ಶ್ರೀರಂಗಪಟ್ಟಣ: ಮೃತ ಭಿಕ್ಷುಕಿಯ ಮನೆಯಲ್ಲಿ ವಿದೇಶಿ ಕರೆನ್ಸಿ ಸೇರಿ ಲಕ್ಷಾಂತರ ರೂಪಾಯಿ ಪತ್ತೆ
ಶ್ರೀರಂಗಪಟ್ಟಣದ 60 ವರ್ಷದ ಭಿಕ್ಷುಕಿಯ ಮನೆಯಲ್ಲಿ ಕಸ ಹಾಗೂ ಹಳೆಯ ವಸ್ತುಗಳ ನಡುವೆ ಲಕ್ಷಾಂತರ ರೂಪಾಯಿ ನಗದು ಪತ್ತೆಯಾಗಿದ್ದು, ಅಮೆರಿಕನ್ ಡಾಲರ್ ಸೇರಿದಂತೆ ಹಲವು ನೋಟುಗಳು ದೊರೆತಿವೆ.
ಮಂಡ್ಯ (Mandya): ಮಂಡ್ಯದಲ್ಲಿ ವೃದ್ಧ ಭಿಕ್ಷುಕಿಯೊಬ್ಬರ (Beggar Woman) ಮನೆಯಲ್ಲಿ ಲಕ್ಷಾಂತರ ರೂಪಾಯಿ ಪತ್ತೆಯಾದ ಘಟನೆ ಚರ್ಚೆಯಲ್ಲಿರುವ ಬೆನ್ನಲ್ಲೇ, ಶ್ರೀರಂಗಪಟ್ಟಣದಲ್ಲೂ ಇದೇ ರೀತಿಯ ಮತ್ತೊಂದು ಅಚ್ಚರಿಯ ಪ್ರಕರಣ ಬೆಳಕಿಗೆ ಬಂದಿದೆ. ಪಟ್ಟಣದ ಪೂರ್ಣಯ್ಯ ಬೀದಿಯಲ್ಲಿರುವ 60 ವರ್ಷದ ಸಾವಿತ್ರಿ ಎಂಬುವರ ಮನೆಯಲ್ಲಿ ಕಸ ಹಾಗೂ ಹಳೆಯ ವಸ್ತುಗಳ ನಡುವೆ 2.5 ಲಕ್ಷ ರೂಪಾಯಿಗೂ ಹೆಚ್ಚು ನಗದು (Cash) ಪತ್ತೆಯಾಗಿದೆ ಎನ್ನಲಾಗಿದೆ.
ಸಾವಿತ್ರಿ ಮತ್ತು ಅವರ ತಾಯಿ ಪಾರ್ವತಿ ಹಲವು ವರ್ಷಗಳಿಂದ ಶ್ರೀರಂಗಪಟ್ಟಣದ ವಿವಿಧ ಪ್ರದೇಶಗಳಲ್ಲಿ ಭಿಕ್ಷೆ ಬೇಡಿ ಜೀವನ ನಡೆಸುತ್ತಿದ್ದರು ಎಂದು ಸ್ಥಳೀಯರು ತಿಳಿಸಿದ್ದಾರೆ. ಸಣ್ಣ ಮನೆಯಲ್ಲಿ ವಿದ್ಯುತ್ ವ್ಯವಸ್ಥೆಯೂ ಇರಲಿಲ್ಲ ಎನ್ನಲಾಗಿದ್ದು, ಪ್ಲಾಸ್ಟಿಕ್, ಕಾಗದ ಹಾಗೂ ಇತರ ತ್ಯಾಜ್ಯಗಳ ನಡುವೆ ಅವರು ಹಣವನ್ನು ಸಂಗ್ರಹಿಸಿಟ್ಟಿದ್ದರು ಎಂದು ತಿಳಿದುಬಂದಿದೆ.
ಮನೆಯೊಳಗೆ ಸಿಕ್ಕ ನೋಟುಗಳ ಬಂಡಲ್
ಸಾವಿತ್ರಿ ವಾಸಿಸುತ್ತಿದ್ದ ಮನೆಯಲ್ಲಿ ಪರಿಶೀಲನೆ ನಡೆಸಿದಾಗ ನೋಟುಗಳ ಬಂಡಲ್ಗಳು, ಚಿಲ್ಲರೆ ಹಣ ಸೇರಿದಂತೆ ಹಲವು ವಸ್ತುಗಳು ಪತ್ತೆಯಾಗಿವೆ. ಒಂದು ಅಮೆರಿಕನ್ ಡಾಲರ್ (US Dollar) ಹಾಗೂ ಹಳೆಯ ₹500 ನೋಟು ಕೂಡ ದೊರೆತಿದೆ ಎನ್ನಲಾಗಿದೆ. ಸುಮಾರು ₹1.85 ಲಕ್ಷ ಮೌಲ್ಯದ ನೋಟುಗಳನ್ನು ಗುರುತಿಸಿ ಎಣಿಸಲಾಗಿದೆ ಎಂದು ಹೇಳಲಾಗಿದ್ದು, ಚಿಲ್ಲರೆ ಹಣವಿದ್ದ ಇನ್ನೂ ಆರು ಚೀಲಗಳ ಹಣವನ್ನು ಸಂಪೂರ್ಣವಾಗಿ ಎಣಿಕೆ ಮಾಡಬೇಕಿದೆ.
