ಕಾಣೆಯಾದ ಗಿಳಿಯನ್ನು ಪತ್ತೆಹಚ್ಚಿಕೊಟ್ಟವರಿಗೆ ₹1 ಲಕ್ಷ ಬಹುಮಾನ ಘೋಷಿಸಿದ ಕುಟುಂಬ
African Grey Parrot: ಮನೆಯವರ ಪ್ರೀತಿಯ ಸದಸ್ಯನಂತಿದ್ದ ಆರು ತಿಂಗಳ ಗಿಳಿ ನಾಪತ್ತೆಯಾಗಿದ್ದು, ಪತ್ತೆಹಚ್ಚಲು ಕುಟುಂಬ ಹಗಲಿರುಳು ಹುಡುಕಾಟ ನಡೆಸುತ್ತಿದೆ. ಸಾರ್ವಜನಿಕರು ಮಾಹಿತಿ ನೀಡಿದರೆ ಒಂದು ಲಕ್ಷ ರೂಪಾಯಿ ಬಹುಮಾನ ನೀಡುವುದಾಗಿ ಕುಟುಂಬ ಘೋಷಿಸಿದೆ.
African Grey Parrot: ಗುಜರಾತ್‌ನ ವಡೋದರಾದಲ್ಲಿ ಸಾಕುಪ್ರಾಣಿಯ ಮೇಲಿನ ಕುಟುಂಬದ ಪ್ರೀತಿ ಈಗ ಎಲ್ಲರ ಗಮನ ಸೆಳೆದಿದೆ. ಮನೆಯ ಸದಸ್ಯನಂತೆಯೇ ಬೆಳೆಸಿದ್ದ ‘ಲಡ್ಡು’ ಎಂಬ ಆಫ್ರಿಕನ್ ಗ್ರೇ ತಳಿಯ ಗಿಳಿ ಕಾಣೆಯಾಗಿದ್ದು, ಅದನ್ನು ಹುಡುಕಿಕೊಡುವವರಿಗೆ ಬರೋಬ್ಬರಿ ಒಂದು ಲಕ್ಷ ರೂಪಾಯಿ ಬಹುಮಾನ ನೀಡುವುದಾಗಿ ಕುಟುಂಬ ತಿಳಿಸಿದೆ.
ಅಕ್ಟೋಬರ್ 31ರ ಸಂಜೆ ಈ ಘಟನೆ ನಡೆದಿದೆ. ವಡೋದರಾದ ಸೇವಸಿ ರಸ್ತೆ ಪ್ರದೇಶದಲ್ಲಿರುವ ಮನೆಯಲ್ಲಿ ಪಂಜರದ ಬಾಗಿಲು ತೆರೆದಿದ್ದರಿಂದ ಆರು ತಿಂಗಳ ಪುಟ್ಟ ಗಿಳಿ ಹೊರಗೆ ಹಾರಿಹೋಗಿದೆ. ಅಂದಿನಿಂದ ಕುಟುಂಬದವರು ಗಿಳಿಗಾಗಿ ಹುಡುಕಾಟ ಆರಂಭಿಸಿದ್ದಾರೆ. ಸೇವಸಿ, ಗೋತ್ರಿ ಮತ್ತು ಭಾಯ್ಲಿ ಸೇರಿದಂತೆ ಸುತ್ತಮುತ್ತಲಿನ ಪ್ರದೇಶಗಳಲ್ಲಿ ಗಿಳಿಯನ್ನು ಪತ್ತೆಹಚ್ಚಲು ಪ್ರಯತ್ನಿಸಿದ್ದಾರೆ.
ಗಿಳಿಯ ಧ್ವನಿಯನ್ನು ಧ್ವನಿವರ್ಧಕಗಳಲ್ಲಿ ಪ್ಲೇ ಮಾಡುವುದರ ಜೊತೆಗೆ, ಶಿಳ್ಳೆ ಹೊಡೆಯುತ್ತಾ ಅದರ ಗಮನ ಸೆಳೆಯಲು ಪ್ರಯತ್ನಿಸಿದ್ದಾರೆ. ಆದರೂ ಇದುವರೆಗೆ ಯಾವುದೇ ಸುಳಿವು ಸಿಕ್ಕಿಲ್ಲ. ಹೀಗಾಗಿ ಕುಟುಂಬದ ಆತಂಕ ದಿನದಿಂದ ದಿನಕ್ಕೆ ಹೆಚ್ಚಾಗುತ್ತಿದೆ.
