ನಟ ದರ್ಶನ್ ಕೇಸ್‌ನಲ್ಲಿ ಕೋರ್ಟ್‌ ಖಡಕ್ ಆದೇಶ, ಪೊಲೀಸರ ಎಂಟ್ರಿಗೆ ಬ್ರೇಕ್! ಬಿಗ್ ಅಪ್ಡೇಟ್

• ಪ್ರದೋಷ್ ರಾವ್‌ಗೆ ಸಿಎಆರ್ ಭದ್ರತೆ
• ಕಾಮಾಕ್ಷಿಪಾಳ್ಯ ಪೊಲೀಸರಿಗೆ ಕೋರ್ಟ್ ನಿರ್ಬಂಧ
• ದರ್ಶನ್ ಪರ ವಕೀಲರ ಅರ್ಜಿ ವಿಚಾರಣೆ

ಬೆಂಗಳೂರು (Bengaluru): ರೇಣುಕಸ್ವಾಮಿ ಕೊಲೆ ಪ್ರಕರಣದ (Renukaswamy murder case) ಮಾಫಿ ಸಾಕ್ಷಿ ಪ್ರದೋಷ್ ರಾವ್ (Pradosh Rao) ಅವರನ್ನು ನ್ಯಾಯಾಲಯಕ್ಕೆ ಹಾಜರುಪಡಿಸುವ ವಿಚಾರದಲ್ಲಿ 59ನೇ ಸಿಸಿಎಚ್ ಕೋರ್ಟ್ ಮಹತ್ವದ ನಿರ್ದೇಶನ ನೀಡಿದೆ. ಇನ್ನು ಮುಂದೆ ಅವರನ್ನು ನಗರ ಸಶಸ್ತ್ರ ಮೀಸಲು ಪಡೆ (CAR) ಸಿಬ್ಬಂದಿಯೇ ಭದ್ರತೆಯೊಂದಿಗೆ ಕೋರ್ಟ್‌ಗೆ ಕರೆತರಬೇಕು ಎಂದು ಸೂಚಿಸಲಾಗಿದೆ.

ದರ್ಶನ್ ಪರ ವಕೀಲ ಹಷ್ಮತ್ ಪಾಷಾ (Hashmath Pasha) ಅವರು ಪ್ರದೋಷ್ ರಾವ್ ಅವರ ಹೇಳಿಕೆ ಹಾಗೂ ಅವರನ್ನು ಕೋರ್ಟ್‌ಗೆ ಕರೆತರುವ ವೇಳೆ ನಡೆಯುತ್ತಿರುವ ಪ್ರಕ್ರಿಯೆ ಕುರಿತು ಅನುಮಾನ ವ್ಯಕ್ತಪಡಿಸಿ ಎರಡು ಪ್ರತ್ಯೇಕ ಅರ್ಜಿಗಳನ್ನು ಸಲ್ಲಿಸಿದ್ದರು. ಈ ಅರ್ಜಿಗಳ ವಿಚಾರಣೆ ನಡೆಸಿದ ನ್ಯಾಯಾಧೀಶೆ ಸುಜಾತಾ ಎಂ. ಸಾಂಬ್ರಾಣಿ (Sujatha M. Sambrani) ಅವರು ಶನಿವಾರ ಈ ನಿರ್ದೇಶನ ನೀಡಿದ್ದಾರೆ.

ನ್ಯಾಯಾಲಯದ ಸೂಚನೆಯಂತೆ ಪ್ರದೋಷ್ ರಾವ್ ಅವರನ್ನು ಕೋರ್ಟ್‌ಗೆ ಕರೆತರುವ ಜವಾಬ್ದಾರಿಯನ್ನು ಸಿಎಆರ್ ಸಿಬ್ಬಂದಿ ವಹಿಸಬೇಕು. ಪರಪ್ಪನ ಅಗ್ರಹಾರ ಕಾರಾಗೃಹದ ಅಧಿಕಾರಿಗಳು (Parappana Agrahara Prison) ಇದಕ್ಕೆ ಅಗತ್ಯ ಸಹಕಾರ ನೀಡಬೇಕು. ಆದರೆ ಈ ಸಂದರ್ಭದಲ್ಲಿ ಕಾಮಾಕ್ಷಿಪಾಳ್ಯ ಪೊಲೀಸರು (Kamakshipalya Police) ಜತೆಯಲ್ಲಿ ಬರುವುದು, ಮಧ್ಯಪ್ರವೇಶಿಸುವುದು ಅಥವಾ ಎಸ್ಕಾರ್ಟ್ ನೀಡುವುದು ಇರಬಾರದು ಎಂದು ಕೋರ್ಟ್ ಸ್ಪಷ್ಟಪಡಿಸಿದೆ.

