ಕುಟುಂಬ ಸಮೇತ ‘ಬೇಲ್’ ಸಿನಿಮಾ ನೋಡಿ ಬೆಂಬಲಿಸಿ: ಶಿವಣ್ಣ ಮನವಿ
Bail Movie: ನಟ ಶಿವರಾಜ್‌ಕುಮಾರ್ ದಾವಣಗೆರೆಯಲ್ಲಿ ಮಾತನಾಡಿ, ಕುಟುಂಬ ಸಮೇತರಾಗಿ ಚಿತ್ರಮಂದಿರಕ್ಕೆ ಬಂದು ‘ಬೇಲ್’ ಸಿನಿಮಾ ವೀಕ್ಷಿಸಿ ಬೆಂಬಲಿಸುವಂತೆ ಅಭಿಮಾನಿಗಳು ಹಾಗೂ ಕನ್ನಡಿಗರಲ್ಲಿ ಮನವಿ ಮಾಡಿದರು.
ದಾವಣಗೆರೆ (Davanagere): ಕನ್ನಡಿಗರ ಪ್ರೀತಿ ಮತ್ತು ಪ್ರೋತ್ಸಾಹದಿಂದ ‘ಬೇಲ್’ (Bail Kannada Cinema) ಸಿನಿಮಾ ರಾಜ್ಯಾದ್ಯಂತ ಉತ್ತಮ ಪ್ರತಿಕ್ರಿಯೆ ಪಡೆದುಕೊಳ್ಳುತ್ತಿದೆ ಎಂದು ನಟ ಡಾ. ಶಿವರಾಜ್‌ಕುಮಾರ್ (Actor Shivarajkumar) ಸಂತಸ ವ್ಯಕ್ತಪಡಿಸಿದ್ದಾರೆ.
ಸೋಮವಾರ (ಅ.5) ದಾವಣಗೆರೆಯಲ್ಲಿ ನಡೆದ ಸುದ್ದಿಗೋಷ್ಠಿಯಲ್ಲಿ ಮಾತನಾಡಿದ ಅವರು, ‘ಬೇಲ್’ ಚಿತ್ರವು ವಿಭಿನ್ನ ಕಥಾವಸ್ತುವಿನೊಂದಿಗೆ ಮೂಡಿಬಂದಿದ್ದು, ತಮ್ಮ ಪಾತ್ರವೂ ಹೊಸ ರೀತಿಯಲ್ಲಿದೆ. ಸಿನಿಮಾ ಹೇಗೆ ಸ್ವೀಕಾರವಾಗುತ್ತದೆ ಎಂಬ ನಿರೀಕ್ಷೆ ಮತ್ತು ಆತಂಕ ಎರಡೂ ಇತ್ತು. ಆದರೆ ಪ್ರೇಕ್ಷಕರು ಚಿತ್ರವನ್ನು ಮೆಚ್ಚಿಕೊಂಡಿರುವುದು ಖುಷಿ ತಂದಿದೆ ಎಂದು ಹೇಳಿದರು.
ಚಿತ್ರಮಂದಿರಗಳಿಗೆ ಪ್ರೇಕ್ಷಕರು ಬಂದು ಸಿನಿಮಾ ನೋಡುವುದು ಈಗ ಅತ್ಯಂತ ಮುಖ್ಯವಾಗಿದೆ. ಹೀಗಾಗಿ ಅಭಿಮಾನಿಗಳು, ಸ್ನೇಹಿತರು ಹಾಗೂ ಕುಟುಂಬ ಸಮೇತರಾಗಿ ಚಿತ್ರಮಂದಿರಕ್ಕೆ ಬಂದು ‘ಬೇಲ್’ ಸಿನಿಮಾ ನೋಡಿ ಆಶೀರ್ವದಿಸಬೇಕು ಎಂದು ಶಿವಣ್ಣ ಮನವಿ ಮಾಡಿದರು.
ಇದನ್ನೂ ಓದಿ: ಹುಟ್ಟುಹಬ್ಬದಂದು ನಟ ದರ್ಶನ್ ನೆನೆದು ರಚಿತಾ ರಾಮ್ ಭಾವುಕ! ಇಲ್ಲಿದೆ ವಿಡಿಯೋ
ಸಾಯಿ ಕುಮಾರ್ (Sai Kumar) ಹಾಗೂ ಜಯರಾಮ್ ಸುಬ್ರಹ್ಮಣ್ಯಂ ಅವರ ಕಾಂಬಿನೇಷನ್‌ಗೂ ಉತ್ತಮ ಪ್ರತಿಕ್ರಿಯೆ ವ್ಯಕ್ತವಾಗುತ್ತಿದೆ ಎಂದು ಅವರು ಹೇಳಿದರು. ಲೂಸ್ ಮಾದ ಯೋಗಿ, ದೀಕ್ಷಿತ್, ಸಂಜನಾ ಆನಂದ್, ಸಂಗೀತಾ ಕ್ರಿಶ್, ರಮೇಶ್ ಇಂದಿರಾ, ಗೋಪಾಲಕೃಷ್ಣ ದೇಶಪಾಂಡೆ ಸೇರಿದಂತೆ ಚಿತ್ರತಂಡದ ಪ್ರತಿಯೊಬ್ಬರೂ ತಮ್ಮ ಪಾತ್ರಗಳಿಗೆ ನ್ಯಾಯ ಒದಗಿಸಿದ್ದಾರೆ ಎಂದು ಮೆಚ್ಚುಗೆ ವ್ಯಕ್ತಪಡಿಸಿದರು.
