ಗೃಹಲಕ್ಷ್ಮಿ ಯೋಜನೆ ವಿವಾದಕ್ಕೆ ಹೊಸ ತಿರುವು; ಸಿಎಜಿ ವರದಿಗೆ ಇಲಾಖೆ ಉತ್ತರ

ಬೆಂಗಳೂರು, ಜೂನ್ 26: ಗೃಹಲಕ್ಷ್ಮಿ ಯೋಜನೆಯ ಪಾವತಿ ಪ್ರಕ್ರಿಯೆಯಲ್ಲಿ ಲೋಪಗಳಿರುವ ಕುರಿತು ಸಿಎಜಿ ವರದಿಯಲ್ಲಿ ಉಲ್ಲೇಖವಾದ ಬೆನ್ನಲ್ಲೇ ಮಹಿಳಾ ಮತ್ತು ಮಕ್ಕಳ ಅಭಿವೃದ್ಧಿ ಇಲಾಖೆ ತನ್ನ ಅಧಿಕೃತ ಸ್ಪಷ್ಟೀಕರಣವನ್ನು ಪ್ರಕಟಿಸಿದೆ. ಯೋಜನೆಯ ಹಣವನ್ನು ಆಧಾರ್ ಆಧಾರಿತ ಪಾವತಿ ವ್ಯವಸ್ಥೆ (ABPS) ಮೂಲಕವೇ ವರ್ಗಾವಣೆ ಮಾಡಲಾಗುತ್ತಿದ್ದು, ವರದಿಯಲ್ಲಿ ಉಲ್ಲೇಖವಾದ ಕೆಲವು ಪ್ರಕರಣಗಳು ತಾಂತ್ರಿಕ ಹಾಗೂ ಬ್ಯಾಂಕಿಂಗ್ ಪ್ರಕ್ರಿಯೆಗೆ ಸಂಬಂಧಿಸಿದವು ಎಂದು ಇಲಾಖೆ ತಿಳಿಸಿದೆ.

ಒಂದೇ ಬ್ಯಾಂಕ್ ಖಾತೆಗೆ ಒಂದಕ್ಕಿಂತ ಹೆಚ್ಚು ಫಲಾನುಭವಿಗಳ ಹಣ ಜಮೆಯಾಗಿರುವ ಬಗ್ಗೆ ಇಲಾಖೆ ವಿವರಣೆ ನೀಡಿದೆ. ಜಂಟಿ ಬ್ಯಾಂಕ್ ಖಾತೆ ಹೊಂದಿರುವ ಕುಟುಂಬಗಳಲ್ಲಿ ಅತ್ತೆ-ಸೊಸೆ, ತಾಯಿ-ಮಗಳು ಮೊದಲಾದವರು ಪ್ರತ್ಯೇಕ ಪಡಿತರ ಚೀಟಿ ಹೊಂದಿದ್ದರೆ, ಇಬ್ಬರೂ ಅರ್ಹ ಫಲಾನುಭವಿಗಳಾಗಿರುವ ಕಾರಣ ಒಂದೇ ಖಾತೆಗೆ ಅನುದಾನ ಜಮೆಯಾಗುವ ಸಾಧ್ಯತೆ ಇದೆ ಎಂದು ತಿಳಿಸಿದೆ. ಕೆಲ ಸಂದರ್ಭಗಳಲ್ಲಿ ಬ್ಯಾಂಕ್‌ನ ತಾಂತ್ರಿಕ ದೋಷದಿಂದಲೂ ತಪ್ಪಾದ ಖಾತೆ ಮಾಹಿತಿ ಪ್ರತಿಕ್ರಿಯಾ ಕಡತದಲ್ಲಿ ದಾಖಲಾಗಿರಬಹುದು ಎಂದು ಹೇಳಿದೆ.