ಪ್ರದೋಷ್ ಅವರನ್ನು ನ್ಯಾಯಾಲಯಕ್ಕೆ ಕರೆತರುವಾಗ ಕಾಮಾಕ್ಷಿಪಾಳ್ಯ ಠಾಣೆಯ ಅಧಿಕಾರಿಗಳೇ ಎಸ್ಕಾರ್ಟ್ ನೀಡುತ್ತಿದ್ದಾರೆ. ಈ ವೇಳೆ ಅವರಿಗೆ ಕೋರ್ಟ್‌ನಲ್ಲಿ ಏನು ಹೇಳಬೇಕು ಎಂಬುದರ ಕುರಿತು ಸೂಚನೆ ನೀಡಲಾಗುತ್ತಿದೆ ಎಂದು ದರ್ಶನ್ ಪರ ವಕೀಲರು ಆರೋಪಿಸಿದ್ದರು. ಸಾಕ್ಷಿಯ ಹೇಳಿಕೆಯ ಮೇಲೆ ಪೊಲೀಸರು ಪ್ರಭಾವ ಬೀರುವ ಸಾಧ್ಯತೆ ಇದೆ ಎಂದು ಆಕ್ಷೇಪಿಸಿ ಅರ್ಜಿ ಸಲ್ಲಿಸಲಾಗಿತ್ತು.

ಇದನ್ನೂ ಓದಿ: ಬೆಂಗಳೂರು: ದೊಡ್ಡಗುಬ್ಬಿ ಕೆರೆಯಲ್ಲಿ ಸಾವಿರಾರು ಮೀನುಗಳು ಸಾವು! ಒಳಚರಂಡಿ ನೀರು ಹರಿದಿರುವ ಶಂಕೆ

ಇದರ ಜತೆಗೆ, ಮಾಫಿ ಸಾಕ್ಷಿಗೆ ನಿರ್ದಿಷ್ಟ ರೀತಿಯಲ್ಲಿ ಹೇಳಿಕೆ ನೀಡುವಂತೆ ಸೂಚಿಸಲಾಗುತ್ತಿದೆ ಎಂಬ ಆರೋಪವನ್ನು ಸಾಕ್ಷಿಗಳ ಹೇಳಿಕೆಯಲ್ಲಿ ದಾಖಲಿಸಬೇಕು ಎಂದು ಮತ್ತೊಂದು ಅರ್ಜಿಯನ್ನೂ ವಕೀಲರು ಸಲ್ಲಿಸಿದ್ದರು.

ಈ ಆರೋಪಕ್ಕೆ ಸರ್ಕಾರಿ ವಿಶೇಷ ಅಭಿಯೋಜಕ ಪಿ. ಪ್ರಸನ್ನ ಕುಮಾರ್ (P. Prasanna Kumar) ಆಕ್ಷೇಪ ವ್ಯಕ್ತಪಡಿಸಿದರು. ಕೋರ್ಟ್‌ನ ನಿರ್ದೇಶನದಂತೆ ಕಾಮಾಕ್ಷಿಪಾಳ್ಯ ಪೊಲೀಸರು ಕೇವಲ ಪೈಲಟ್ ವಾಹನವಾಗಿ ಎಸ್ಕಾರ್ಟ್ ನೀಡುತ್ತಿದ್ದರು. ಭದ್ರತೆಗಾಗಿ ಮಾತ್ರ ಸಿಬ್ಬಂದಿ ಸಾಕ್ಷಿಯ ಜತೆಗಿದ್ದರು ಎಂದು ಅವರು ನ್ಯಾಯಾಲಯಕ್ಕೆ ತಿಳಿಸಿದರು. ಸಿಎಆರ್ ಬಸ್‌ನಲ್ಲಿ ಬಾಡಿ ವೋರ್ನ್ ಕ್ಯಾಮೆರಾ (Body-Worn Camera) ಹೊಂದಿರುವ ಸಿಬ್ಬಂದಿಯೂ ಇದ್ದರು ಎಂದು ಹೇಳಿದರು.

ಇದೇ ವೇಳೆ, ದರ್ಶನ್ ಪರ ವಕೀಲರು ಸೆಪ್ಟೆಂಬರ್ 2ರ ವಿಡಿಯೋವೊಂದನ್ನು ನ್ಯಾಯಾಲಯದ ಗಮನಕ್ಕೆ ತಂದಿದ್ದರು. ಅದರಲ್ಲಿ ಕಾಮಾಕ್ಷಿಪಾಳ್ಯ ಪಿಎಸ್‌ಐ ವಿನಾಯಕ್ ಕಾಣಿಸಿಕೊಂಡಿರುವುದಾಗಿ ವಾದಿಸಲಾಗಿತ್ತು. ಆದರೆ ಆ ವಿಡಿಯೋ ಸಾಕ್ಷ್ಯ ದಾಖಲಿಸುವ ದಿನದ್ದಲ್ಲ ಎಂದು ಪ್ರಸನ್ನ ಕುಮಾರ್ ಸ್ಪಷ್ಟಪಡಿಸಿದರು. ಪಿಎಸ್‌ಐ ವಿನಾಯಕ್ ಅಂದು ರಜೆಯಲ್ಲಿದ್ದರು ಎಂದು ತಿಳಿಸಿ, ಅವರ ರಜೆ ಅರ್ಜಿಯನ್ನೂ ನ್ಯಾಯಾಲಯಕ್ಕೆ ಸಲ್ಲಿಸಿದರು.

