಆಧಾರ್‌ಗೆ ಲಿಂಕ್ ಮಾಡುವ ಗಡುವು ಡಿಸೆಂಬರ್ 31ರೊಂದಿಗೆ ಮುಕ್ತಾಯಗೊಂಡಿದೆ. ಲಿಂಕ್ ಮಾಡದೇ ಇದ್ದರೆ ಪಾನ್ ಕಾರ್ಡ್ ನಿಷ್ಕ್ರಿಯವಾಗುವ ಸಾಧ್ಯತೆ ಇದ್ದು, ಬ್ಯಾಂಕಿಂಗ್ ಹಾಗೂ ಹಣಕಾಸು ವ್ಯವಹಾರಗಳಲ್ಲಿ ಅಡಚಣೆ ಉಂಟಾಗಬಹುದು.
ಎಲ್‌ಪಿಜಿ ಸಿಲಿಂಡರ್ ಬೆಲೆ ಬದಲಾವಣೆ
ಪ್ರತಿ ತಿಂಗಳ ಮೊದಲ ದಿನ ಎಲ್‌ಪಿಜಿ ಸಿಲಿಂಡರ್ ಬೆಲೆಯಲ್ಲಿ ಬದಲಾವಣೆ ಸಾಮಾನ್ಯ. ಜನವರಿ 1ರಿಂದ ಹೊಸ ದರಗಳು ಜಾರಿಯಾಗುತ್ತವೆ. ಗೃಹ ಬಳಕೆಯ ಸಿಲಿಂಡರ್ ದರ ಸ್ಥಿರವಾಗಿದ್ದರೂ, ವಾಣಿಜ್ಯ ಗ್ಯಾಸಿನ ದರದಲ್ಲಿ ಏರಿಕೆ ಆಗಿದೆ.
ಇಂಡಿಯನ್ ಆಯಿಲ್ ಕಾರ್ಪೊರೇಷನ್ (IOCL) ಮಾಹಿತಿ ಪ್ರಕಾರ, ವಾಣಿಜ್ಯ ಬಳಕೆಯ ಗ್ಯಾಸ್ ಸಿಲಿಂಡರ್ ದರದಲ್ಲಿ ₹100ಕ್ಕಿಂತ ಹೆಚ್ಚು ಏರಿಕೆ ದಾಖಲಾಗಿದೆ. ಇದು ನವೆಂಬರ್ 2023 ನಂತರ ಕಂಡುಬಂದ ಮೊದಲ ದೊಡ್ಡ ಬೆಲೆ ಜಿಗಿತವಾಗಿದೆ.
ಒಟ್ಟಿನಲ್ಲಿ, ಹೊಸ ವರ್ಷದ ಮೊದಲ ದಿನವೇ ಜಾರಿಗೆ ಬಂದಿರುವ ಈ ನಿಯಮಗಳು ನಿಮ್ಮ ದಿನನಿತ್ಯದ ಹಣಕಾಸು ನಿರ್ವಹಣೆಯನ್ನು ನೇರವಾಗಿ ಸ್ಪರ್ಶಿಸುತ್ತವೆ. ಮುಂಚಿತವಾಗಿ ತಿಳಿದುಕೊಂಡು ಕ್ರಮವಹಿಸುವುದೇ ಉತ್ತಮ.