ಒಂದೇ ಫಲಾನುಭವಿಯ ಹೆಸರಲ್ಲಿ ಹಲವು ಬ್ಯಾಂಕ್ ಖಾತೆಗಳಿರುವ ಪ್ರಕರಣಗಳ ಕುರಿತು ಸಹ ಇಲಾಖೆ ಸ್ಪಷ್ಟನೆ ನೀಡಿದೆ. ಫಲಾನುಭವಿಯೇ ತನ್ನ ಆಧಾರ್ ಸಂಖ್ಯೆಯನ್ನು ಯಾವ ಬ್ಯಾಂಕ್ ಖಾತೆಗೆ ಜೋಡಿಸಬೇಕು ಎಂಬುದನ್ನು ನಿರ್ಧರಿಸುತ್ತಾರೆ. ಅಗತ್ಯವಿದ್ದರೆ NPCI Mapper ಮೂಲಕ ಆಧಾರ್ ಜೋಡಣೆಯನ್ನು ಮತ್ತೊಂದು ಖಾತೆಗೆ ಬದಲಾಯಿಸಬಹುದು. ಈ ಬದಲಾವಣೆಯ ನಂತರ ಸರ್ಕಾರಿ ಸೌಲಭ್ಯ ಹೊಸ ಖಾತೆಗೆ ಜಮೆಯಾಗುತ್ತದೆ. ಆದರೆ ಒಂದೇ ತಿಂಗಳಲ್ಲಿ ಒಂದಕ್ಕಿಂತ ಹೆಚ್ಚು ಖಾತೆಗಳಿಗೆ ಹಣ ವರ್ಗಾವಣೆಯಾಗಿಲ್ಲ ಎಂದು ಇಲಾಖೆ ಸ್ಪಷ್ಟಪಡಿಸಿದೆ.

ಇನ್ನೊಂದು ಅಂಶವಾಗಿ, ಕೆಲವು ಫಲಾನುಭವಿಗಳ ಪಾವತಿ ದಾಖಲೆಗಳಲ್ಲಿ ಬ್ಯಾಂಕ್ ಖಾತೆ ವಿವರಗಳು ಕಾಣಿಸದಿರುವ ಪ್ರಕರಣಗಳ ಬಗ್ಗೆ ಮಾಹಿತಿ ನೀಡಲಾಗಿದೆ. ಬ್ಯಾಂಕ್‌ಗಳ ತಾಂತ್ರಿಕ ಸಮಸ್ಯೆಯಿಂದ ಕೆಲವೊಮ್ಮೆ ಪ್ರತಿಕ್ರಿಯಾ ಕಡತದಲ್ಲಿ ಖಾತೆ ಮಾಹಿತಿ ಲಭ್ಯವಾಗದೇ ಇರಬಹುದು. ನಂತರದ ತಿಂಗಳುಗಳಲ್ಲಿ ಅದೇ ಬ್ಯಾಂಕ್ ಸರಿಯಾದ ವಿವರಗಳನ್ನು ನವೀಕರಿಸಿ ಕಳುಹಿಸಿರುವುದು ಪರಿಶೀಲನೆಯಲ್ಲಿ ಕಂಡುಬಂದಿದೆ ಎಂದು ಇಲಾಖೆ ತಿಳಿಸಿದೆ.

ಸಿಎಜಿ ವರದಿಯಲ್ಲಿ ಉಲ್ಲೇಖವಾದ ಅಂಶಗಳ ಬಗ್ಗೆ ಜಿಲ್ಲಾ ಹಾಗೂ ತಾಲ್ಲೂಕು ಮಟ್ಟದಲ್ಲಿ ಅಧಿಕಾರಿಗಳ ಮೂಲಕ ಸ್ಥಳ ಪರಿಶೀಲನೆ ನಡೆಸಲಾಗಿದೆ. ಈ ಪ್ರಕ್ರಿಯೆಯಲ್ಲಿ ಹಲವು ಪ್ರಕರಣಗಳು ತಾಂತ್ರಿಕ ಹಾಗೂ ಬ್ಯಾಂಕಿಂಗ್ ವ್ಯವಸ್ಥೆಗೆ ಸಂಬಂಧಿಸಿದ್ದು, ಸರ್ಕಾರದ ಪಾವತಿ ವ್ಯವಸ್ಥೆಯಲ್ಲಿ ಉದ್ದೇಶಪೂರ್ವಕ ವ್ಯತ್ಯಾಸ ಕಂಡುಬಂದಿಲ್ಲ ಎಂಬುದು ಇಲಾಖೆಯ ಸ್ಪಷ್ಟನೆ.