‘ಬೇಲ್-2’ (Bail 2) ನಿರ್ಮಾಣದ ನಿರೀಕ್ಷೆಯೂ ಇದೆ ಎಂದು ಶಿವರಾಜ್‌ಕುಮಾರ್ ತಿಳಿಸಿದರು. ಇದೇ ವೇಳೆ ಇದು ತಮ್ಮ 131ನೇ ಸಿನಿಮಾ (131st Film) ಆಗಿದ್ದು, ‘ಎ ಫಾರ್ ಆನಂದ್’ ಹಾಗೂ ‘ಜೈಲರ್-2’ ಸೇರಿದಂತೆ ಹಲವು ಸಿನಿಮಾಗಳು ಬಿಡುಗಡೆ ಹಂತದಲ್ಲಿವೆ ಎಂದು ಮಾಹಿತಿ ನೀಡಿದರು.
ದಾವಣಗೆರೆ ಜನತೆಯ ಪ್ರೀತಿಯನ್ನು ನೆನಪಿಸಿಕೊಂಡ ಶಿವಣ್ಣ, ತಮ್ಮ ಕುಟುಂಬದ ಸಿನಿಮಾಗಳಿಗೆ ಇಲ್ಲಿನ ಅಭಿಮಾನಿಗಳು ಹಿಂದಿನಿಂದಲೂ ಅಪಾರ ಬೆಂಬಲ ನೀಡುತ್ತಿದ್ದಾರೆ ಎಂದರು.
ಇದನ್ನೂ ಓದಿ: ‘ಪ್ರೇಮದ ಊರಲಿ’ ಸಿನಿಮಾಗೆ ಪರಭಾಷೆಗಳಿಂದ ಭರ್ಜರಿ ಆಫರ್! ಪ್ಯಾನ್‌ ಇಂಡಿಯಾ ರಿಲೀಸ್‌ಗೆ ಪ್ಲಾನ್‌
ಅಪ್ಪಾಜಿ ಕಾಲದಿಂದಲೂ ಸಿನಿಮಾಗಳನ್ನು ಶತದಿನೋತ್ಸವ ಹಾಗೂ ಹಲವು ವಾರಗಳ ಕಾಲ ಯಶಸ್ವಿಯಾಗಿ ಪ್ರದರ್ಶಿಸುವ ಮೂಲಕ ದಾವಣಗೆರೆ ಅಭಿಮಾನಿಗಳು ಪ್ರೋತ್ಸಾಹಿಸಿದ್ದಾರೆ. ಪುನೀತ್ ರಾಜ್‌ಕುಮಾರ್ ಅವರ ಸಿನಿಮಾಗಳಿಗೂ ಜನರು ಅದೇ ರೀತಿಯ ಪ್ರೀತಿ ತೋರಿಸುತ್ತಿದ್ದರು ಎಂದು ಸ್ಮರಿಸಿದರು.
ತಂದೆ ಡಾ. ರಾಜ್‌ಕುಮಾರ್ ಅಭಿನಯದ ‘ಭಕ್ತ ಕುಂಬಾರ’ ಸಿನಿಮಾವನ್ನು ಮರುರೂಪದಲ್ಲಿ ಮಾಡುವ ಕನಸು ನನಗಿದೆ ಎಂದು ಶಿವರಾಜ್‌ಕುಮಾರ್ ಹೇಳಿದರು.
ದಾವಣಗೆರೆಗೆ ತಾವು ಹಲವು ಬಾರಿ ಭೇಟಿ ನೀಡಿದ್ದು, ‘ವೇದ’, ‘ಕರಟಕ ದಮನಕ’ ಸೇರಿದಂತೆ ಹಲವು ಸಿನಿಮಾಗಳ ಪ್ರಚಾರಕ್ಕಾಗಿ ಇಲ್ಲಿಗೆ ಬಂದಿರುವುದಾಗಿ ತಿಳಿಸಿದರು.
ನಿರ್ದೇಶಕ ಪವನ್ ಒಡೆಯರ್ (Pawan Wadeyar) ಮಾತನಾಡಿ, ‘ಬೇಲ್’ ವಿಭಿನ್ನ ಕಥೆಯನ್ನು ಹೊಂದಿದ್ದು, ಶಿವರಾಜ್‌ಕುಮಾರ್ ಅವರನ್ನು ಹೊಸ ರೀತಿಯ ಪಾತ್ರದಲ್ಲಿ ತೋರಿಸಲಾಗಿದೆ. ಉತ್ತಮ ಕಥೆಯಿರುವ ಈ ಚಿತ್ರವನ್ನು ಸ್ನೇಹಿತರು ಹಾಗೂ ಕುಟುಂಬದವರೊಂದಿಗೆ ಚಿತ್ರಮಂದಿರಕ್ಕೆ ಬಂದು ವೀಕ್ಷಿಸಿ ಬೆಂಬಲಿಸುವಂತೆ ಮನವಿ ಮಾಡಿದರು.
ಸುದ್ದಿಗೋಷ್ಠಿಯಲ್ಲಿ ಚಿತ್ರದ ನಟ ದೀಕ್ಷಿತ್, ಚಿತ್ರಮಂದಿರದ ಮಾಲೀಕ ಕೆ.ಆರ್. ವೀರಣ್ಣ, ಯೋಗೀಶ್ ಸೇರಿದಂತೆ ಹಲವರು ಉಪಸ್ಥಿತರಿದ್ದರು.
ಕರ್ನಾಟಕ ರಾಜ್ಯದ ಮೂಲೆಮೂಲೆಗಳ ಕನ್ನಡ ಸುದ್ದಿಗಳ ಜೊತೆಗೆ ದಿನದ ಪ್ರಮುಖ ಬೆಳವಣಿಗೆಗಳನ್ನು Kannada News Today ಮೂಲಕ ತಿಳಿಯಿರಿ.