ಲಡ್ಡುವನ್ನು ಮನೆಯ ಮಗುವಿನಂತೆಯೇ ನೋಡಿಕೊಳ್ಳುತ್ತಿದ್ದೇವೆ ಎಂದು ಕುಟುಂಬದ ಸದಸ್ಯೆ ಜೆಸ್ಸಿಕಾ ಪಾರಿಖ್ (Jessica Parikh) ಭಾವುಕರಾಗಿದ್ದಾರೆ. ಗಿಳಿಗೆ ಸ್ವತಃ ಆಹಾರ ಸೇವಿಸುವ ಅಭ್ಯಾಸವಿಲ್ಲ. ಪ್ರತಿದಿನ ತಾವೇ ಅದಕ್ಕೆ ಆಹಾರ ತಿನ್ನಿಸುತ್ತಿದ್ದೆವು. ಇದೀಗ ನಾಲ್ಕು ದಿನಗಳಿಂದ ಅದಕ್ಕೆ ಊಟ ಸಿಕ್ಕಿದೆಯೋ ಇಲ್ಲವೋ ಎಂಬ ಚಿಂತೆ ಕಾಡುತ್ತಿದೆ ಎಂದು ಅವರು ತಮ್ಮ ನೋವು ಹಂಚಿಕೊಂಡಿದ್ದಾರೆ.
ಇನ್ನೊಂದೆಡೆ, ಆಫ್ರಿಕನ್ ಗ್ರೇ (African Grey Parrot) ಗಿಳಿಗಳು ಮನುಷ್ಯರ ಧ್ವನಿಯನ್ನು ಅನುಕರಿಸುವ ಸಾಮರ್ಥ್ಯ ಮತ್ತು ಹೆಚ್ಚಿನ ಬುದ್ಧಿವಂತಿಕೆಗೆ ಹೆಸರುವಾಸಿಯಾಗಿವೆ. ಪಶ್ಚಿಮ ಮತ್ತು ಮಧ್ಯ ಆಫ್ರಿಕಾದಲ್ಲಿ ಈ ತಳಿಯ ಗಿಳಿಗಳು ಅಳಿವಿನ ಅಪಾಯವನ್ನು ಎದುರಿಸುತ್ತಿವೆ.
ತಮ್ಮ ಮುದ್ದಿನ ಲಡ್ಡು ಮತ್ತೆ ಮನೆಗೆ ಮರಳಲಿ ಎಂಬ ನಿರೀಕ್ಷೆಯಲ್ಲಿರುವ ಪಾರಿಖ್ ಕುಟುಂಬ, ಸಾರ್ವಜನಿಕರು ಗಿಳಿಯನ್ನು ಎಲ್ಲಿಯಾದರೂ ಕಂಡರೆ ಮಾಹಿತಿ ನೀಡುವಂತೆ ಮನವಿ ಮಾಡಿದೆ. ಗಿಳಿಯನ್ನು ಸುರಕ್ಷಿತವಾಗಿ ಮರಳಿ ತಂದುಕೊಡುವವರಿಗೆ ₹1 ಲಕ್ಷ ಬಹುಮಾನ ನೀಡುವುದಾಗಿಯೂ ಪುನರುಚ್ಚರಿಸಿದೆ.
ಕರ್ನಾಟಕ ರಾಜ್ಯದ ಮೂಲೆಮೂಲೆಗಳ ಕನ್ನಡ ಸುದ್ದಿಗಳ ಜೊತೆಗೆ ದಿನದ ಪ್ರಮುಖ ಬೆಳವಣಿಗೆಗಳನ್ನು Kannada News Today ಮೂಲಕ ತಿಳಿಯಿರಿ.
