ಜನಸಾಮಾನ್ಯರಿಗೆ ಬಿಗ್ ರಿಲೀಫ್! ಸ್ಮಾರ್ಟ್‌ಫೋನ್, ಟಿವಿಗಳ ಬೆಲೆ ಶೀಘ್ರದಲ್ಲೇ ಇಳಿಕೆ

• ಸ್ಮಾರ್ಟ್‌ಫೋನ್, ಟಿವಿ ಬೆಲೆ ಇಳಿಕೆಗೆ ಬಜೆಟ್ 2026 ದಾರಿ
• ಕಸ್ಟಮ್ಸ್ ಡ್ಯೂಟಿ ಕಡಿತದಿಂದ ಉತ್ಪಾದನಾ ವೆಚ್ಚ ಇಳಿಕೆ
• ಸಾಮಾನ್ಯ ಹಾಗೂ ಮಧ್ಯಮ ವರ್ಗಕ್ಕೆ ನೇರ ಲಾಭ

ಬಜೆಟ್ 2026ರಲ್ಲಿ ಕೇಂದ್ರ ಸರ್ಕಾರ ತೆಗೆದುಕೊಂಡ ನಿರ್ಧಾರವು ದೇಶದ ಗ್ರಾಹಕರಿಗೆ ನಿಟ್ಟುಸಿರು ಬಿಡುವಂತಾಗಿದೆ. ಸ್ಮಾರ್ಟ್‌ಫೋನ್ ಮತ್ತು ಟಿವಿಗಳ ತಯಾರಿಕೆಗೆ ಅಗತ್ಯವಿರುವ ಪ್ರಮುಖ ಬಿಡಿಭಾಗಗಳ ಮೇಲೆ ಕಸ್ಟಮ್ಸ್ ಡ್ಯೂಟಿಯನ್ನು ಕಡಿತ ಮಾಡಲಾಗಿದೆ. ಇದರಿಂದ ಉತ್ಪಾದನಾ ವೆಚ್ಚ ಇಳಿಯುವ ಸಾಧ್ಯತೆ ಇದ್ದು, ಮುಂದಿನ ದಿನಗಳಲ್ಲಿ ಮಾರುಕಟ್ಟೆಯಲ್ಲಿ ಬೆಲೆ ಕಡಿಮೆಯಾಗುವ ನಿರೀಕ್ಷೆ ಮೂಡಿದೆ.

ಭಾರತದಲ್ಲಿ ಹೆಚ್ಚಿನ ಎಲೆಕ್ಟ್ರಾನಿಕ್ ಉತ್ಪನ್ನಗಳ ಭಾಗಗಳು ವಿದೇಶಗಳಿಂದ ಆಮದು ಆಗುತ್ತವೆ. ಇದುವರೆಗೆ ಡ್ಯೂಟಿ ಹೆಚ್ಚಿದ್ದರಿಂದ ಅಂತಿಮ ಬೆಲೆ ಮೇಲೆ ಪರಿಣಾಮ ಬೀರುತ್ತಿತ್ತು. ಇದೀಗ ತೆರಿಗೆ ಕಡಿತಗೊಂಡಿರುವುದರಿಂದ ಕಂಪನಿಗಳು ಗ್ರಾಹಕರಿಗೆ ಕಡಿಮೆ ಬೆಲೆಯಲ್ಲಿ ಉತ್ಪನ್ನ ನೀಡುವ ಸಾಧ್ಯತೆ ಹೆಚ್ಚಾಗಿದೆ ಎಂದು ಮಾರುಕಟ್ಟೆ ವಿಶ್ಲೇಷಕರು ಹೇಳುತ್ತಾರೆ.

ಮನೆಬಳಕೆಯ ವಸ್ತುಗಳಿಗೂ ರಿಲೀಫ್

ಸ್ಮಾರ್ಟ್‌ಫೋನ್ ಮತ್ತು ಟಿವಿಗಳಷ್ಟೇ ಅಲ್ಲ, ಅಡುಗೆ ಮನೆಯಲ್ಲಿ ಬಳಸುವ ಕೆಲ ಎಲೆಕ್ಟ್ರಾನಿಕ್ ವಸ್ತುಗಳ ಬೆಲೆಗೂ ಇಳಿಕೆ ಸಾಧ್ಯತೆ ಇದೆ. ಮೈಕ್ರೋವೇವ್ ಓವನ್‌ಗಳ ಮೇಲೆ ಕಸ್ಟಮ್ಸ್ ಡ್ಯೂಟಿಯನ್ನು ಸರ್ಕಾರ ಕಡಿತ ಮಾಡಿರುವುದು ಗ್ರಾಹಕರಿಗೆ ಲಾಭದಾಯಕವಾಗಿದೆ.