ಹೀಗಾಗಿ ಪತ್ತೆಯಾಗಿರುವ ಒಟ್ಟು ಹಣದ ನಿಖರ ಮೊತ್ತ ಇನ್ನಷ್ಟೇ ಸ್ಪಷ್ಟವಾಗಬೇಕಿದೆ. ಕಸದ ರಾಶಿಯ ನಡುವೆ ಇಷ್ಟು ಪ್ರಮಾಣದ ಹಣ ಪತ್ತೆಯಾಗಿರುವುದು ಅಕ್ಕಪಕ್ಕದ ನಿವಾಸಿಗಳಿಗೂ ಅಚ್ಚರಿ ಮೂಡಿಸಿದೆ. ಸಾಮಾನ್ಯ ಜೀವನ ನಡೆಸುತ್ತಿದ್ದ ವೃದ್ಧೆ ಇಷ್ಟು ಹಣವನ್ನು ಹಲವು ವರ್ಷಗಳಿಂದ ಕೂಡಿಟ್ಟಿದ್ದರು ಎಂಬುದು ಸ್ಥಳೀಯರಲ್ಲಿ ಕುತೂಹಲಕ್ಕೆ ಕಾರಣವಾಗಿದೆ.
15 ವರ್ಷಗಳಿಂದ ಭಿಕ್ಷೆ ಬೇಡುತ್ತಿದ್ದ ತಾಯಿ-ಮಗಳು
ಸಾವಿತ್ರಿ ಮತ್ತು ಅವರ ತಾಯಿ ಪಾರ್ವತಿ ಸುಮಾರು 15 ವರ್ಷಗಳಿಂದ ಪಟ್ಟಣದಲ್ಲಿ ಭಿಕ್ಷೆ ಬೇಡಿ ಜೀವನ ನಡೆಸುತ್ತಿದ್ದರು ಎನ್ನಲಾಗಿದೆ. ಶ್ರೀರಂಗನಾಥಸ್ವಾಮಿ ದೇವಸ್ಥಾನ, ಸ್ನಾನ ಘಾಟ್ ಹಾಗೂ ಶ್ರೀ ಗಂಗಾಧರೇಶ್ವರ ಸ್ವಾಮಿ ದೇವಸ್ಥಾನದ ಸುತ್ತಮುತ್ತ ಭಿಕ್ಷೆ ಬೇಡಿ ಹಣ ಸಂಪಾದಿಸುತ್ತಿದ್ದರು ಎಂದು ಸ್ಥಳೀಯರು ಹೇಳಿದ್ದಾರೆ.
ಪಾರ್ವತಿ ಇತ್ತೀಚೆಗೆ ಮೃತಪಟ್ಟಿದ್ದು, ಸಾವಿತ್ರಿ ಇದೀಗ ಮನೆಯಲ್ಲಿ ಒಂಟಿಯಾಗಿ ವಾಸಿಸುತ್ತಿದ್ದರು. ಅವರು ವೃದ್ಧಾಪ್ಯ ವೇತನವನ್ನೂ ಪಡೆಯುತ್ತಿದ್ದರು ಎನ್ನಲಾಗಿದೆ. ಪಾರ್ವತಿಯ ಅಂತ್ಯಕ್ರಿಯೆಯನ್ನು ಸಂಬಂಧಿಕರು ಹಾಗೂ ನೆರೆಹೊರೆಯವರು ಸೇರಿ ನೆರವೇರಿಸಿದ್ದರು ಎಂದು ತಿಳಿದುಬಂದಿದೆ.
ಅಸ್ವಸ್ಥಗೊಂಡಾಗ ನೆರವಿಗೆ ಬಂದ ಸ್ಥಳೀಯರು
ಸಾವಿತ್ರಿ ಅಸ್ವಸ್ಥರಾಗಿದ್ದ ಸಂದರ್ಭದಲ್ಲಿ ಅವರ ಬಗ್ಗೆ ಸ್ಥಳೀಯರಲ್ಲಿ ಕಾಳಜಿ ಮೂಡಿತ್ತು. ಶ್ರೀರಂಗಾಯಕ ಸ್ತ್ರೀ ಶಕ್ತಿ ಸಮಾಜದ ಅಧ್ಯಕ್ಷೆ ವಿಶಾಲಾಕ್ಷಿ ಹಾಗೂ ಸಮೀಪದಲ್ಲೇ ವಾಸಿಸುವ ವೇದಬ್ರಹ್ಮ ಡಾ. ಭಾನು ಪ್ರಕಾಶ್ ಅವರು ಇತರ ನಿವಾಸಿಗಳೊಂದಿಗೆ ಸೇರಿ ಸಾವಿತ್ರಿಯನ್ನು ಭೇಟಿ ಮಾಡಿದ್ದರು ಎಂದು ನೆರೆಹೊರೆಯವರು ತಿಳಿಸಿದ್ದಾರೆ.
ಈ ವೇಳೆ ಮನೆಯೊಳಗಿನ ಪರಿಸ್ಥಿತಿ ಹಾಗೂ ಕಸದ ನಡುವೆ ಹಣ ಸಂಗ್ರಹಿಸಿರುವುದು ಗಮನಕ್ಕೆ ಬಂದಿದೆ ಎನ್ನಲಾಗಿದೆ. ಘಟನೆ ಕುರಿತು ಸ್ಥಳೀಯರಲ್ಲಿ ಚರ್ಚೆ ನಡೆಯುತ್ತಿದ್ದು, ಪತ್ತೆಯಾಗಿರುವ ಹಣದ ಸಂಪೂರ್ಣ ಮೊತ್ತ ಹಾಗೂ ಅದರ ಮುಂದಿನ ಕ್ರಮಗಳ ಬಗ್ಗೆ ಹೆಚ್ಚಿನ ಮಾಹಿತಿ ಇನ್ನಷ್ಟೇ ಲಭ್ಯವಾಗಬೇಕಿದೆ.
