Recharge Plans: ರೀಚಾರ್ಜ್ ಪ್ಲಾನ್‌ಗಳು ಭಾರೀ ಏರಿಕೆ? ಹೊಸ ವರ್ಷಕ್ಕೆ ಮೊಬೈಲ್ ಬಳಕೆದಾರರಿಗೆ ಶಾಕ್!
Recharge Plans: ಹೊಸ ವರ್ಷದ ಆರಂಭಕ್ಕೂ ಮುನ್ನ ಟೆಲಿಕಾಂ ಕಂಪನಿಗಳು ರೀಚಾರ್ಜ್ ಪ್ಲಾನ್‌ಗಳ ದರವನ್ನು ಹೆಚ್ಚಿಸುವ ಕ್ರಮಕ್ಕೆ ಸಜ್ಜಾಗಿದ್ದು, 10ರಿಂದ 12%ರವರೆಗೆ ಬೆಲೆ ಏರಿಕೆ ಸಾಧ್ಯತೆ ಬಗ್ಗೆ ವಲಯದಲ್ಲಿ ಚರ್ಚೆ ಹೆಚ್ಚಾಗಿದೆ.
Recharge Plans: ಹೊಸ ವರ್ಷದ ಮೊದಲು ಮೊಬೈಲ್ ಬಳಕೆದಾರರಿಗೆ ಮತ್ತೊಂದು ಚಿಂತೆ ಹೆಚ್ಚುವ ಸಾಧ್ಯತೆ ತಲೆದೋರಿದೆ. ಪ್ರಮುಖ ಟೆಲಿಕಾಂ ಸಂಸ್ಥೆಗಳು ಈಗಿನ ಟಾರಿಫ್ ದರಗಳನ್ನು ಮರುಪರಿಶೀಲಿಸಿ ಶೀಘ್ರದಲ್ಲೇ ಏರಿಕೆ ಮಾಡುವ ದಿಕ್ಕಿನಲ್ಲಿ ಸಾಗುತ್ತಿವೆ ಎನ್ನುವ ಮಾಹಿತಿಯಿಂದ ಗ್ರಾಹಕರು ಆತಂಕಗೊಂಡಿದ್ದಾರೆ.
ಪೇಮೆಂಟ್ ಆ್ಯಪ್‌ಗಳಿಂದ ಬರುತ್ತಿರುವ ಅಲರ್ಟ್‌ಗಳ ಆತಂಕ
ಇತ್ತೀಚೆಗೆ ಹಲವಾರು ಫೈನಾನ್ಸ್ ಹಾಗೂ ಪೇಮೆಂಟ್ ಆಪ್‌ಗಳಲ್ಲಿ– “ರೀಚಾರ್ಜ್ ದರಗಳು ಶೀಘ್ರದಲ್ಲೇ ಏರಿಕೊಳ್ಳಬಹುದು, ಈಗಲೇ ನಿಮ್ಮ ಪ್ಲಾನ್‌ನನ್ನು ರಿನ್ಯೂ ಮಾಡಿ” ಎಂದು ಅಲರ್ಟ್‌ಗಳು ಕಾಣಿಸಿಕೊಳ್ಳುತ್ತಿವೆ. ಈ ಸಂದೇಶಗಳು ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆದ ನಂತರ, ಬಳಕೆದಾರರ ನಡುವೆ “ನಿಜವಾಗಿಯೂ ದರ ಏರಿಕೆ ಆಗುತ್ತಿದೆಯಾ?” ಎಂಬ ಚರ್ಚೆ ಜೋರಾಗಿದೆ.
ಟೆಲಿಕಾಂ ವಲಯದಲ್ಲಿ ವೆಚ್ಚಗಳ ಏರಿಕೆ ಹಾಗೂ 5G ವಿಸ್ತರಣೆಯ ಖರ್ಚು ನಿಭಾಯಿಸಲು ದರ ಏರಿಕೆ ಅನಿವಾರ್ಯವಾಗಿದೆ ಎಂಬ ಅಭಿಪ್ರಾಯ ವ್ಯಕ್ತವಾಗುತ್ತಿದೆ.
ಎಷ್ಟರ ಮಟ್ಟಿಗೆ ಏರಬಹುದು ದರ?
ಮಾಹಿತಿಯ ಪ್ರಕಾರ, ದರ ಏರಿಕೆ ಸಂಭವಿಸಿದರೆ ಈಗಿನ ಪ್ಲಾನ್‌ಗಳ ಬೆಲೆ 10% ರಿಂದ 12%ರವರೆಗೆ ಹೆಚ್ಚಾಗುವ ಸಾಧ್ಯತೆ ಇದೆ.
- ಪ್ರಸ್ತುತ ₹199 ಇರುವ ಪ್ಲಾನ್ ₹222 ಆಗುವ ನಿರೀಕ್ಷೆ
- ₹899 ದರದ ಪ್ಲಾನ್ ₹1006 ಗೆ ಏರಬಹುದೆಂಬ ಲೆಕ್ಕಾಚಾರ
ವೊಡಾಫೋನ್-ಐಡಿಯಾ ಕಂಪನಿ ಆರ್ಥಿಕ ಒತ್ತಡದಲ್ಲಿರುವ ಹಿನ್ನೆಲೆ ಅತ್ಯಧಿಕ ಏರಿಕೆ ಮಾಡುವ ಸಾಧ್ಯತೆ ಹೆಚ್ಚು ಎಂದು ಮೂಲಗಳು ತಿಳಿಸುತ್ತವೆ. ಇದೇ ವೇಳೆ, ಏರ್‌ಟೆಲ್ ಈಗಾಗಲೇ ₹121, ₹181 ಮುಂತಾದ ಕಡಿಮೆ ದರದ ಪ್ಲಾನ್‌ಗಳನ್ನು ಕೈಬಿಟ್ಟಿರುವುದು ಮುಂದಿನ ಏರಿಕೆಗೆ ಸೂಚನೆ ಎನ್ನಲಾಗಿದೆ. ಜಿಯೋ ಕೂಡ ದರ ಪರಿಷ್ಕರಣೆಗೆ ಸಜ್ಜಾಗಿದೆ ಎಂಬ ಮಾತು ಕೇಳಿಬರುತ್ತಿದೆ.
ಹೊಸ ವರ್ಷದ ‘ಮೊಬೈಲ್ ಖರ್ಚು’ ಹೆಚ್ಚು?
ಗ್ರಾಹಕರಿಗೆ ವರ್ಷಾರಂಭದಲ್ಲೇ ಹೆಚ್ಚುವರಿ ವೆಚ್ಚ ತಲೆಮೇಲೆ ಬೀಳುವ ಸಾಧ್ಯತೆ ಸ್ಪಷ್ಟವಾಗಿ ಕಂಡುಬರುತ್ತಿದೆ. ಸಾಮಾನ್ಯ ಮತ್ತು ಮಧ್ಯಮವರ್ಗದ ಬಳಕೆದಾರರಿಗೆ ಇದು ಹೆಚ್ಚುವರಿ ಹೊರೆ ತರಲಿದೆ ಎನ್ನುವುದರಲ್ಲಿ ಸಂಶಯವಿಲ್ಲ. ಟೆಲಿಕಾಂ ವಲಯದಿಂದ ಅಧಿಕೃತ ಘೋಷಣೆ ಜನವರಿಯಲ್ಲೇ ಬರುವ ಸಾಧ್ಯತೆ ಇದೆ ಎಂದು ವಲಯ ಪರಿಣಿತರು ಹೇಳುತ್ತಿದ್ದಾರೆ.
