ನಟ ಡಾ.ರಾಜ್‌ಕುಮಾರ್ ಅವರ ಸಹೋದರಿ ನಾಗಮ್ಮ ವಿಧಿವಶ
ಚಾಮರಾಜನಗರದ ಗಾಜನೂರಿನಲ್ಲಿ ನಟ ರಾಜ್‌ಕುಮಾರ್ ಅವರ ಸಹೋದರಿ ನಾಗಮ್ಮ ವಯೋಸಹಜ ಅನಾರೋಗ್ಯದಿಂದ ನಿಧನರಾಗಿದ್ದಾರೆ. 94 ವರ್ಷ ವಯಸ್ಸು ಹೊಂದಿದ್ದ ಅವರು ಕುಟುಂಬದ ಹಿರಿಯ ಸದಸ್ಯರಲ್ಲೊಬ್ಬರಾಗಿದ್ದರು.
- ಡಾ. ರಾಜ್‌ಕುಮಾರ್ ಸಹೋದರಿ ನಾಗಮ್ಮ ಇಂದು ನಿಧನ
- 94 ವರ್ಷದ ನಾಗಮ್ಮ ಗಾಜನೂರಿನಲ್ಲಿ ಕೊನೆಯುಸಿರೆಳೆದರು
- ಅಂತಿಮ ಬಯಕೆ: ಪುನೀತ್ ರಾಜ್‌ಕುಮಾರ್ ಅವರನ್ನು ನೋಡಲೇ ಬೇಕೆಂದಿದ್ದರು
ನಟ ಸಾರ್ವಭೌಮ ಡಾ. ರಾಜ್‌ಕುಮಾರ್ (Dr Rajkumar Sister) ಅವರ ಸಹೋದರಿ ನಾಗಮ್ಮ (Nagamma) ಇಂದು (ಆಗಸ್ಟ್ 1) ತಮ್ಮ ಸ್ವಗ್ರಾಮ ಗಾಜನೂರಿನಲ್ಲಿ ವಿಧಿವಶರಾಗಿದ್ದಾರೆ. ವಯೋಸಹಜ ಅನಾರೋಗ್ಯದಿಂದ ಬಳಲುತ್ತಿದ್ದ ನಾಗಮ್ಮ ಅವರು ಬೆಳಿಗ್ಗೆ 11 ಗಂಟೆ ಸುಮಾರಿಗೆ ಕೊನೆಯುಸಿರೆಳೆದರು.
94 ವರ್ಷದ ನಾಗಮ್ಮ ಅವರು ಡಾ.ರಾಜ್‌ಕುಮಾರ್ ತಲೆಮಾರಿನ ಕೊನೆಯ ಹಿರಿಯ ಸದಸ್ಯೆಯಾಗಿದ್ದರು. ಇಂದು ಬೆಳಿಗ್ಗೆ ಶಿವರಾಜ್ ಕುಮಾರ್ ಗೋವಾಕ್ಕೆ ತೆರಳಿದ್ದ ವೇಳೆ ಈ ದುಃಖದ ಸುದ್ದಿ ತಿಳಿಯುತ್ತಿದ್ದಂತೆ ಅವರು ತಕ್ಷಣ ಬೆಂಗಳೂರಿಗೆ ವಾಪಸ್ ಆಗುತ್ತಿದ್ದಾರೆ. ಇತ್ತ ರಾಘವೇಂದ್ರ ರಾಜ್‌ಕುಮಾರ್ ಗಾಜನೂರಿಗೆ ಹೊರಟಿದ್ದಾರೆ. ಮೂಲಗಳ ಪ್ರಕಾರ ಅಂತ್ಯಕ್ರಿಯೆ ಆಗಸ್ಟ್ 2ರಂದು ನಡೆಯಲಿದೆ.
ಅವರಿಗೆ ನಾಲ್ವರು ಪುತ್ರರು, ಇಬ್ಬರು ಪುತ್ರಿಯರು ಇದ್ದಾರೆ. ಕುಟುಂಬವು ದುಃಖದ ಮಡಿಲಲ್ಲಿ ಇದ್ದು, ಸಾಮಾಜಿಕ ಮಾಧ್ಯಮಗಳಲ್ಲೂ ಸಹ ಅವರ ಅಗಲಿಕೆಗೆ ಸಂತಾಪದ ಮಹಾಪೂರವೇ ಹರಿದುಬಂದಿದೆ.
ಇದೇ ನಡುವೆ, ಪುನೀತ್ ರಾಜ್‌ಕುಮಾರ್ ವಿಧಿವಶವಾದ ವಿಷಯವನ್ನು ನಾಗಮ್ಮಗೆ ತಿಳಿಸಿರಲಿಲ್ಲ ಎಂಬ ಸಂಗತಿ ಬೆಳಕಿಗೆ ಬಂದಿದೆ. ಅಪ್ಪು ಅವರನ್ನು ಒಮ್ಮೆ ನೋಡಬೇಕು ಎಂಬ ಇಚ್ಛೆಯೊಂದಿಗೆ ಅವರು ಈ ಲೋಕ ತ್ಯಜಿಸಿದ್ದಾರೆ ಎಂಬ ಕುಟುಂಬದ ಮಾಹಿತಿ ಹೃದಯವನ್ನು ತಟ್ಟುತ್ತದೆ.
Rajkumar’s Sister Nagamma Passes Away at 94 in Gajanur