ಇದೇ ವೇಳೆ ಚಪ್ಪಲಿ, ಲೆದರ್ ಉತ್ಪನ್ನಗಳು ಹಾಗೂ ವಿಡಿಯೋ ಗೇಮ್ ತಯಾರಿಕೆಗೆ ಬಳಕೆಯಾಗುವ ಬಿಡಿಭಾಗಗಳ ಮೇಲೂ ತೆರಿಗೆ ರಿಯಾಯಿತಿ ಘೋಷಿಸಲಾಗಿದೆ. ಇದರಿಂದ ಈ ವಸ್ತುಗಳ ಬೆಲೆಗಳು ಕೂಡ ಹಂತಹಂತವಾಗಿ ಇಳಿಯುವ ನಿರೀಕ್ಷೆ ಇದೆ.

ಔಷಧ, ಇವಿ ಬ್ಯಾಟರಿ ಬೆಲೆಗೂ ಲಾಭ

ಬಜೆಟ್‌ನ ಮತ್ತೊಂದು ಪ್ರಮುಖ ಅಂಶವೆಂದರೆ ಇವಿ ಬ್ಯಾಟರಿ ಹಾಗೂ ಕೆಲವು ಅಗತ್ಯ ಔಷಧಗಳ ಮೇಲಿನ ಡ್ಯೂಟಿ ಕಡಿತ. ವಿಶೇಷವಾಗಿ 17 ಬಗೆಯ ಕ್ಯಾನ್ಸರ್ ಔಷಧಗಳ ಮೇಲೆ ಮೂಲ ಕಸ್ಟಮ್ಸ್ ಡ್ಯೂಟಿ ಇಳಿಕೆ ಮಾಡಿರುವುದು ರೋಗಿಗಳಿಗೆ ಮಹತ್ವದ ನೆರವಾಗಿದೆ.

ಗಮನಿಸಬೇಕಾದ ವಿಷಯವೆಂದರೆ, ಬಜೆಟ್ ಘೋಷಣೆ ತಕ್ಷಣವೇ ಬೆಲೆ ಬದಲಾವಣೆಗೆ ಕಾರಣವಾಗುವುದಿಲ್ಲ. ಏಪ್ರಿಲ್‌ನಿಂದ ಜಾರಿಗೆ ಬಂದ ಬಳಿಕ ಮಾರುಕಟ್ಟೆಯಲ್ಲಿ ಹಂತಹಂತವಾಗಿ ಪರಿಣಾಮ ಕಾಣಿಸಿಕೊಳ್ಳಲಿದೆ.

ಕೆಲ ವಸ್ತುಗಳ ಬೆಲೆ ಏರಿಕೆ

ಒಂದೆಡೆ ಬೆಲೆ ಇಳಿಕೆಯ ಸುದ್ದಿ ಇದ್ದರೆ, ಇನ್ನೊಂದೆಡೆ ಕೆಲ ವಸ್ತುಗಳಿಗೆ ದುಬಾರಿ ದಿನಗಳು ಎದುರಾಗಲಿವೆ. ಕಾಫಿ, ವೆಂಡಿಂಗ್ ಮಷಿನ್‌ಗಳು, ಸಿಗರೇಟು, ವಿದೇಶಿ ಮದ್ಯ ಹಾಗೂ ಪಾನ್ ಮಸಾಲಾ ಮೇಲಿನ ತೆರಿಗೆ ಹೆಚ್ಚಳದಿಂದ ಅವುಗಳ ಬೆಲೆ ಏರಿಕೆ ಸಾಧ್ಯತೆ ಇದೆ.

ಈ ಬಜೆಟ್ ನಿರ್ಧಾರಗಳಿಂದ ಕೆಲವು ವಲಯಗಳು ಲಾಭ ಪಡೆಯಲಿದ್ದರೆ, ಕೆಲ ಕ್ಷೇತ್ರಗಳಿಗೆ ಬೆಲೆ ಏರಿಕೆಯ ಹೊಡೆತ ತಟ್ಟಲಿದೆ. ಒಟ್ಟಾರೆ, ಬಜೆಟ್ 2026 ಗ್ರಾಹಕರ ಜೇಬಿನ ಮೇಲೆ ಮಿಶ್ರ ಪರಿಣಾಮ ಬೀರುವ ನಿರೀಕ್ಷೆ ಇದೆ.