ಇದನ್ನೂ ಓದಿ: ಬೆಂಗಳೂರು ಗಾಳಿ ಸೇಫ್ ಆಗಿದೆಯಾ? ಕರ್ನಾಟಕ ರಾಜ್ಯದ ಯಾವ ಪ್ರದೇಶದಲ್ಲಿ ಮಾಲಿನ್ಯ ಹೆಚ್ಚು? ಇಲ್ಲಿದೆ ರಿಪೋರ್ಟ್

ಪ್ರದೋಷ್ ರಾವ್ ಅವರ ಸಾಕ್ಷ್ಯ ದಾಖಲಿಸುವ ಪ್ರಕ್ರಿಯೆ ಕ್ರಮಬದ್ಧವಾಗಿಲ್ಲ ಎಂಬ ಆರೋಪಕ್ಕೂ ಸರ್ಕಾರಿ ಅಭಿಯೋಜಕರು ಆಕ್ಷೇಪ ವ್ಯಕ್ತಪಡಿಸಿದರು. ಕೆಲವೊಮ್ಮೆ ನ್ಯಾಯಾಲಯದಲ್ಲಿ ಹೇಳಿಕೆ ನೀಡುವಾಗ ಸಾಕ್ಷಿಗಳು ಒತ್ತಡಕ್ಕೊಳಗಾಗಬಹುದು ಅಥವಾ ಕಿಕ್ಕಿರಿದ ಕೋರ್ಟ್‌ರೂಂ ನೋಡಿ ಆತಂಕಕ್ಕೆ ಒಳಗಾಗಬಹುದು. ಆದರೂ ಸಾಕ್ಷಿಗೆ ಸತ್ಯವನ್ನು ಹೇಳಲು ಸಂಪೂರ್ಣ ಅವಕಾಶ ನೀಡಲಾಗುತ್ತಿದೆ ಎಂದು ಅವರು ಹೇಳಿದರು.

ಕಟಕಟೆಯಲ್ಲಿ ಸಾಕ್ಷಿ ನೀಡುವಾಗ ಸಾಕ್ಷಿಯ ಹೇಳಿಕೆಯನ್ನು ಮಾತ್ರ ದಾಖಲಿಸಬೇಕು. ಆರೋಪಿಗಳ ಪರ ವಕೀಲರು ಮಾಡಿರುವ ಆರೋಪಗಳನ್ನು ಅದೇ ಹೇಳಿಕೆಯ ಭಾಗವಾಗಿ ದಾಖಲಿಸಲು ಅವಕಾಶವಿಲ್ಲ ಎಂದು ಪ್ರಸನ್ನ ಕುಮಾರ್ ನ್ಯಾಯಾಲಯದ ಗಮನಕ್ಕೆ ತಂದರು.

ಈ ಹಿಂದೆ ಕೂಡ ಪ್ರದೋಷ್ ವಿರುದ್ಧ ದರ್ಶನ್ ಪರ ವಕೀಲರು ದೂರವಾಣಿ ಸೌಲಭ್ಯ ದುರುಪಯೋಗಪಡಿಸಿಕೊಂಡಿದ್ದಾರೆ ಎಂಬ ಆರೋಪ ಮಾಡಿದ್ದರು. ಆದರೆ ಆ ಸಂಬಂಧ ಸಲ್ಲಿಸಲಾಗಿದ್ದ ಅರ್ಜಿಯನ್ನು ಹೈಕೋರ್ಟ್ ವಜಾಗೊಳಿಸಿತ್ತು ಎಂದು ಸರ್ಕಾರಿ ಅಭಿಯೋಜಕರು ನ್ಯಾಯಾಲಯಕ್ಕೆ ನೆನಪಿಸಿದರು.

English Summary▼

The 59th CCH Court in Bengaluru has directed City Armed Reserve (CAR) personnel to escort Renukaswamy murder case approver Pradosh Rao to court in the future.
The order came after advocate Hashmath Pasha, representing Darshan, raised concerns about the role of Kamakshipalya police while escorting the approver. The court directed that Kamakshipalya police should not accompany or intervene in the escort process.

ಕರ್ನಾಟಕ ರಾಜ್ಯದ ಮೂಲೆಮೂಲೆಗಳ ಕನ್ನಡ ಸುದ್ದಿಗಳ ಜೊತೆಗೆ ದಿನದ ಪ್ರಮುಖ ಬೆಳವಣಿಗೆಗಳನ್ನು Kannada News Today ಮೂಲಕ ತಿಳಿಯಿರಿ.