ಪುಷ್ಪ 2, ಬಾಹುಬಲಿ 2 ದಾಖಲೆ ಉಡೀಸ್! ಇರುಮುಡಿ ಸಿನಿಮಾ ಬಾಕ್ಸ್ ಆಫೀಸ್ನಲ್ಲಿ ಭರ್ಜರಿ ಗಳಿಕೆ
ಕೇವಲ ₹40 ಕೋಟಿ ಬಜೆಟ್ನಲ್ಲಿ ನಿರ್ಮಾಣವಾದ ‘ಇರುಮುಡಿ’ ಸಿನಿಮಾ ಎರಡನೇ ವಾರದಲ್ಲೂ ಭರ್ಜರಿ ಗಳಿಕೆ ಕಾಣುತ್ತಿದ್ದು, ದೊಡ್ಡ ಬಜೆಟ್ ಚಿತ್ರಗಳ ದಾಖಲೆಗಳಿಗೆ ಸಡ್ಡು ಹೊಡೆದು ಮುನ್ನುಗ್ಗುತ್ತಿದೆ.
- ಇರುಮುಡಿ ಎರಡನೇ ಶುಕ್ರವಾರ ಸುಮಾರು ₹12 ಕೋಟಿ ಗಳಿಕೆ
- ಪುಷ್ಪ 2, ಬಾಹುಬಲಿ 2 ದಾಖಲೆಗಳನ್ನು ಹಿಂದಿಕ್ಕಿದ ಸಿನಿಮಾ
- ₹40 ಕೋಟಿ ಬಜೆಟ್ನ ಚಿತ್ರಕ್ಕೆ ಪ್ರೇಕ್ಷಕರಿಂದ ಭರ್ಜರಿ ಬೆಂಬಲ
Irumudi Breaks Cinema Records: ದೊಡ್ಡ ಬಜೆಟ್, ಸ್ಟಾರ್ ನಟರು ಮತ್ತು ಭಾರೀ ಪ್ರಚಾರವೇ ಸಿನಿಮಾ ಗೆಲುವಿಗೆ ಪ್ರಮುಖ ಕಾರಣ ಎಂಬ ಮಾತಿನ ನಡುವೆ, ‘ಇರುಮುಡಿ’ ವಿಭಿನ್ನ ರೀತಿಯಲ್ಲಿ ಗಮನ ಸೆಳೆಯುತ್ತಿದೆ. ಕೇವಲ ₹40 ಕೋಟಿ ಬಜೆಟ್ನಲ್ಲಿ ನಿರ್ಮಾಣವಾಗಿರುವ ಈ ಚಿತ್ರ, ಬಾಕ್ಸ್ ಆಫೀಸ್ನಲ್ಲಿ (Box Office) ನಿರೀಕ್ಷೆಗೂ ಮೀರಿದ ಪ್ರದರ್ಶನ ನೀಡುತ್ತಿದೆ.
ಆಗಸ್ಟ್ 21ರಂದು ತೆರೆಕಂಡಿರುವ ‘ಇರುಮುಡಿ’, ಇದೀಗ ಎರಡನೇ ವಾರಕ್ಕೆ ಕಾಲಿಟ್ಟಿದೆ. ಈ ಹಂತದಲ್ಲೂ ಚಿತ್ರದ ಗಳಿಕೆ ಕುಸಿಯದೆ ಮುಂದುವರಿದಿರುವುದು ಚಿತ್ರತಂಡಕ್ಕೆ ದೊಡ್ಡ ಪ್ಲಸ್ ಆಗಿದೆ. ಅದರಲ್ಲೂ ಎರಡನೇ ಶುಕ್ರವಾರದ ಕಲೆಕ್ಷನ್ ಚಿತ್ರಕ್ಕೆ ಮತ್ತೊಂದು ವಿಶೇಷ ದಾಖಲೆಯನ್ನು ತಂದುಕೊಟ್ಟಿದೆ.
ಎರಡನೇ ಶುಕ್ರವಾರ ‘ಇರುಮುಡಿ’ ಸುಮಾರು ₹12 ಕೋಟಿ ಗಳಿಸಿದೆ ಎನ್ನಲಾಗಿದೆ. ಇದೇ ಅವಧಿಯಲ್ಲಿ ‘ಬಾಹುಬಲಿ 2’ ಸುಮಾರು ₹10.5 ಕೋಟಿ, ‘ಪುಷ್ಪ 2’ ಸುಮಾರು ₹9 ಕೋಟಿ ಹಾಗೂ ‘ಕಲ್ಕಿ 2898 ಎಡಿ’ ಸುಮಾರು ₹7 ಕೋಟಿ ಗಳಿಸಿದ್ದವು. ‘ಆರ್ಆರ್ಆರ್’ ಮಾತ್ರ ಸುಮಾರು ₹15 ಕೋಟಿ ಗಳಿಸಿ ಮುಂದಿದೆ. ಹೀಗಾಗಿ ‘ಇರುಮುಡಿ’ ಈ ದಾಖಲೆಗಳ ಪಟ್ಟಿಯಲ್ಲಿ ಗಮನಾರ್ಹ ಸ್ಥಾನ ಪಡೆದುಕೊಂಡಿದೆ.
