Smartphone Prices: ಮಾರ್ಚ್ 1ರಿಂದ ಪ್ರಮುಖ ಸ್ಮಾರ್ಟ್ಫೋನ್ ಬ್ರಾಂಡ್ಗಳ ದರದಲ್ಲಿ ಏರಿಕೆ
Smartphone Prices: ಮಾರ್ಚ್ 1ರಿಂದ ಪ್ರಮುಖ ಸ್ಮಾರ್ಟ್ಫೋನ್ ಬ್ರಾಂಡ್ಗಳ ದರದಲ್ಲಿ ಏರಿಕೆ ಸಾಧ್ಯತೆ. ಮೆಮೊರಿ ಭಾಗಗಳ ವೆಚ್ಚ ಹೆಚ್ಚಳದಿಂದ ₹1,500 ರಿಂದ ₹2,500 ವರೆಗೆ ಬೆಲೆ ಏರಬಹುದು.
Smartphone Prices: ಹೊಸ ಸ್ಮಾರ್ಟ್ಫೋನ್ ಖರೀದಿಸಲು ಯೋಚಿಸುತ್ತಿರುವವರಿಗೆ ಇದು ಅಚ್ಚರಿ ಸುದ್ದಿ. ಇನ್ನೇನು ಕೆಲವೇ ದಿನಗಳಲ್ಲಿ ಮಾರುಕಟ್ಟೆಯಲ್ಲಿ ಮೊಬೈಲ್ ದರಗಳಲ್ಲಿ ಏರಿಕೆ ಕಾಣಿಸಿಕೊಳ್ಳಲಿದೆ ಎಂಬ ಮಾಹಿತಿ ಹೊರಬಂದಿದೆ. ವಿಶೇಷವಾಗಿ ಮಧ್ಯಮ ಹಾಗೂ ಪ್ರೀಮಿಯಂ ಸೆಗ್ಮೆಂಟ್ ಮಾದರಿಗಳಲ್ಲಿ ಬೆಲೆ ಹೆಚ್ಚಳ ಸಂಭವಿಸಲಿದೆ ಎಂದು ಉದ್ಯಮ ವಲಯ ಹೇಳುತ್ತಿದೆ.
ಮಾರ್ಚ್ 1ರಿಂದ ಕೆಲವು ಪ್ರಮುಖ ಬ್ರಾಂಡ್ಗಳ ಸ್ಮಾರ್ಟ್ಫೋನ್ಗಳ ದರ ಪರಿಷ್ಕರಣೆ ಜಾರಿಯಾಗಲಿದೆ. ಮೆಮೊರಿ ಕಂಪೊನೆಂಟ್ಗಳ ಬೆಲೆ ಏರಿಕೆಯಿಂದಾಗಿ ಉತ್ಪಾದನಾ ವೆಚ್ಚ ಹೆಚ್ಚಿದ್ದು, ಕಂಪನಿಗಳು ಅದರ ಹೊರೆ ಗ್ರಾಹಕರಿಗೆ ವರ್ಗಾಯಿಸುವ ನಿರ್ಧಾರಕ್ಕೆ ಬಂದಿವೆ ಎಂದು ಮೂಲಗಳು ತಿಳಿಸಿವೆ.
ಯಾವ ಮಾದರಿಗಳಲ್ಲಿ ಎಷ್ಟು ಏರಿಕೆ?
Vivo ಕಂಪನಿಯ T4 ಸರಣಿಯ ಕೆಲವು ಮಾದರಿಗಳಲ್ಲಿ ಸುಮಾರು ₹2,000ವರೆಗೆ ಏರಿಕೆ ಸಂಭವಿಸಬಹುದು. ಉದಾಹರಣೆಗೆ 8GB + 128GB ಮಾದರಿಯ ಬೆಲೆ ₹22,999ರಿಂದ ₹24,999ಕ್ಕೆ ಏರಿಕೆಯಾಗುವ ಸಾಧ್ಯತೆ ಇದೆ. 8GB + 256GB ಮತ್ತು 12GB + 256GB ರೂಪಾಂತರಗಳಲ್ಲೂ ₹2,000ರಷ್ಟು ಹೆಚ್ಚಳ ಕಾಣಬಹುದು. T4R ಮಾದರಿಗಳಲ್ಲಿ ₹1,500ರಿಂದ ₹2,500ರವರೆಗೆ ಬೆಲೆ ಏರಿಕೆ ಸಾಧ್ಯತೆ ಇದೆ.
ಇದೇ ವೇಳೆ iQOO Z10 ಸರಣಿಯಲ್ಲೂ ದರ ಬದಲಾವಣೆ ನಡೆಯಲಿದೆ ಎನ್ನಲಾಗಿದೆ. 8GB + 128GB, 8GB + 256GB ಮತ್ತು 12GB + 256GB ಮಾದರಿಗಳಲ್ಲಿ ಸುಮಾರು ₹2,000 ಹೆಚ್ಚಳ ನಿರೀಕ್ಷಿಸಲಾಗಿದೆ. Z10x ಮಾದರಿಯ 6GB + 128GB ರೂಪಾಂತರದಲ್ಲಿ ₹1,500ವರೆಗೆ ಹಾಗೂ ಇತರ ರೂಪಾಂತರಗಳಲ್ಲಿ ₹2,500ವರೆಗೆ ಏರಿಕೆ ಸಂಭವಿಸಬಹುದು ಎಂಬ ಮಾಹಿತಿ ಮಾರುಕಟ್ಟೆಯಲ್ಲಿ ಚರ್ಚೆಯಲ್ಲಿದೆ.
ಸದ್ಯ ಈ ದರ ಏರಿಕೆ ಕುರಿತು ಅಧಿಕೃತ ಪ್ರಕಟಣೆ ಹೊರಬಂದಿಲ್ಲ. ಆದರೆ ಡೀಲರ್ಗಳು ಹಾಗೂ ಮಾರುಕಟ್ಟೆ ಮೂಲಗಳ ಪ್ರಕಾರ ಹೊಸ ಸ್ಟಾಕ್ ಮಾರ್ಚ್ನಿಂದ ಹೆಚ್ಚಿದ ದರದಲ್ಲೇ ಲಭ್ಯವಾಗುವ ಸಾಧ್ಯತೆ ಇದೆ. ಹೀಗಾಗಿ ಫೋನ್ ಖರೀದಿಸಲು ಯೋಚಿಸುತ್ತಿರುವವರು ತ್ವರಿತ ನಿರ್ಧಾರ ತೆಗೆದುಕೊಳ್ಳಬೇಕಾಗಬಹುದು.
ಜಾಗತಿಕ ಮಟ್ಟದಲ್ಲೂ ಮೆಮೊರಿ ಚಿಪ್ ಬೆಲೆ ಏರಿಕೆ ಕಂಡುಬಂದಿರುವುದರಿಂದ, ಈ ಪರಿಣಾಮ ಭಾರತದಲ್ಲೂ ಕಾಣಿಸಿಕೊಳ್ಳುತ್ತಿದೆ. ಗ್ರಾಹಕರಿಗೆ ಇದು ನೇರವಾಗಿ ಹೊರೆ ಆಗಲಿದ್ದು, ಮುಂದಿನ ದಿನಗಳಲ್ಲಿ ಇತರ ಬ್ರಾಂಡ್ಗಳಲ್ಲೂ ಬೆಲೆ ಪರಿಷ್ಕರಣೆ ಸಾಧ್ಯತೆ ತಳ್ಳಿಹಾಕಲಾಗದು.