ಚಿತ್ರಕ್ಕೆ ಆರಂಭದಿಂದಲೂ ಉತ್ತಮ ಪ್ರೇಕ್ಷಕರ ಪ್ರತಿಕ್ರಿಯೆ ಸಿಗುತ್ತಿದೆ. ವಿಶೇಷವಾಗಿ ಕುಟುಂಬ ಪ್ರೇಕ್ಷಕರು ಚಿತ್ರಮಂದಿರಗಳತ್ತ ಬರುತ್ತಿರುವುದು ಚಿತ್ರದ ಗಳಿಕೆಗೆ ನೆರವಾಗುತ್ತಿದೆ. ಸಿನಿಮಾದ ಬಗ್ಗೆ ಪ್ರೇಕ್ಷಕರಲ್ಲೇ ನಡೆಯುತ್ತಿರುವ ಬಾಯಿ ಮಾತಿನ ಪ್ರಚಾರ (Word of Mouth) ಕೂಡ ದಿನದಿಂದ ದಿನಕ್ಕೆ ಚಿತ್ರದ ನಿರೀಕ್ಷೆ ಹೆಚ್ಚಿಸುತ್ತಿದೆ.
‘ಟಾಕ್ಸಿಕ್’ನಂತಹ ದೊಡ್ಡ ನಿರೀಕ್ಷೆಯ ಸಿನಿಮಾದ ಸ್ಪರ್ಧೆಯ ನಡುವೆಯೂ ‘ಇರುಮುಡಿ’ ತನ್ನದೇ ಪ್ರೇಕ್ಷಕರನ್ನು ಸೆಳೆಯುತ್ತಿರುವುದು ಗಮನಾರ್ಹ. ಬಿಡುಗಡೆ ಬಳಿಕ ವೇಗವಾಗಿ ಬಜೆಟ್ ವಾಪಸ್ ಪಡೆದುಕೊಂಡಿದ್ದ ಸಿನಿಮಾ, ಈಗ ದೊಡ್ಡ ಪ್ಯಾನ್ ಇಂಡಿಯಾ ಚಿತ್ರಗಳ (Pan India) ದಾಖಲೆಗಳಿಗೆ ಸವಾಲು ಹಾಕುತ್ತಿದೆ.
ರವಿತೇಜ ನಾಯಕನಾಗಿ ನಟಿಸಿರುವ ಈ ಸಿನಿಮಾದಲ್ಲಿ ಅಯ್ಯಪ್ಪ ಸ್ವಾಮಿಯ ಭಕ್ತನ ಕಥೆಯನ್ನು ಕೇಂದ್ರವಾಗಿಟ್ಟುಕೊಂಡು ಕತೆ ಹೆಣೆಯಲಾಗಿದೆ. ಅಪ್ಪ-ಮಗಳ ಭಾವನಾತ್ಮಕ ಸಂಬಂಧದ ಜೊತೆಗೆ ಸಸ್ಪೆನ್ಸ್, ಥ್ರಿಲ್ಲರ್, ಆಕ್ಷನ್ ಮತ್ತು ಕಾಮಿಡಿ ಅಂಶಗಳನ್ನು ಕೂಡ ಬೆರೆಸಲಾಗಿದೆ.
ಕೃಪ ನಿರ್ವಾನ ನಿರ್ದೇಶನದ ಈ ಚಿತ್ರಕ್ಕೆ ಮೈತ್ರಿ ಮೂವಿ ಮೇಕರ್ಸ್ ಬಂಡವಾಳ ಹೂಡಿದೆ. ವಿಭಿನ್ನ ಕಥಾಹಂದರ (Storyline) ಮತ್ತು ಮನರಂಜನಾ ಅಂಶಗಳ ಕಾರಣದಿಂದಾಗಿ ಚಿತ್ರಕ್ಕೆ ಪ್ರೇಕ್ಷಕರ ಬೆಂಬಲ ಮುಂದುವರಿದರೆ, ಮುಂದಿನ ದಿನಗಳಲ್ಲಿ ‘ಇರುಮುಡಿ’ ಇನ್ನಷ್ಟು ದಾಖಲೆಗಳನ್ನು ಬರೆಯುವ ಸಾಧ್ಯತೆ ಇದೆ.
